नेपालगन्ज भन्सार कार्यालयको राजश्व असुली लक्ष्य पहिलो महिनामै असफल भएको छ । गत बर्ष भन्दा चालु आ.व.का लागि ३ अर्ब बढी राजश्व लक्ष्य घटाएर सोही अनुसार मासिक लक्ष्य निर्धारण भएपनि भन्सार कार्यालयले निर्धारित लक्ष्य चालु आ.व. २०८२/०८३ को पहिलो महिनामै हासिल गर्न नसकेको हो ।
चालु आर्थिक बर्षको साउन महिनाका लागि भन्सार राजश्व असुलीको लक्ष्य १ अर्ब ८६ करोड ६५ लाख ४६ हजार निर्धारण गरिएकोमा असुली भने ७४.१४ प्रतिशत अर्थात् १ अर्ब ३८ करोड ३७ लाख ८४ हजार मात्रै असुली भएको थियो । चालु आ.व. २०८२/०८३ का लागि २४ अर्ब ५४ करोड ५७ लाख ८२ हजार रूपैया बार्षिक भन्सार असुली लक्ष्य निर्धारण भएको छ ।
यसअघि आर्थिक वर्ष २०८१÷८२ मा नेपालगन्ज भन्सारले २० अर्ब बढी राजश्व संकलन गरेपनि लक्ष्य हासिल गर्न सकेको थिएन । भन्सारको तथ्यांक अनुसार, आव २०८०÷८१ मा १८ अर्व १५ करोड ७२ लाख ३३ हजार रुपियाँ मात्रै राजश्व संकलन भएकोमा आ.व. २०८१÷८२ मा त्यसभन्दा दुई अर्ब १२ करोड रुपियाँ बढी अर्थात् २० अर्ब २८ करोड ७२ लाख राजश्व संकलन भएको थियो । आ.व. २०८१÷८२ मा २७ अर्ब १८ करोड ३५ लाख ८९ हजार रूपैयाँ राजश्व संकलन लक्ष्य निर्धारण भएको थियो ।
नेपालगन्जमा एकीकृत जाँच चौकी सञ्चालनमा आएपछि लागत बढेको भन्दै केही मालबाहक ट्रक लगायतका सवारी साधनहरूले नाका परिवर्तन गरेपछि राजश्व सङ्कलन लक्ष्य अनुसार सङ्कलन हुन नसकेको लगायतका विभिन्न कारणले राजश्व लक्ष्य अनुसार सङ्कलन हुन नसकेको भन्सार कार्यालयले जनाएको छ ।
नेपालगन्ज भन्सार कार्यालयमा संकलन हुने राजश्वको करिब ५० प्रतिशत रकम पेट्रोलियम पदार्थको आयातबाट मात्रै हुने गरेको छ । इन्धन, चामल, खाद्यान्न, फलाम लगायतका वस्तुको आयातबाट बढी राजश्व संकलन हुने गरेको भन्सार कार्यालयको तथ्याङ्क छ ।
