बाँकेमा विभिन्न कार्यक्रम गरी संविधान दिवस मनाइएको छ । सरकारी तथा विभिन्न संघ, संस्थाले संविधान दिवसको अवसरमा विभिन्न कार्यक्रमहरू आयोजना गरेका छन् ।
संविधान दिवस तथा राष्ट्रिय दिवस २०८१ को अवसरमा विहिबार नेपालगन्जमा मूल समारोह समिति बाँकेले आयोजना गरेको कार्यक्रममा विभिन्न क्षेत्रमा योगदान पुर्याउनेहरूलाई सम्मान गरिएको छ ।
कार्यक्रममा बाँकेका वरिष्ठ साहित्यकारहरू वरिष्ठ कथाकार सनतकुमार रेग्मी, उर्दूका वरिष्ठ शायर अब्दुल लतिफ शोैक, समाजसेवी तथा करिब २० करोडको जग्गादाता जयकेश सिंह, बाँकेमा सबैभन्दा बढी १७६ पटक रक्तदान गर्ने रक्तदाता गोपीलाल बैश्य, महिलाहरूमा सबैभन्दा बढी ६५ पटक रक्तदान गर्ने रक्तदाता सरिता ज्ञवाली, कोभिडको समयदेखि नै भेरी अस्पताल परिसरमा सस्तोमा राम्रो खाना खुवाउँदै आउनुभएका अन्जनी माता रसोईका सञ्चालक जितेन्द्र कुमारसिंह र योगमार्फत मानवसेवा निरन्तर क्रियाशील योग गुरु गिरिराज भट्टराईलाई सम्मान गरिएको हो ।
संविधान दिवसको कार्यक्रममा जिल्ला समन्वय समिति बाँकेका प्रमुख ज्ञानेन्द्रकुमार चौधरी, उच्च अदालत तुलसीपुर नेपालगन्ज इजलासका न्यायाधीश चन्द्रबहादुर सारु, नेपालगन्जका प्रमुख प्रशान्त बिष्ट र संविधान दिवस तथा राष्ट्रिय दिवस २०८१ मूल समारोह समिति बाँकेका संयोजक तथा प्रमुख जिल्ला अधिकारी खगेन्द्र रिजालले सम्मानितहरूलाई सम्मानपत्र प्रदान गरेका थिए ।
संविधान दिवसकै अवसर पारेर आयोजना गरिएको भलिबल प्रतियोगिता र वक्तृत्वकला प्रतियोगितामा विजयी भएकाहरूलाई पनि सोही अवसरमा पुरस्कार र प्रमाणपत्र बितरण गरिएको थियो ।
भलिबल प्रतियोगितामा बाँके जिल्ला भलिबल सङ्घ प्रथम, नेपाली सेना दोस्रो र नेपाल प्रहरीको टोली तेस्रो स्थान पाउन सफल भएका थिए । संविधानको महत्व र आवश्यकता विषयमा आयोजित वक्तृत्वकलामा प्रथम, द्वितीय र तृतीय भएका तीन जना बालक र तीन जना बालिकालाई पनि सोही अवसरमा पुरस्कार र प्रमाणपत्र वितरण गरिएको थियो ।
प्रमुख जिल्ला अधिकारी रिजालको अध्यक्षतामा भएको कार्यक्रममा नेपाली काँग्रेस बाँकेका गोपाल अधिकारी, नेकपा एमालेका मीनबहादुर मल्ल, नेकपा माओवादी केन्द्रका नरेन्द्र पाण्डे, जनता समाजवादी पार्टीका बसन्त कनौजिया, नागरिक समाजका अगुवा कृष्णप्रसाद श्रेष्ठ र वरिष्ठ कानुन व्यवसायी सुनिल श्रेष्ठलगायत अतिथिले पनि संविधानको महत्व बारे आआफ्नो धारणा राखेका थिए ।
संबिधान दिवसको अवसरमा नागरिक उत्सव
संविधान दिवस २०८१ को अवसरमा नेपालगन्जमा नागरिक उत्सव कार्यक्रम आयोजना गरिएको छ । बास नेपालको आयोजनामा आज नेपालगन्जको गणेशमान चौकमा नागरिक उत्सव कार्यक्रम सम्पन्न भएको हो ।
कार्यक्रमलाई सम्बोधन गर्दै प्राध्यापक रुद्र प्रसाद तिमिल्सिनाले बिगतमा जारी भएका संबिधानहरूको चर्चा गर्दै २०७२ असोज ३ गते जारी संबिधानलाई बिश्वकै सर्वाेत्कृष्ठ संबिधान बनाउनका लागि सरकारमा रहेकाहरू ईमान्दार हुनु पर्ने बताए ।
कार्यक्रममा बोल्दै शिक्षाबिद् किरण आचार्यले बाँके बासी सुसिल कोईराला प्रधानमन्त्री भएको बेला जारी भएको संविधानले सबै देशबासीहरूलाई समेटेको बताइन् ।
कार्यक्रममा बोल्दै बरिष्ठ पत्रकार पूर्णलाल चुकेले एउटा तानाशाहलाई फालेर आएको संबिधानमा टेकेर सयौं तानाशाहहरू नजन्मिन दिनका लागि खवरदारी गर्नुपर्ने बताए ।
हरित अभियन्ता हेमन्तराज काफ्लेले नेपालको संबिधान २०७२ बिश्वकै सर्वाेत्कृष्ठ संबिधान भएको उल्लेख गर्दै देशको मुल कानुन संबिधान नमान्नु, संबिधान दिवसलाई कालो दिवस मनाउनु अराजकताको उपज भएको बताए ।
बास नेपालका अभिलेखिकरण अधिकृत रबिन्द्र बोहराले सञ्चालन गरेको कार्यक्रममा बोल्दै बास नेपालका कार्यकारी निर्देशक नमस्कार शाहले नेपाली जनताको त्याग, तपस्या र बलिदानबाट आएको संबिधानले सबै नेपालीहरूको भावना समेटेको बताए ।
त्यस्तै, पूर्णिमा साहित्य प्रतिष्ठान कोहलपुरको रचना वाचन विभागको आयोजनामा कोहलपुर चौराहामा१० औं संविधान दिवस रचना वाचन र दीप प्रज्वलनसहित भव्य रूपमा मनाइएको छ ।
जागरुकताका लागि संविधान बाचन
संविधानका बारेमा सेचतना अभिबृद्धिका लागि संविधान बाचन गरिएको छ । संविधान दिवसको अवसरमा सूचना र मानव अधिकार अनुसन्धान केन्द्र र सार्वजनिक सरोकार कानून व्यवसायी समुह नेपालगन्जको संयुक्त आयोजनामा संविधान बाचन कार्यक्रम गरिएको हो ।
नेपालको संविधान २०७२ मा कुल धारा ३०८, भाग ३५, र अनुसुचि ९ सबै बाचन गरिएको संस्थाका अध्यक्ष अधिबक्ता विश्वजित तिवारीले बताए ।
त्यस अवसरमा स्टेश्नरी व्यवसायी संघ बाँकेका अध्यक्ष सागर ज्ञवालीले ५० थान नेपालको संविधान पुस्तक उपलब्ध गराएका थिए । कार्यक्रममा नेपाली र अवधी भाषामा संविधान बाचन गरिएको थियो ।
