नेकपा एमालेले लामो समयदेखि रोकिएको केन्द्रीय नेताहरूको कार्यविभाजन टुंग्याएको छ । पार्टी सचिवालय बैठकको निर्णयअनुसार, बाँकेबाट केन्द्रीय सदस्य निर्वाचित सुर्य ढकाल भूमि व्यवस्था विभागको जिम्मेवारीमा पुगेका छन् । अर्की केन्द्रीय सदस्य शान्ति ढकालले बाँके जिल्ला इञ्चार्जको जिम्मेवारीमा दोहोरिएका छन् ।
केन्द्रीय सदस्य निरज आचार्यलाई प्रचार तथा प्रकाशन विभाग प्रमुखको जिम्मेवारी दिइएको छ भने प्रेस चौतारी नेपालको इञ्चार्जमा केन्द्रीय सदस्य रामकुमारी झाँक्रीलाई तोकिएको छ ।
जेठ ४ गतेदेखि सुरु भएर १० गते सम्पन्न भएको सचिवालय बैठकले नेताहरूको जिम्मेवारी बाँडफाँट गरेको हो । शुक्रबार जारी गरिएको ४६ पृष्ठको अन्तर पार्टी निर्देशन अपानिमा ३ सय १ जना केन्द्रीय नेताको जिम्मेवारी उल्लेख गरिएको छ ।
प्रचार विभागको जिम्मेवारी पाएका निरज आचार्य यसअघि निर्वाचन विभाग प्रमुख थिए । उनी युवा संघका पूर्वमहासचिवसमेत हुन् । युवा संघको नेतृत्व चयनका क्रममा उनले महेश बस्नेतसँग अध्यक्ष पदका लागि प्रतिस्पर्धा गरेका थिए ।
प्रेस चौतारी नेपालको इञ्चार्ज बनाइएकी रामकुमारी झाँक्री विद्यार्थी राजनीतिबाट उदाएकी नेतृ हुन् । अनेरास्ववियुको पहिलो महिला अध्यक्ष बनेर उनले इतिहास रचेकी थिइन् । उनी राष्ट्रियसभा सदस्यसमेत हुन् ।
एमालेको मंसिरमा सम्पन्न ११ औं महाधिवेशनपछि नेताहरूको कार्यविभाजन हुन बाँकी थियो । शुक्रबार सार्वजनिक अपानिअनुसार, ठाकुरप्रसाद गैरेलाई भौतिक पूर्वाधार तथा यातायात व्यवस्था विभाग प्रमुखको जिम्मेवारी दिइएको छ । देवेन्द्र दाहाललाई निर्वाचन विभाग प्रमुख बनाइएको छ ।
त्यस्तै, पार्वती रावल शिक्षा तथा मानवस्रोत विभाग प्रमुख बनेकी छन् । प्रदीप ज्ञवालीलाई विदेश मामला विभाग प्रमुखको जिम्मेवारी दिइएको छ । बिनाकुमार श्रेष्ठ पुस्तकालय तथा अभिलेख विभाग प्रमुख बनेका छन् भने भारती पाठकलाई वन तथा वातावरण विभागको नेतृत्व दिइएको छ ।
डा. भीष्म अधिकारीलाई वित्त तथा कोष व्यवस्थापन विभाग प्रमुख बनाइएको छ । रचना खड्काले श्रम तथा रोजगार विभागको जिम्मेवारी पाएकी छन् । रमेश बडाल कानुन विभाग प्रमुख तोकिएका छन् ।
राजेन्द्रप्रसाद गौतमलाई स्थानीय विकास विभाग प्रमुख बनाइएको छ । डा. विन्दा पाण्डेलाई अर्थ तथा योजना विभाग प्रमुखको जिम्मेवारी दिइएको छ । डा. वीरेन्द्रराज शर्मा पोखरेल सामाजिक सुरक्षा तथा समाज कल्याण विभाग प्रमुख बनेका छन् ।
एमालेले शेरबहादुर तामाङलाई सहरी विकास विभाग प्रमुखको जिम्मेवारी दिएको छ । सुशीला नेपाल उपभोक्ता हित संरक्षण तथा सुशासन विभाग प्रमुख बनेकी छन् । हेमराज राईलाई कला तथा संस्कृति विभाग प्रमुखको जिम्मेवारी दिइएको छ भने सूर्य ढकाललाई भूमि व्यवस्था विभाग प्रमुख बनाइएको छ ।
पार्टीभित्र लामो समयदेखि प्रतीक्षामा रहेको कार्यविभाजन टुंगिएसँगै एमालेले अब संगठनात्मक कामलाई थप सक्रिय बनाउने तयारी गरेको नेताहरूले बताएका छन् । सचिवालय बैठकले विभागीय कामलाई प्रभावकारी बनाउन जिम्मेवारी बाँडफाँट गरिएको निष्कर्ष निकालेको एमाले स्रोतले जनाएको छ ।