दुर्घटनाजन्य जलनका घटना हुन नदिन सचेतना आवश्यक रहेको नेपालगन्ज नगर उपप्रमुख कमरुद्दिन राईले बताएका छन् । बुधबार नेपालगन्जमा बिभिएस नेपालले नेपालगन्जका जनप्रतिनिधिका लागि आयोजना गरेको जलन संवेदनशीलता सम्बन्धी सहजीकरण कार्यक्रममा बोल्दै जलनका घटना हुन नदिन सचेतनाका लागि सबैको प्रयास आवश्यक रहेको धारणा राखेका हुन् ।
उपप्रमुख राईले नियोजित, आवेशमा आई हुने जलनजन्य घटनामा कडा कानुनी कारवाही हुनुपर्ने धारणा राखेका थिए । ‘कसैको जीवन नै तहसनहस गर्ने गरी हुने जलनजन्य आक्रमणका दोषीलाई आतंकवादी सरह कानुनी कारवाही हुनुपर्छ’, उनले भने ।
कार्यक्रममा आफ्नो प्रस्तुति राख्दै बिभिएसका कार्यक्रम अधिकृत चन्द्रसरतुङ्गेले नेपालमा हुने गरेका जलनका घटना, त्यसमा संस्थाले गरेको सहयोग र आगामी दिनमा सरकारले चाल्नुपर्ने कमदका बारेमा बोलेका थिए । उनले बाँकेमा हालसम्म ९३ जना जलन पीडितलाई मेडिकल सर्जिकल, काउन्सिलिङ्ग लगायतका सहायता उपलब्ध गराएको जानकारी दिएका थिए । उनले भेरी अस्पतालमा जलन उपचारको व्यवस्था रहेको बताएका थिए ।
भेरी अस्पताल नेपालगन्जका प्रमुख मेडिकल सुपरिटेन्डेन्ट डा. निराजन सुवेदीले अस्पतालमा सेवा वृद्धिका लागि थप अपग्रेड आवश्यक रहेको भन्दै त्यसमा सबैको सामूहिक पहल आवश्यक रहेको बताए ।
