फकाउँदै अध्यक्ष लिङ्देन, असन्तुष्ट ज्ञानेन्द्र शाही
राष्ट्रिय प्रजातन्त्र पार्टीभित्रको विवाद झन् चर्किएको छ । महामन्त्री पदसहित पार्टी छाडेर नयाँ राष्ट्रवादी शक्ति निर्माण अभियानमा लागेका डा. धवलशमशेर राणाले अध्यक्ष राजेन्द्र लिङ्देनमाथि सीधा प्रहार गरेपछि राप्रपाको आन्तरिक संघर्ष सार्वजनिक रूपमा सतहमा आएको हो ।
बुधबार अपिल जारी गर्दै डा. राणाले राप्रपाले वैधानिक आधार गुमाइसकेको दाबी गरेका छन् । उनले अध्यक्ष लिङ्देनले जारी गरेको विज्ञप्तिलाई ‘भ्रमपूर्ण शब्दजाल’ भन्दै त्यसमा नअल्झिन नेता–कार्यकर्तालाई आग्रह गरेका छन् । ‘अध्यक्षको भ्रमपूर्ण विज्ञप्तिको शब्दजालमा नपरी आउनुहोस्,’ जबराले भनेका छन्, ‘निस्वार्थ भावले एक प्रजातान्त्रिक र लक्षमा पुग्ने बाटो निर्माण गरौं ।’
डा. राणाले अब पुरानो संरचनाबाट राष्ट्रवादी मूल्य र मान्यता स्थापित हुने सम्भावना कमजोर भइसकेको दाबी गरेका छन् । ‘त्यही मार्गबाट हाम्रा मूल्य र मान्यता स्थापित हुने सम्भावना क्षीण भएका कारण अब सम्पूर्ण राष्ट्रवादी मन तथा शक्तिहरुको आपसी मेल र एकताबाट नयाँ राष्ट्रवादी शक्तिको निर्माण अभियानमा जुट्न सम्पूर्ण राष्ट्रवादी समूह, पार्टी शक्ति, अभियान तथा व्यक्ति महानुभावहरूमा हार्दिक अपिल गर्दछु,’ उनले बुधवार जारी विज्ञप्तिमा उल्लेख गरेका छन् ।
डा. राणाले पार्टीको केन्द्रीय कार्यसमितिको थप गरिएको समयसीमा समेत सकिएकाले राप्रपाले वैधानिकता गुमाएको जिकिर गरेका छन् । उनका अनुसार, एकता महाधिवेशनबाट निर्वाचित केन्द्रीय कार्यसमितिको नियमित कार्यकाल गत मंसिरमै सकिएको थियो । पछि ६ महिना थप गरिएको भए पनि त्यो अवधि पनि जेठ १९ गते समाप्त भइसकेको उनको दाबी छ ।
‘महाधिवेशन सुझाव समितिले गत निर्वाचनलाई मध्यनजर गरी निर्वाचन ढिलो भए मंसिरमा र छिटो भए यही जेठ महिनाभित्र महाधिवेशन सम्पन्न गर्न सुझाव दिएको थियो,’ डा. रााणाले भनेका छन्, ‘केन्द्रीय कार्यसमितिले थप गरेको उक्त अतिरिक्त ६ महिनाको अवधि पनि हिजो जेठ १९ गते समाप्त भएको छ । पार्टीले वैधानिकता गुमाएको छ ।’
उनले पार्टी नेतृत्वले आफूले दिएका सुझाव र निर्णय कार्यान्वयन नगरेको आरोप समेत लगाएका छन् । ‘दर्जनौं पटक औपचारिक तथा अनौपचारिक बैठकहरूमा त्यस सम्बन्धमा दिइएका सुझाव र सल्लाह कहिल्यै स्वीकार नगर्ने तथा निर्णय भए पनि कार्यान्वयन नगर्ने पुरानै प्रवृत्तिलाई ढाकछोप गर्न मलाई अधिवेशनको तालिका तयार पार्ने जिम्मा दिइएको र जिम्मेवारीबाट पन्छिएको भन्ने प्रकारको दुष्प्रचारपूर्ण अभिव्यक्ति अध्यक्षबाट आउनु हास्यास्पद हो,’ उनले भनेका छन् ।
उनले आफ्ना कमजोरी अरूमाथि थोपरेर चोखो बन्न खोज्ने शैली गैरजिम्मेवार भएको टिप्पणी पनि गरेका छन् । नेतृत्वकै कार्यशैलीका कारण पार्टी चुनावमा मात्र होइन, वैचारिक रूपमा पनि कमजोर बनेको र जनताबाट तिरस्कृत हुने अवस्थामा पुगेको उनको आरोप छ ।
राप्रपाभित्र महाधिवेशनको विषय लामो समयदेखि विवादको केन्द्रमा रहेको छ । त्यही विवादका बीच राणाले जेठ १७ गते नयाँ अभियान घोषणा गरेका थिए । उनी अहिले २०८१ चैत १५ को राजावादी आन्दोलनका कमाण्डर दुर्गा प्रसाईंसँग मिलेर नयाँ ‘कडा राजावादी’ दल गठनको तयारीमा रहेको उनीनिकट नेताहरू बताउँछन् ।
यसअघि अध्यक्ष राजेन्द्र लिङ्देनले धवलशमशेरलाई पार्टी नछाड्न आग्रह गर्दै अपिल जारी गरेका थिए । मंगलबार सार्वजनिक अपिलमा उनले जबराको बहिर्गमनप्रति आश्चर्य व्यक्त गरेका थिए ।
‘पार्टी पूर्ण रूपमा महाधिवेशनतर्फ उन्मुख भइसकेको अवस्थामा अप्रत्यासित रूपमा धवलशमशेर राणाको पार्टीबाट बहिर्गमनको समाचारले आश्चर्यचकित भएको छु,’ लिङ्देनले भनेका थिए, ‘पार्टीका पूर्वअध्यक्षहरूको आह्वान, नेता कार्यकर्ता र आम शुभेच्छुकहरूको भावनाको सम्मान गर्दै म धवलशमशेर राणालाई आफ्नो निर्णय फिर्ता लिन र महाधिवेशन प्रक्रियामा सामेल हुन आग्रह गर्दछु ।’
लिङ्देनले जेठ २८ र २९ गते केन्द्रीय समिति बैठक बस्ने र महाधिवेशनको कार्यतालिका सार्वजनिक गरिने पनि बताएका थिए । साथै उनले पार्टीका सबै तहका नेता–कार्यकर्तालाई एकताबद्ध भएर महाधिवेशनको तयारीमा जुट्न आग्रह गरेका थिए ।
तर, डा. राणाले भने त्यसलाई पार्टीभित्रको वास्तविक संकट ढाकछोप गर्ने प्रयासका रूपमा चित्रण गरेका छन् । उनका अनुसार सयौं नेता तथा कार्यकर्ता पार्टी छाडेर अन्यत्र गइसकेका छन् र पार्टी ‘मक्किएको घर’ जस्तै अवस्थामा पुगेको छ ।
राप्रपाभित्रको यही तनावबीच युवा नेता ज्ञानेन्द्र शाहीले पनि शीर्ष नेतृत्वको कार्यशैलीप्रति सार्वजनिक असन्तुष्टि जनाएका छन् । सामाजिक सञ्जालमार्फत उनले नेताहरूको व्यक्तिगत अहंकार र आन्तरिक खिचातानीमाथि कडा टिप्पणी गरेका हुन् ।
शाहीले नेताहरूको ‘जुँगाको लडाइँ’ले कार्यकर्ता र युवामा निराशा बढाएको उल्लेख गरेका छन् । ‘अहिले फुट्ने होइन, एकजुट भएर अगाडि बढ्ने समय हो,’ उनले भनेका छन् ।
देशभर हार बेहोर्दा पनि नेतृत्व नछाड्ने र अर्कोतर्फ चुनाव नै नलडी नेतृत्व कब्जा गर्न खोज्ने प्रवृत्तिप्रति उनले आक्रोश व्यक्त गरेका छन् । पदका लागि भइरहेको हानाथाप र अहंकारले संगठन कमजोर बन्दै गएको उनको भनाइ छ ।
‘एउटाले नाटक गरेर विज्ञप्ति निकाल्छन्,’ शाहीले लेखेका छन्, ‘अर्कोले भेला गर्दै फुटेर जाने संकेत देखाउँछन् ।’
उनले शीर्ष नेताहरूलाई सार्वजनिक बहसमा आउन चुनौती समेत दिएका छन् । ‘हिम्मत भए आफूसहित तीनै जना बसेर खुला छलफल र बहस गरौं,’ उनले भनेका छन् ।
शाहीले नेताहरूको ‘खुरापाती राजनीति’ देखेर कार्यकर्ता मात्र होइन, ‘भगवान पनि वाक्क भइसकेको’ टिप्पणी गरेका छन् ।
राप्रपाभित्र महाधिवेशन, नेतृत्व र नयाँ शक्ति निर्माणको विषयलाई लिएर चर्किएको विवादले आगामी दिनमा पार्टीभित्र थप ध्रुवीकरण बढ्ने संकेत देखिएको छ ।