जापानको आइची–नागोयामा सन् २०२६ मा आयोजना हुने २० औँ एसियाली खेलकुदका लागि व्यक्तिगत पुम्से पुरुष यू–३० तर्फ बाँकेका तेक्वान्दो खेलाडी युवराज राना वाइल्ड कार्डमार्फत छनोट भएका छन्।
कोहलपुर नगरपालिका–११ निवासी रानाले एसियाली खेलकुदमा नेपालको प्रतिनिधित्व गर्ने अवसर प्राप्त गरेसँगै बाँके जिल्ला तथा नेपाली तेक्वान्दो समुदायमा खुसीको वातावरण छाएको छ। लामो समयदेखि तेक्वान्दो खेलमा निरन्तर मेहनत, अनुशासन र समर्पणका साथ प्रशिक्षणरत रानाको यो उपलब्धिलाई नेपाली तेक्वान्दो क्षेत्रको महत्वपूर्ण सफलताका रूपमा हेरिएको छ।
जिल्ला तेक्वान्दो संघ बाँकेका अध्यक्ष प्रकाश लामिछानेले रानाको छनोटले जिल्लाको तेक्वान्दो विकासमा नयाँ ऊर्जा थपेको बताउनुभयो। उहाँले युवराजको सफलता व्यक्तिगत उपलब्धिमा मात्र सीमित नभई जिल्लाका सम्पूर्ण खेलाडीहरूका लागि प्रेरणाको स्रोत बनेको उल्लेख गर्नुभयो।
“युवराजको यो उपलब्धिले अन्तर्राष्ट्रिय स्तरमा प्रतिस्पर्धा गर्ने सपना बोकेका युवा खेलाडीहरूलाई थप उत्साहित बनाएको छ,” अध्यक्ष लामिछानेले भन्नुभयो, “आगामी एसियाली खेलकुदमा उहाँले उत्कृष्ट प्रदर्शन गर्दै नेपाललाई गौरवान्वित बनाउनुहुने विश्वास लिएका छौं।”
उहाँले खेलाडी, प्रशिक्षक, अभिभावक तथा सम्पूर्ण तेक्वान्दो परिवारको संयुक्त प्रयास र योगदानबाट यस्ता उपलब्धि सम्भव भएको बताउँदै आगामी दिनमा अझ बढी खेलाडीलाई अन्तर्राष्ट्रिय स्तरमा पुर्याउने लक्ष्य रहेको जानकारी दिनुभयो।