नेपाल वन पैदावार उद्योग, व्यवसायी संघ बाँकेको १०औं बार्षिक साधारणसभा तथा सातौं अधिवेशन आज बुधबार नेपालगन्जमा आयोजना हुँदैछ । संघका अध्यक्ष टेक बहादुर पुन मगरका अनुसार अधिवेशनले आगामी कार्यकालका लागि नेतृत्व समेत चयन गर्नेछ ।
‘स्वदेशी उत्पादनको खपत घट्दै जाने तर उत्पादन भने बढ्दै जाने अवस्थाले कारोबार चौपट भएको छ’, अध्यक्ष पुनले यस्तोब अवस्थामा संघमा सदस्यता संख्या समेत घट्दै गएको औंल्याउँदै नयाँ नेतृत्व प्रक्रियालाई सहज र सर्वसम्मत बनाएर लैजान कोशिश गरिएको बताए ।
छैठौं अधिवेशनमा २ सय बढी मतदाता संख्या रहेको संघमा सातौंसम्म आइपुग्दा झण्डै सय जना घटेका छन् । १ सय ३ जना सदस्यले नविकरण गरेको जानकारी दिंदै अध्यक्ष पुनले दैनिक नेपालगन्जसँग भने, ‘नेपाली उत्पादनले बजार नपाउने अवस्थालाई व्यवसायीहरूले धान्न नसक्दा पलायन भैरहेको देखिन्छ ।’ उनका अनुसार, विदेशी काठ निर्बाध आइदिंदा स्वदेशी वन पैदावारले बजार पाउने अवस्था कमजोर हुँदै गएको हो ।
सातौं अधिवेशनका लागि वरिष्ठ उपाध्यक्ष दुर्ग बहादुर राना (राजु), झुकलाल चौधरी वर्तमान कार्यसमितिबाट नेतृत्वमा आउन आकांक्षी देखिएका छन् । तर, पूर्व अध्यक्ष सुरेश चन्द, रविन्द्र लम्साल लगायतका अग्रजहरूले पनि सर्वसम्मत नेतृत्व चयन प्रक्रियाबाट आउन इच्छुक रहेको स्रोतको दाबी छ । ‘संवाद र सहमतिका माध्यमबाट सशक्त नेतृत्व ल्याउनु अहिलेको आवश्यकता हो’, लम्सालले दैनिक नेपालगन्जसँग भने, ‘साथीहरूले जोड गरिरहनु भएको छ, त्यस्तो भयो भने स्वभाविक रूपमा नेतृत्व गर्नुपर्छ भन्ने मेरो मान्यता हो ।’
