एपीएफ बन्यो च्याम्पियन
सजल/सन्ध्या गैरे
सशस्त्र प्रहरी बलको एपीएफ क्लब पहिलो लुम्बिनी कप अन्तर्राष्ट्रिय आमन्त्रण महिला फुटबल प्रतियोगिताको च्याम्पियन बनेको छ । विभागीय प्रतिद्वन्द्वी नेपाल पुलिस क्लबलाई १–० ले पराजित गर्दै एपीएफले जीतको उपाधिसहित लुम्बिनी कप उचालेको हो ।
नेपालगन्ज रंगशालामा भएको फाइनल खेलमा शुरुदेखिनै राम्रो खेलिरहेको पुलिस अन्तिम समय सम्हालिन नसक्दा पराजयको सामना गर्नुपरेको थियो । एपीएफका लागि इन्जुरी समयमा गीता रानाको हेड गोल नै खेलमा निर्णायक बन्न पुग्यो ।
योसँगै एपीएफ लगातार तेस्रो मोफसल प्रतियोगिताको उपाधि जित्न सफल भयो । यसअघि इलाम र चितवन गोल्डकपको उपाधि जितेको थियो । राष्ट्रिय टोलीका एक दर्जन खेलाडी समावेश गरेको एपीएफले त्यसअघि महिला लिगको उपाधि उचालेको थियो ।
आठ टोली सहभागी प्रतियोगिताको विजेता एपीएफले ५ लाख ५ हजार ५५५ रुपैयाँ र उपविजेता नेपाल पुलिसले २ लाख ५० हजार रुपैयाँ, ट्रफी, मेडल प्राप्त गरेका छन् । एपीएफले पहिलो खेलमा कर्णाली प्रदेशलाई ६–० तथा सेमिफाइनलमा रौतहट जिल्ला फुटबल संघलाई ३–० ले हराएको थियो । भने पुलिसले पहिलो खेलमा भारतको सिलिगुडी एफसीलाई ४–० तथा सेमिफाइनलमा भने विभागीय अर्को टोली त्रिभुवन आर्मी क्लबलाई सेडनडेथमा ६–५ ले पराजित गरेको थियो ।
आजको खेल निकै प्रतिस्पर्धात्मक बनेको थियो । फाइनल खेलमा सोचे अनुसारको प्रस्तुति दिन नसकेको बिजेता टिम एपीएफका प्रशिक्षक भगवती थापाले बताइन् । पुलिसले कडा चुनौती दिएको उनको भनाइ थियो । प्लेयर अफ द फाइनल एपीएफका गिता राना घोषित भइन् ।
घरेलु मैदानमा जीत हासिल गर्ने नेपाल पुलिस क्लबका क्याप्टेन निरु थापाको सपना भने अधुरो भएको छ । यद्यपी उनले घरेलु मैदानमा उपबिजेता बनेकोमा खुशी नै ब्यक्त गरिन् । उत्कृष्ट गोल रक्षक नेपाल पुलिस क्लबकी उषा नाथ बनिन् ।
उत्कृष्ट डिफेन्डर एपीएफका गिता राना, स्ट्राइकर अनिता केसी र प्रशिक्षक भगवती थापा लाई सम्मान गरिएको छ थियो । यसैगरी फाइनलको सर्वोत्कृष्ट खेलाडी एपीएफका क्याप्टेन अनिता बस्नेतले नगद रु २५ हजार हात पारेकी छिन् ।
अन्तरालको आयोजना तथा बाँके जिल्ला फुटबल संघको सहकार्यमा भएको प्रतियोगितामा घरेलु टिम बाँके–११, सशस्त्र प्रहरी बलको एपिएफ, नेपाल पुलिस क्लब, त्रिभुवन आर्मी क्लब, कर्णाली प्रदेश फुटबल संघ, सुदूरपश्चिम प्रदेश फुटबल संघ, रौतहट जिल्ला फुटबल संघ र भारतको सिलगुडी फुटबल क्लब सहभागी थिए ।
प्रतियोगिता सुरु हुनु अगाडि अन्तरालका कार्यकारी जयनारायण शाहले स्वागत गर्दै लुम्बिनी कपलाई सफल बनाउन ठूलो टिमको मेहनत रहेकाले यो खेल खेलाडीका लागि अगाडी बढ्न कोशेढुंगा सावित हुने बताए ।
समापन समारोहका प्रमुख अतिथि, लुम्बिनी प्रदेशका सामाजिक विकास मन्त्री जन्मजय तिमिल्सेनाले खेल क्षेत्रले समाजको आमूल परिवर्तन गर्ने बताए ।
निरुलाई सम्मान
बाँके जिल्लाबाट प्रतिनिधित्व गर्दै विभागिय टिम नेपाल पुलिसमा क्याप्टेनको भूमिका निभाइरहेकी निरु थापालाई कार्यक्रममा सम्मान गरिएको छ ।
बाँकेको जानकी गाउँपालिका वडा नम्बर १ शिवपुरी घर भएर देश तथा विदेशमा पहिचान बनाइसकेकी खेलाडी निरुलाई बाँके जिल्ला फुटबल संघले प्रमाणपत्र र नगद रु.२५ हजार सहित सम्मान गरेको हो । निरूलाई लुम्बिनी प्रदेशका सामाजिक विकास मन्त्री तिमिल्सिना, बाँके जिल्ला फुटबल संघका अध्यक्ष भोजराज शाही र अन्तरालका कार्यकारी जयनारायण शाह लगायतले सम्मान गरेका थिए ।
