श्रवण तथा बोलाइसम्बन्धी समस्याको विशेषज्ञ सेवा प्रदान गर्दै आएको नेपाल हियरिङ एण्ड स्पीच क्लिनिक प्रा.लि. ले नेपालगन्जमा आफ्नो नयाँ शाखा सञ्चालनमा ल्याउन भएको छ ।
क्लिनिकका अध्यक्ष पुरुषोत्तम भुर्तेलका अनुसार, आज शनिवार नेपालगन्ज उप–महानगरपालिकाका नगर प्रमुख प्रशान्त बिष्टले नयाँ शाखाको उद्घाटन गर्ने भएका हुन् ।
विगत १५ वर्षदेखि श्रवण तथा स्पीच स्वास्थ्य सेवामा सक्रिय रहँदै आएको क्लिनिकले नेपालगन्जसँगै विराटनगरमा पनि शाखा सञ्चालन गर्दै आएको जनाएको छ । यसका अतिरिक्त बीपी आई फाउन्डेसन थिमी, आरुस लाइफस्टाइल अस्पताल पुल्चोक र बी एन्ड बी अस्पताल ग्वार्को लगायतका अस्पतालहरूमा अडियोलोजी सेवा उपलब्ध गराउँदै आएको अध्यक्ष भुर्तेलले बताए ।
‘हियरिङ टेस्ट, हियरिङ एड ट्रायल तथा फिटिङ, स्पीच थेरापी तथा कोक्लियर इम्प्लान्टसम्बन्धी परामर्श सेवा प्राप्त गर्न सक्ने’ क्लिनिकले जनाएको छ । आधुनिक उपकरण र दक्ष प्राविधिक टोलीमार्फत श्रवण तथा बोलाइसम्बन्धी समस्या भएका व्यक्तिहरूलाई प्रभावकारी उपचार तथा परामर्श प्रदान गरिने बताइएको छ।
क्लिनिकका अध्यक्ष भुर्तेलले नेपालगन्जमा शाखा विस्तारसँगै लुम्बिनी र सुदूरपश्चिम क्षेत्रका सेवाग्राहीहरूलाई गुणस्तरीय श्रवण तथा स्पीच सेवा सहज रूपमा उपलब्ध हुने विश्वास व्यक्त गरे ।
‘श्रवण वा बोलाइसम्बन्धी समस्या भएका व्यक्तिहरूका लागि नेपाल हियरिङ एण्ड स्पीच क्लिनिकको नेपालगन्ज शाखा विशेषज्ञ सेवा प्राप्त गर्ने विश्वासिलो केन्द्र बन्ने अपेक्षा गरिएको छ,’ अध्यक्ष भुर्तेलले दैनिक नेपालगन्जसँग भने ।