बाँकेमा बढ्दो शितलहरको अवस्थाबाट जनजीवनको प्रभाव न्यूनीकरणका लागि जिल्ला विपद् व्यवस्थापन समितिले आवश्यक रणनीति तयार गरेको छ । त्यसका लागि बिहीबार बसेको विपद् व्यवस्थापन समितिको बैठकले जिल्लामा क्रियाशिल संघ, संस्थाहरूसँग समन्वय गरी आवश्यक रणनीति तयार गरेको हो ।
‘आवश्यकता अनुसार जुनसुकै बेला चिसो तथा शितलहरका सम्भावना कायमै रहेकोले सोको पूर्व तयारी तथा प्रतिकार्यका लागि संघ, संस्थाबाट हुने गतिविधिबारे छलफल भएको छ’, समितिका अध्यक्ष समेत रहेको बाँकेका प्रमुख जिल्ला अधिकारी खगेन्द्र प्रसाद रिजालले भने, ‘त्यसका लागि सबै जिम्मेवार निकाय आवश्यकता अनुसार प्रभावकारी ढंगले परिचालित हुनेछौं ।’
‘परिआउँदा सबै किसिमका सहयोग गर्ने प्रतिबद्धता बैठकमा सहभागी संघ, संस्थाहरूबाट भएको छ’, प्रजिअ रिजालले दैनिक नेपालगन्जसँग भने, ‘शित लहरको जोखिम न्यूनीकरणका लागि वन कार्यालय मार्फत सहुलियत दाउरा वितरणका लागि निर्देशक निर्देशन दिइसकेका छौं ।’
समितिले तयार पारेको शितलहर पूर्व तयारी तथा प्रतिकार्य योजना २०८१ अनुसार जिल्लामा विपद् क्षेत्रमा कार्यरत संघ, संस्थाले सञ्चालन गरेका गतिविधि तथा कार्यक्रमको नियमित रूपमा जिल्ला प्रशासन कार्यालय बाँकेको जिल्ला आपतकालीन कार्यसञ्चालन केन्द्रमा प्रतिवेदन बुझाउने निर्णय पनि गरिएको फोकल पर्सन रूपन ज्ञवालीले जानकारी दिए । फोकल पर्सन ज्ञवालीका अनुसार, बिहीबारको बैठकमा विभिन्न सात बुंदे निर्णय गरिएको छ ।
बैठकमा सहभागी विभिन्न संघ, संस्थाहरूले आफुले सामाजिक क्षेत्रमा गरेका गतिविधिहरू प्रस्तुतिकरण गर्दै विपद् विरुद्धको प्रतिकार्यमा साथ दिने प्रतिबद्धता व्यक्त गरेका थिए । फातिमा फाउण्डेशनका अध्यक्ष मैमुना सिद्धिकी, बि गु्रपका कार्यकारी निर्देशक डम्मर सुनार, बाँके रेडक्रस प्रमुख दोलख डाँगी, बाँके युनेस्को क्लबका साजिद अली सिद्दिकी, सामुदायिक विकास मञ्च बाँकेका घनश्याम उपाध्याय, सेभ द चिल्डे«नका फुलकुमारी चौधरी, फेडो अ अध्यक्ष, कारितास नेपालका अधिकृत ऋषि शर्मा, गैसस बाँकेका सचिव रमेश सिटौला, डब्लु्एफपीका अमिन
गहतराज, बासका रबिन्द्र बोहरा लगायत विभिन्न प्रस्तुति सहित विपद् प्रतिकार्यमा आफ्नो सहभागिता प्रष्ट पारेका थिए ।
बैठकमा नेपाल पत्रकार महासंघ बाँकेका अध्यक्ष नविन गिरीले सरकारी तथा गैर सरकारी संघ, संस्थाहरूले विपद्का क्षेत्रमा गरिरहेका राम्रा अभ्यासहरूलाई सञ्चारमाध्यमले सराहना गरिरहेको बताए । ‘तर, तपाईहरूले जिल्ला स्थित सञ्चारमाध्यमहरूसँगको साझेदारीलाई बलियो बनाउँदै लैजान जरुरी छ’, अध्यक्ष गिरीले सरकारी तथा गैरसरकारी समन्वय बैठकमा भने ।
बैठकको सहजिकरण गरिरहेका जिल्ला विपद् व्यवस्थापन समितिका फोकल पर्सन ज्ञवाली अनुसार, जिल्ला आपतकालीन कार्य सञ्चालन केन्द्रका विभिन्न आठ कलष्टरहरूले आ–आफ्नो कार्य प्रगति प्रस्तुत गरेका थिए । कृषि ज्ञान केन्द्रका वरिष्ठ कृषि अधिकृत मनोज कुमार सिंह, जिल्ला जनस्वास्थ्य कार्यालय बाँकेका फोकल पर्सन नरेश बाबु श्रेष्ठ, जिल्ला शिक्षा समन्वय इकाइका प्रमुख राम सुरेश यादव, खानेपानी तथा सरसफाई कार्यालयका निमित्त प्रमुख प्रकाश जंग शाह, संघीय आयोजनाका इन्जिनियर श्याम बहादुर नेगी लगायतले कलष्टरका तर्फबाट प्रतिनिधि गरेका थिए ।
बैठकको व्यवस्थापन गरिरहेको फातिमा फाउण्डेशनका मनोविमर्शकर्ता सीमा चौधरीले संस्थाद्वारा नेपालगन्ज ३ र ७ मा सञ्चालन गरेको सामुदायिक सुरक्षा जालो परियोजना बारे प्रस्तुति गरेकी थिइन् ।
