आचारसंहिता अनुगमन, कडाई गरिंदै

निर्वाचन आयोगले आचारसंहिता अनुगमनका लागि जिल्ला स्तरमा गठन गरेको, आचारसंहिता अनुगमन जिल्ला समितिको टोलीले बुधबार तीन वटै निर्वाचन क्षेत्र अनुगमन गरेको छ । त्यसक्रममा आचारसंहिता विपरितका क्रियाकलाप विरुद्ध तत्काल हस्तक्षेप गरेको टोलीले ‘सम्बद्धलाई नै त्यस विपरितका कार्य हटाउन’ निर्देशन दिएको हो । आचारसंहिता अनुगमन जिल्ला समितिका संयोजक समेत रहेका बाँकेका सहायक प्रमुख जिल्ला अधिकारी पूर्ण बहादुर खत्रीका अनुसार, आचारसंहिता विपरितका कार्य रोक्न तत्कालै प्रहरी परिचालन गरिएको छ । ‘अटो रिक्सा, इरिक्सामा पार्टीका झण्डा तथा उम्मेदवारका फ्ल्याक्स टाँगिएका भेटिएपछि जिल्लाभर सबै सवारीामा राखिएका त्यस्ता सामाग्री हटाउने व्यवस्था मिलाउन निर्देशन गरिएको छ’, अनुगमन अधिकृत खत्रीले दैनिक नेपालगन्जसँग भने । अनुगमनका क्रममा तीन वटै क्षेत्रका निर्वाचन प्रहरी कमाण्डसँग पनि आचारसंहिता अनुगमन समितिले छलफल गरेको सहायक प्रजिअ खत्रीले जानकारी दिए । उनका अनुसार, विभिन्न आचारसंहिता उल्लंघन गर्नेहरूको उजुरी आउने क्रम पनि जारी छ । ‘सकेसम्म सम्बन्धितलाई नै सच्याउन आग्रह गर्ने गरेका छौं’, अटेरी गरेपछि तत्काल प्रहरी लगाएर आचारसंहिता विपरितका कार्यहरू रोक्ने गरेको जानकारी दिंदै सहायक प्रजिअ खत्रीले भने । विभिन्न ठाउँमा लगाइएका तुल, ब्यानर हटाउन लगाइएको छ भने पोष्टर, फ्ल्याक्स च्यातिएको छ । त्यसक्रममा माइकिङ्ग गर्ने कतिपय उम्मेदवारलाई माइक हटाउन र अटो, इरिक्साबाट झण्डा पोष्टर निकाल्न निर्देशन दिइएको छ । ‘आचारसंहिताको पालना नै स्वच्छ निर्वाचनको सुनिश्चितता हो’, निर्वाचन अनुगमन संयोजक खत्रीले सबै दल र उम्मेदवारलाई पालनालाई प्रतिबद्ध हुन पटकपटक आव्हान गरिएको जानकारी दिंदै भने ।