नेपाल–भारत सीमामा १० लाख रुपैयाँ बराबरका लागूऔषध बरामद, पतञ्जलि स्टोर सञ्चालक पक्राउ
भारत–नेपाल सीमावर्ती रुपईडीहामा सञ्चालन हुँदै आएको एक आयुर्वेदिक औषधि पसलमा प्रहरीले छापा मार्दा करिब १० लाख रुपैयाँ बराबरका नशीला तथा प्रतिबन्धित औषधि बरामद गरेको छ । संयुक्त कारबाहीका क्रममा पसल सञ्चालक आदित्य कुमार मिश्र पक्राउ परेका छन् । सीमावर्ती क्षेत्रमा लामो समयदेखि नशीला औषधिको अवैध कारोबार भइरहेको सूचनापछि प्रहरी र औषधि विभागले गरेको कारबाहीलाई ठूलो सफलताका रूपमा हेरिएको छ ।
प्रहरीका अनुसार पक्राउ पर्ने व्यक्ति रुपईडीहाको स्टेशन रोड निवासी ४४ वर्षीय आदित्य कुमार मिश्र हुन् । उनी स्वर्गीय कृपाराम मिश्रका छोरा हुन् । उनीविरुद्ध लागूऔषध नियन्त्रणसम्बन्धी कानुनसहित सम्बन्धित धारामा मुद्दा दर्ता गरी बहराइच अदालत पठाइएको छ ।
प्रभारी निरीक्षक रमेश सिंह रावतका अनुसार, गोप्य सूचनाका आधारमा ड्रग इन्स्पेक्टर विनय कृष्णा र प्रहरी टोलीले रुपईडीहास्थित पतञ्जलि स्टोर तथा आदर्श आयुर्वेदिक औषधि पसलमा सोमबार संयुक्त छापामारी गरेको थियो । ‘मुखबिरको सूचनापछि ड्रग इन्स्पेक्टर विनय कृष्णा तथा प्रहरी टोलीसँगै पतञ्जलि स्टोर एवं आदर्श आयुर्वेदिक औषधिको पसलमा छापा मारिएको थियो,’ उनले भने, ‘तलासीका क्रममा पसलको छतमा बनाइएको गोदामबाट ठूलो परिमाणमा नशीला औषधि बरामद भयो ।’
छापामारीका क्रममा २ हजार ३४९ सिसी कफ सिरप, १२ हजार १४५ ट्रामाडोल क्याप्सुल, ४ किलो ५१० ग्राम नाइट्राजेट पिएम पाउडर, ६९८ निट्राजोहम ट्याब्लेट, २५७ निटकोर ट्याब्लेट, ५०९ अल्प्राजोलाम ट्याब्लेट, ४ सिसी चोको डिलक्स कफ सिरप तथा एसपिएएस–१ का ६४ क्याप्सुल बरामद भएको प्रहरीले जनाएको छ ।
बरामद गरिएका सबै औषधिलाई प्रहरीले ८ वटा सिलबन्दी गरिएको पोकामा सुरक्षित राखेर नियन्त्रणमा लिएको छ । बरामद औषधिको अनुमानित मूल्य करिब १० लाख रुपैयाँ रहेको बताइएको छ ।
नेपाल–भारत अन्तर्राष्ट्रिय सीमासँग जोडिएको रुपईडीहा क्षेत्रमा लामो समयदेखि नशीला औषधि तथा मादक पदार्थको तस्करी हुने गरेको गुनासो आउने गरेको थियो। खुला सीमाको फाइदा उठाउँदै तस्करहरूले दुई देशबीचको आवतजावतलाई प्रयोग गरी अवैध कारोबार सञ्चालन गर्ने प्रयास गर्दै आएको सुरक्षा निकायको भनाइ छ ।
स्थानीयवासीले पनि सीमावर्ती क्षेत्रमा सक्रिय लागूऔषध तस्करीको सञ्जालविरुद्ध निरन्तर र कडा कारबाही आवश्यक रहेको बताएका छन् । उनीहरूका अनुसार, सीमाक्षेत्रमा यस्ता गतिविधि नियन्त्रण गर्न सके युवापुस्तालाई लागूऔषधको लतबाट जोगाउन र अवैध कारोबारमा प्रभावकारी अंकुश लगाउन सहज हुनेछ ।
यसअघि पनि सीमावर्ती क्षेत्रमा नशीला औषधिको कारोबार हुने गरेको सूचनाहरू पटक–पटक बाहिर आए पनि पछिल्लो कारबाहीलाई सुरक्षा निकायले अवैध नेटवर्कविरुद्धको महत्त्वपूर्ण उपलब्धिका रूपमा लिएको छ ।