नेपाल विद्युत प्राधिकरण, नेपालगन्ज वितरण केन्द्रले दिएको जिम्मेवारी फिल्डमा पूरा गर्न गएका विद्युतका कर्मचारीहरूमाथि मंगलबार भएको सामूहिक आक्रमणमा तीन जना विरुद्ध मात्रै उजुरी दर्ता भएको छ । कर्मचारीहरूको अनुसार १०÷१५ जनाको समूहले आक्रमण गरेको दाबी गरिएपनि मुद्दा भने तीन जनामाथि मात्रै दर्ता भएको हो ।
जिल्ला प्रहरी कार्यालय बाँकेका प्रवक्ता, प्रहरी नायब उपरीक्षक दिनेश पातलीले तीन जना विरुद्ध उजुरी आएको र एक जनालाई पक्राउ गरिएको जानकारी दिएका छन् ।
बाँके प्रहरी प्रमुख, प्रहरी उपरीक्षक तुल बहादुर कार्कीले उक्त घटनामा अभद्र व्यवहार मुद्दा दर्ता भएको र मेडिकल रिपोर्ट पछि ज्यान मार्न सक्ने उद्योगमा मुद्दा चल्न सक्ने बताएका छन् ।
आक्रमणमा गम्भीर घाइते उदयराज यादव भेरी अस्पताल नेपालगन्जको शैय्यामा छन् । अस्पतालमा दाईको उपचारका लागि रहेका उनका भाई सुनिल यादवले दोषीलाई कारवाही हुने र कर्मचारीले न्याय पाउने विश्वास व्यक्त गरेका थिए । ‘दाईको स्वास्थ्यमा कति असर परेको छ, जानकारी पाएको छैन, तर ज्यान मार्ने उद्देश्यले घाँटी अचेटिएको दाईले बताउनु भएको छ’, आफु पनि विद्युतका कर्मचारी रहेका सुनिलले भने । ईदका बेला विद्युत लाइन काट्न पठाउँदा भएको अवरोधलाई बेवास्ता गरी थप कर्मचारी सुरक्षा बिना परिचालन गरिनुलाई विद्युत प्राधिकरणको लापरवाही भएको बताइन्छ । ‘अवरोध पछि सुरक्षा सहित कर्मचारी खटाउनु पर्ने हो, तर कर्मचारीलाई विना सुरक्षा फिल्डमा खटाउँदा घटना भयो’, कर्मचारी भन्छन्, ‘दोषी जोगाउन मुद्दा कमजोर गर्ने, राजनीतिक दबाबमा काम गर्ने र सुरक्षा सुनिश्चित गर्ने काम अझै हुन सकेको छैन ।’
यसैबीच नेकपा (एमाले) डुडुवा गाउँकमिटी बाँकेले विद्युत प्राधिकरण नेपालगन्ज वितरण केन्द्रबाट विद्युत बक्यौता रहेका ग्राहकको लाइन काट्न खटिएका कर्मचारीमाथि मंगलबार मरणासन्न हुनेगरी कुटपिट गरेको घटनाप्रति गम्भीर ध्यानाकर्षण भएको बताएको छ ।
कमिटीका सचिव महेशकुमार चौधरीले बुधबार विज्ञप्ति मार्फत कुटपिटबाट घाइते हुनु भएका कर्मचारीलाई न्याय दिनुपर्ने उल्लेख गरिएको छ । विज्ञप्तिमा कार्यालयले खटाएको काम गर्ने गएका डुडुवा गाउँपालिका वडा नं.६ निवासी उदयराज यादवलाई मरणासन्न हुने गरि कुटपिट गरेको र उहाँको भेरी अस्पताल नेपालगन्जमा उपचारत रहेको बताइएको छ । घाइते यादवको सिघ्र स्वास्थ्य लाभको कामना गर्दै, उपचार खर्च सम्बन्धित कार्यालयले व्यहोर्नुपर्ने माग गरिएको छ । घटनाको प्रकृतिका आधारमा वितरण केन्द्रले समेत पहिलो प्राथमिकता कर्मचारीको ज्यूज्यानको सुरक्षा राख्नुपर्ने कुरालाई समेत ध्यान नदिएको देखिएको विज्ञप्तिमा उल्लेख छ ।
