गन्तव्यका रूपमा विकास गर्न पाँचबुँदे घोषणा
नरैनापुर क्षेत्रको पर्यटन प्रवद्र्धन र विकासलाई लक्षित गर्दै नरैनापुर घोषणा पत्र जारी गरिएको छ । नेपाल पत्रकार महासंघको आयोजना तथा नरैनापुर गाउँपालिकाको सहयोगमा बुधवार भएको ‘नरैनापुरमा पर्यटन सम्भावना र मिडियाको भूमिका’ विषयक अन्तरक्रिया कार्यक्रममा पाँचबुँदे घोषणा पत्र सार्वजनिक गरिएको हो ।
नेपाल पत्रकार महासंघका अध्यक्ष नवीन गिरी र नरैनापुर गाउँपालिकाका अध्यक्ष मोहम्मद इस्तियाक अहमद शाहले संयुक्त रूपमा घोषणा पत्रमा हस्ताक्षर गर्दै नरैनापुरको स्थानीय पर्यटन प्रवद्र्धनमार्फत आर्थिक विकासमा योगदान गर्ने प्रतिबद्धता व्यक्त गरे ।
घोषणा पत्रअनुसार, स्थानीय बर्फानी बाबाधाम, गोबद्र्धनधाम, सन्तानेश्वर महादेव क्षेत्रलाई धार्मिक पर्यटकीय गन्तव्यका रूपमा प्रवद्र्धन गर्न मिडियामार्फत समाचार, फिचर, रिपोर्ट तथा भिडियो डकुमेन्ट्री निर्माण गरी सहकार्य गर्ने उल्लेख छ ।
त्यस्तै, नरैनापुरको उत्तरी भेगमा रहेको चुरे पहाडलाई पर्यापर्यटनको केन्द्रका रूपमा विकास गर्न गाउँपालिकाले अघि सारेको पदयात्रा (हाइकिङ) सम्बन्धी नीति तथा योजनाको प्रचार–प्रसारमा सहकार्य गर्ने प्रतिवद्धता जनाइएको छ । नरैनापुरका सामुदायिक वनलाई जडीबुटी पकेट क्षेत्र तथा वनभोज स्थलका रूपमा विकासको योजना गरेको नरैनापुरले कुनैबेला ‘बाँकेको कर्णाली’ भनेर चिनिने नरैनापुरलाई अहिलेको अन्न भण्डारको पहिचानसहित कृषि उपजमा आधारित पर्यटकीय गन्तव्यका रूपमा विकास गर्न प्रदेश र संघीय सरकारलाई संयुक्त रूपमा दबाब दिने योजना घोषणापत्रमा उल्लेख गरेको छ ।
बुधवार आयोजित अन्तरक्रिया कार्यक्रममा नरैनापुर गाउँपालिका अध्यक्ष इस्तियाक अहमद शाहले पर्यटन आफ्नो प्राथमिकता हुने बताएका छन् । स्थानीय सरकारको नेतृत्व सम्हालेपछि धार्मिक तथा पर्यटकीय क्षेत्रको विकासमा निरन्तर पहल गर्दै आएको धारणा राख्दै उनले सन्तानेश्वर मन्दिर र बर्फानी बाबा आश्रमजस्ता धार्मिक स्थलको विकासमा गाउँपालिकाले उल्लेखनीय काम गरेको बताए ।
गाउँपालिकाका प्रमुख प्रशासकीय अधिकृत नवराज ओलीले नरैनापुर प्राकृतिक विविधताले भरिपूर्ण क्षेत्र भएकाले यहाँ आउने पर्यटकले धार्मिक, प्राकृतिक, कृषि तथा पर्यापर्यटनको अनुभव एकैसाथ लिन सक्ने बताए ।
कार्यक्रममा, नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाईंले नरैनापुरको पर्यटन प्रवद्र्धनमा सञ्चार क्षेत्रको भूमिका प्रशंसनीय रहेको उल्लेख गर्दै आगामी दिनमा पनि स्थानीय सरकार र सञ्चार माध्यमबीच सहकार्य आवश्यक रहेको बताए ।
नेपाल पत्रकार महासंघ बाँकेका अध्यक्ष नवीन गिरीले नरैनापुरलाई पर्यटनको ‘भर्जिन ल्याण्ड’ को संज्ञा दिँदै मिडियाको सक्रिय भूमिकाले नरैनापुरलाई सम्भावनायुक्त पर्यटकीय गन्तव्यका रूपमा स्थापित गर्न सकिने विश्वास व्यक्त गरे ।
कार्यक्रममा पत्रकार अर्जुन ओलीले नरैनापुर धार्मिक, प्राकृतिक, सांस्कृतिक, ग्रामीण तथा कृषि पर्यटनको दृष्टिले अत्यन्त सम्भावनायुक्त क्षेत्र भएको आधारपत्र प्रस्तुत गरे । पर्याप्त प्रचार–प्रसारको अभावले सम्भावना पूर्ण रूपमा उजागर हुन नसकेको निष्कर्ष निकाल्दै आधारपत्रमा डिजिटल मिडियाको प्रयोग, सकारात्मक छवि निर्माण र स्थानीय सरकारको सक्रिय भूमिकामा जोड दिइएको छ ।
नरैनापुरको पर्यटन प्रवद्र्धनमा मिडियाको सशक्त सहभागितासँगै पाँचबुँदे घोषणा पत्र कार्यान्वयनमा आएमा यस क्षेत्र पर्यटनको नयाँ गन्तव्यका रूपमा स्थापित हुने अपेक्षा गरिएको घोषणापत्रका मस्यौदाकार पत्रकार शंकरप्रसाद खनालले बताए । कार्यक्रमको सहजीकरण महासंघका सचिव कृष्ण ओलीले गरेको थिए ।
