प्रसिद्ध जैन धर्मगुरु डा. श्री सतीश मुनि जी म.सा. (सत्य) सहित ‘ठाणा–४’ को टोली विहीवार भारतको रुपैडिहा नाका हुँदै पदयात्रामा नेपालगन्ज आइपुगेको छ ।
पदयात्रामा नेपाल प्रवेश गरेको जैन धर्मगुरु डा. श्री सतीश मुनि जीको टोलीलाई स्वागत गर्न जैन समाज, नेपालगन्जका अध्यक्ष प्रदीपकुमार छाजेड, रिद्धकरण सिन्धीसहितका सामाजिक अगुवाहरु सिमामा पुगेका थिए ।
‘जैन समाज, नेपालगन्जको आयोजनामा उहाँहरूको दुईदिने प्रवास सुरु भएको छ,’ धर्मशालामा प्रवचन र दर्शन कार्यक्रम राखिएको जानकारी दिंदै समाजका अध्यक्ष उद्योगपति छाजेडले भने ।
बिहीबार बिहान १०ः३० बजे किन्नूराम काशीराम कसौधन वैश्य पंचायती धर्मशालामा गुरुजनको मंगलमय प्रवेशसँगै धार्मिक कार्यक्रम सुरु गरिएको जानकारी दिंदै छाजेडले दैनिक नेपालगन्जसँग भने, ‘कार्यक्रममा श्रद्धालुहरूलाई गुरुजनोंको दर्शन तथा प्रवचन सुन्ने अवसर प्रदान गरिएको छ ।’
प्रवास अवधिभर धर्मशालामा नियमित रूपमा प्रवचन, ध्यान तथा धार्मिक गतिविधि सञ्चालन हुने जनाइएको छ । आयोजकका अनुसार, यसले स्थानीय जैन समुदायमा धार्मिक जागरण र आध्यात्मिक ऊर्जा थप्ने विश्वास गरिएको छ ।
‘जैन समाजले सबै श्रद्धालुहरूलाई आफ्नो समय निकालेर परिवारसहित धर्मशालामा उपस्थित भई गुरुजनोंको वाणी सुन्न तथा सेवा–लाभ लिन आग्रह गरेको छ,’ अध्यक्ष छाजेडले भनेका छन् ।
प्रसिद्ध शक्तिपीठ वागेश्वरी पुन्यभूमि नेपालगन्जमा जैन गुरुहरूको आगमनले धार्मिक माहोल थप सशक्त बनेको छ । श्रद्धालुहरूलाई आध्यात्मिक मार्गदर्शन प्राप्त गर्ने महत्वपूर्ण अवसरका रूपमा यो कार्यक्रमलाई हेरिएको छ ।
