कर्णाली प्रदेशमा समुदायस्तरमै मानसिक स्वास्थ्य सेवा र सचेतना विस्तार गर्ने उद्देश्यसहित ‘कर्णाली मानसिक स्वास्थ्य कार्यक्रम’ सञ्चालनमा ल्याइएको छ ।
मानसिक स्वास्थ्य तथा मनोसामाजिक रणनीति र कार्ययोजनाको प्रभावकारी कार्यान्वयनमा सहयोग पुग्ने गरी कार्यक्रम सञ्चालनमा ल्याइएको बताइएको छ । कार्यक्रममार्फत समुदायमा आधारित मानसिक स्वास्थ्य प्रवद्र्धन, मनोसामाजिक सहयोग तथा स्थानीय तहसँग सहकार्य गरेर सेवा विस्तार गरिने जनाइएको छ ।
कार्यक्रम संयोजक दिपक आचार्यका अनुसार, कर्णाली प्रदेशका १३ स्थानीय तह र सामाजिक विकास मन्त्रालयसँगको साझेदारी तथा समन्वयमा कार्यक्रम सञ्चालन हुनेछ । उनले समुदायमै मानसिक स्वास्थ्यसम्बन्धी पहुँच विस्तार गर्न कार्यक्रमले महत्वपूर्ण भूमिका खेल्ने बताए ।
‘मानसिक स्वास्थ्य तथा मनोसामाजिक रणनीति कार्यान्वयनमा सहयोग पुग्ने गरी कार्यक्रम अघि बढाइएको हो,’ आचार्यले भने, ‘स्थानीय तह र सरोकारवाला निकायसँग सहकार्य गरेर समुदायमा आधारित सेवा विस्तार गरिन्छ ।’
कर्णाली प्रदेश सामाजिक विकास मन्त्रालयको समन्वयमा सञ्चालन हुने कार्यक्रमको शुभारम्भ सामाजिक विकास मन्त्री घनश्याम भण्डारीले हालै एक कार्यक्रमबीच गरेका हुन् ।
कार्यक्रममा सहभागी वक्ताहरूले मानसिक स्वास्थ्यलाई प्राथमिकतामा राखेर सामूहिक प्रयास आवश्यक रहेको बताएका थिए । सीएमसी नेपालका कार्यकारी निर्देशक राम लाल श्रेष्ठले मानसिक स्वास्थ्यको क्षेत्रमा सरकारी तथा गैरसरकारी निकायबीच समन्वय अझ प्रभावकारी हुनुपर्ने धारणा राखे ।
त्यसैगरी नीति तथा सुशासन प्रमुख हिमाल गैरेले समुदायमै मानसिक स्वास्थ्य सेवा विस्तार गर्न स्थानीय तहको सक्रियता महत्वपूर्ण हुने बताए । सीविएम ग्लोबलका कार्यक्रम व्यवस्थापक राजेश मरासिनीले कार्यक्रम प्रभावकारी रूपमा कार्यान्वयन गर्न सबै पक्षबीच सहकार्य आवश्यक रहेको उल्लेख गरे ।
कार्यक्रम अधिकृत पार्वती आचार्यले मानसिक स्वास्थ्यसम्बन्धी चेतना अभिवृद्धि, मनोसामाजिक सहयोग तथा समुदायमा सहज पहुँच विस्तारमा कार्यक्रम केन्द्रित रहने जानकारी दिइन् ।
शुभारम्भ कार्यक्रममा बोल्दै मन्त्री घनश्याम भण्डारीले मानसिक स्वास्थ्यलाई समाजले लामो समयदेखि बेवास्ता गरेको उल्लेख गर्दै अब समुदायस्तरमै सेवा र सचेतना पु¥याउनुपर्ने बताए । उनले मानसिक स्वास्थ्यका क्षेत्रमा प्रदेश सरकारले आवश्यक सहकार्य र समन्वयलाई प्राथमिकता दिने प्रतिबद्धता जनाए ।
कार्यक्रममा सहभागीहरूले मानसिक स्वास्थ्यलाई सार्वजनिक स्वास्थ्यको महत्वपूर्ण विषयका रूपमा स्थापित गर्न सरकारी निकाय, स्थानीय तह, विकास साझेदार र समुदायबीच साझा सहकार्य आवश्यक रहेको धारणा राखेका थिए ।