नेपालगन्ज भन्सार कार्यालयले चालु आर्थिक बर्षको १० महिना बित्दा लक्ष्यको ६०.५७ प्रतिशत मात्रै भन्सार राजश्व संकलन गर्न सफल भएको छ ।
नेपालगन्ज भन्सार कार्यालयको तथ्यांक अनुसार, नेपालगन्ज भन्सार कार्यालयका लागि बार्षिक लक्ष्य २७ अर्ब १८ करोड ३५ लाख ८९ हजार निर्धारण भएकोमा बैशाख मसान्तसम्म १६ अर्ब ४६ करोड २४ हजार असुली भएको छ । बार्षिक लक्ष्य भेट्नका लागि चालु आ.व.को जेठ र असारमा थप ४० प्रतिशत राजश्व संकलन गर्नुपर्ने हुन्छ ।
चालु आर्थिक बर्ष २०८१÷०८२ को साउनदेखि हालसम्म कुनै पनि महिना नेपालगन्ज भन्सारले मासिक लक्ष्य अनुसार राजश्व संकलन गर्न सकेको छैन । यद्यपि, चैत्र महिनामा भने भन्सारले लक्ष्यको ८२.५४ प्रतिशत भन्सार राजश्व संकलन गरेकोमा अन्य महिना ८० प्रतिशत लक्ष्य नाघेको तथ्यांक रहेको छ ।
अघिल्लो आ.व. २०८०÷०८१ मा नेपालगन्ज भन्सारले लक्ष्यको ६३.३५ प्रतिशत राजश्व संकलन गरेको थियो । उक्त आ.व.मा २८ अर्ब ६६ करोड २५ लाख २९ हजार रूपैयाँ लक्ष्य निर्धारण गरिएकोमा राजश्व संकलन भने १८ अर्ब १५ करोड ७२ लाख ३३ हजार रूपैयाँ राजश्व संकलन भएको थियो । भन्सारले निर्धारित लक्ष्य भेट्न नसकेपछि लक्ष्य १ अर्ब बढी घटाएर चालु आ.व.का लागि लक्ष्य निर्धारण भएको थियो ।
नेपाल–भारत सीमाको जमुनाह नाकामा एकीकृत जाँच चौकी सञ्चालनमा आएपछि भन्सार वृद्धि हुने अपेक्षा गरिएपनि त्यस्तो परिणाम आउन सकेको छैन । एकीकृत जाँच चौकीको प्रयोग गर्दा थप शुल्क आयातकर्ताले व्यहोर्नुपर्दा अन्य नाकाबाट आयात केन्द्रीत भएको हुनसक्ने अनुमान समेत गरिएको छ ।
नेपालगन्ज भन्सारबाट हुने व्यापार घाटा पनि उच्च रहेको छ । आयात–निर्यातको अनुपातमा निकै ठूलो फरक पाइन्छ । नेपालगन्ज भन्सारबाट चालु आर्थिक बर्ष २०८१÷०८२ को बैशाख मसान्तसम्म मात्रै व्यापार घाटा ९५.११ प्रतिशत रहेको छ । नेपालगन्ज भन्सारबाट चालु आ.व.को वैशाख मसान्तसम्म ६३ अर्ब २८ करोड ५ लाख ९३ हजार बराबरको आयात र निर्यात २ अर्ब ५८ करोड २४ लाख १५ हजार बराबरको निर्यात भएको छ ।
