बाल विवाह विरुद्ध बर्दियाको गुलरियामा सरोकारवालाहरू बीच बृहत अन्तरक्रियात्मक छलफल गरिएको छ । शुक्रबार प्लान इन्टरनेशनल नेपाल र बाँके युनेस्को क्लबसँगको सहकार्यमा थारु आयोगले ‘बाल विवाह न्यूनीकरणका लागि बरघर र अन्य सरोकारवालाहरूको भूमिका’ विषयक छलफल आयोजना गरेको हो ।
आयोगका कार्यवाहक अध्यक्ष सुबोध सिंह थारुको अध्यक्षतामा भएको अन्तरक्रियात्मक छलफलमा वक्ताहरूले बरघरलाई अधिकार सम्पन्न बनाएर सामूदायिक क्षेत्रबाटै बाल विवाह विरुद्ध प्रभावकारी कदम चाल्न सकिने धारणा राखे । ‘बरघर ऐन मार्फत नै समूदाय स्तरमा रहेका विकृतिहरू अन्त्य गर्न सकिन्छ’, ठाकुरबाबा नगरपालिकाका नगरप्रमुख छबिलाल थारुले भने ।
कार्यक्रमका प्रमुख अतिथि, लुम्बिनी प्रदेश सभा सदस्य भुवनेश्वर थारुले थारु समुदायको समस्याका रूपमा रहेका विभिन्न विकृति, विसंगतिमध्ये बालबिवाह पनि एउटा भएकाले त्यसको न्यूनीकरणमा बरघरहरू अग्रसर हुनुपर्ने बताए ।
कार्यक्रममा सहभागी विभिन्न पालिकाका बालिकाहरूले बालविवाहका कारण आफुलाई परेको नकारात्मक प्रभावबारे धारणा राख्दै समस्या सुनाएका थिए । निकै भावुक भएका उनीहरूले बाल विवाहका कारण आफ्नो भविष्य नै जोखिममा रहेको सुनाए ।
शिक्षा सँगै रोजगारीको सुनिश्चितता गरी युवाहरूलाई बाल विवाहबाट टाढा राख्न सकिने सुझाव कतिपयले दिए ।
‘समुदाय स्तरबाटै विकृति, विसंगति विरुद्ध प्रभावकारी कदम चाल्न सम्बद्ध आयोगसँगको सहकार्यमा यसखालका कार्यक्रमहरू गर्दै आएका छौं’, अन्तरक्रियामा आफ्ना धारणा राख्दै प्लान इन्टरनेशनल नेपालका नीति, पैरवी म्यानेजर इरशाद अन्सारीले भने । उनले बाल विवाहका कारण किशोर, किशोरीमा पर्ने विभिन्न प्रभावबारे जानकारी प्रस्तुत गर्दै समुदायका अगुवा, बरघर, जनप्रतिनिधिहरू लगायतको ध्यानाकर्षण गराएका थिए ।
‘कम्तिमा बालविवाह भैरहेका ठाउँमा तपाईहरूले आफ्नो सहभागिता मात्रै जनाइदिनुभएन भने मात्रै पनि यो समस्या न्यूनीकरण हुँदै जान्छ’, थारु आयोगका का.वा अध्यक्ष थारुले भने ।
कार्यक्रममा सहभागीहरू बीचबाट विभिन्न प्रतिबद्धता सहितको छ बूंदे घोषणा गरिएको बाँके युनेस्को क्लबका अध्यक्ष रवि तुलाधरले जानकारी दिए । ‘बाल विवाहलाई कुनै पनि अवस्थामा स्वीकार गरिनेछैन’, प्रतिबद्धता सहितको घोषणामा भनिएको छ, ‘बाल विवाह न्यूनीकरणका विषयमा बरघर ऐनमा समावेश गरी बरघरलाई अधिकार सम्पन्न र स्रोत, साधन सम्पन्न बनाउन पहल गरिनेछ ।’
विभिन्न पालिकाका प्रमुख, वडाध्यक्ष, प्रदेशसभा सदस्य, थारु कल्याणकारी सभाका केन्द्र जिल्लाका पालिका प्रतिनिधि, थारु युवा सञ्जाल तथा किशोरी सञ्जालका प्रतिनिधि, पत्रकार लगायतको सहभागिता रहेको कार्यक्रममा बालविवाह विरुद्धका नीति नियमहरूको कार्यान्वयनका लागि सबैले सम्बन्धित निकायमा पैरवी गर्ने घोषणा पनि गरिएको छ ।
‘यसको कार्यान्वयनले बाल विवाह मुक्त बर्दिया घोषणा गर्नेमा आधार तयार हुनेछ’,
बाँके युनेस्को क्लबका संरक्षक प्रवेज अली सिद्दिकीले जिल्लाका
बहुसंख्यक वडाहरू बाल विवाह मुक्त घोषणा भैरहेको जानकारी दिंदै दैनिक नेपालगन्जसँग भने, ‘बाल विवाह न्यूनीकरणका सवालमा बर्दिया जिल्लाले उत्साहजनक ढंगले काम गरिरहेको छ ।’ त्यसका लागि प्लान इन्टरनेशनल नेपालसँगको साझेदारीमा बाँके यूनेस्को क्लबले निरन्तर पैरवीको काम गरिरहेको अधिकृत महेश नेपालीले जानकारी दिए ।
विवाहको उमेर २० बर्ष नै कायम राख्नका लागि सहभागीहरूले सहमति जनाउँदै त्यसका लागि निरन्तर वकालत गर्ने प्रतिबद्धता घोषणामा उल्लेख गरिएको छ । ‘बरघरहरू एकजुट भई बालविवाह विरुद्ध विभिन्न अभियान तथा कार्यक्रम सञ्चालन गर्नेछौं’, बर्दियाका सबैजसो पालिकाबाट सहभागीहरूले शुक्रबार आयोजित अन्तरक्रियामा आफ्नो प्रतिबद्धता जनाउँदै हस्ताक्षर गरेका
छन् ।