निर्वाचनलाई स्वतन्त्र, निष्पक्ष र पारदर्शी बनाउन सञ्चारमाध्यमले आचारसंहिता पालनामा अझ संवेदनशील र जिम्मेवार भूमिका निर्वाह गर्नुपर्नेमा सरोकारवालाहरूले जोड दिएका छन् ।राष्ट्रिय समाचार समिति (रासस) को ६५औँ वार्षिकोत्सवको अवसरमा रासस नेपालगन्ज कार्यालयले मंगलवार आयोजना गरेको ‘निर्वाचन आचारसंहितामा सञ्चार’ विषयक अन्तरक्रिया कार्यक्रममा वक्ताहरूले निर्वाचन प्रक्रियाको विश्वसनीयता जोगाउन सञ्चारक्षेत्रको भूमिका निर्णायक हुने बताएका हुन् । कार्यक्रमका प्रमुख अतिथि, बाँकेका सहायक प्रमुख जिल्ला अधिकारी महेशकुमार गुरुङले निर्वाचन आचारसंहिता उम्मेदवारदेखि मतदातासम्म सबैले पालना गर्नुपर्ने दायित्व भएको उल्लेख गर्दै सञ्चारमाध्यमले झनै सचेत र सन्तुलित भूमिका खेल्नुपर्ने बताए । ‘बाँकेमा हालसम्म सञ्चारमाध्यमलगायत सबै पक्षबाट आचारसंहिता पालनाको अवस्था सन्तोषजनक छ,’ उनले भने, ‘आगामी दिनमा पनि यही जिम्मेवारीबोध कायम रहने अपेक्षा छ ।’ गुरुङले राससले वार्षिकोत्सवका अवसरमा निर्वाचन आचारसंहिताजस्तो संवेदनशील विषयमा संवादको वातावरण सिर्जना गर्नु सकारात्मक पहल भएको उल्लेख गरे । कार्यक्रममा नेपाल पत्रकार महासंघ लुम्बिनी प्रदेश समितिका अध्यक्ष शुक्रऋषि चौलागाईले निर्वाचन आचारसंहिता पालनामा सञ्चारकर्मी र सञ्चारसंस्था दुवै उत्तिकै उत्तरदायी हुनुपर्ने बताए । महासंघले निर्वाचन अवधिभर पत्रकारहरूलाई आवश्यक निर्देशन र मार्गदर्शन दिँदै आएको जानकारी उनले दिए । नेपाल पत्रकार महासंघ बाँकेका अध्यक्ष नवीन गिरीले निर्वाचन आचारसंहिता लोकतान्त्रिक अभ्यासको महत्वपूर्ण आधार भएको उल्लेख गर्दै मिडियाले कुनै दल वा स्वार्थसमूहको प्रभावमा नपरी निष्पक्ष सूचना प्रवाह गर्नुपर्ने धारणा राखे । ‘कसैले गल्ती गर्दा प्रश्न उठाउने पत्रकार स्वयं आचारसंहिताप्रति संवेदनशील हुनुपर्छ,’ उनले भने, ‘निर्वाचनमा मिडियालाई प्रयोग गरेर समाजलाई दिग्भ्रमित गर्ने प्रयास स्वीकार्य हुन सक्दैन ।’ नेपालगन्जका नागरिक अगुवा प्रकाश उपाध्यायले निर्वाचनलाई भयरहित, स्वतन्त्र र निष्पक्ष बनाउन आचारसंहिता अनिवार्य तत्व भएको उल्लेख गर्दै सञ्चारमाध्यमले सत्य, सन्तुलित र तथ्यपरक सूचना सम्प्रेषण गर्नुपर्नेमा जोड दिए । कार्यक्रमको अध्यक्षता गरिरहेका रासस नेपालगन्ज कार्यालय प्रमुख युवराज पाण्डेले निर्वाचनलाई पारदर्शी र विश्वसनीय बनाउन सञ्चारमाध्यमको भूमिका प्रभावकारी हुने विश्वास व्यक्त गर्दै स्थापना दिवसको सन्दर्भ पारेर सो विषयमा संवाद कार्यक्रम आयोजना गरिएको स्पष्ट पारे । अन्तरक्रियामा सहभागीहरूले निर्वाचन अवधिमा तथ्यहीन प्रचार, पक्षपातपूर्ण सामग्री र दिग्भ्रमित गर्ने सूचना रोक्न सञ्चारमाध्यम स्वयंले आत्मनियमनको अभ्यास बलियो बनाउनुपर्ने आवश्यकता औँल्याएका थिए । रासस संवाददाता भेषराज बस्नेतले सहजीकरण गरेको अन्तरसंवादका सहभागीहरुलाई स्वागत मन्तव्य राख्दै संवाददाता राकेश मिश्रले राससका उपलब्धी र योगदानबारे चर्चा गरे ।
