१६ विद्यालयका १ सय ७० भन्दा बढी बालबालिका सहभागी
कोहलपुर नगरपालिका–३ मैटहवामा बालबालिकालाई प्रारम्भिक तहदेखि फुटबलसँग जोड्ने उद्देश्यका साथ सञ्चालन गरिएको ग्रासरुट फुटबल प्रशिक्षण कार्यक्रमको औपचारिक शुभारम्भ गरिएको छ । बिरबल फुटबल एकेडेमीले सञ्चालन गरेको प्रशिक्षणमा १६ वटा निजी तथा सामुदायिक विद्यालयका १ सय ७० भन्दा बढी बालबालिका सहभागी छन् ।
कार्यक्रमको उद्घाटन फिफा मास्टर विप्लव गौतमले एन्फा बाँकेका फुटबल प्रशिक्षक युवराज शाहीलाई बल हस्तान्तरण गर्दै गरे । सो अवसरमा बाँकेको फुटबल विकासमा पु¥याएको योगदानको कदर गर्दै बाँके जिल्ला फुटबल संघका अध्यक्ष तथा अखिल नेपाल फुटबल संघका केन्द्रीय सदस्य भोजराज शाहीले गौतमलाई सम्मान गरेका थिए ।
एकेडेमीका अनुसार, प्रशिक्षण हरेक हप्ताको शनिबार, आइतबार तथा सार्वजनिक बिदाको दिन बिहान निःशुल्क सञ्चालन हुनेछ । बालबालिकामा फुटबलप्रतिको रुचि विकास गर्दै भविष्यका खेलाडी उत्पादन गर्ने लक्ष्यसहित कार्यक्रम सञ्चालन गरिएको हो ।
उद्घाटन समारोहलाई सम्बोधन गर्दै फिफा मास्टर गौतमले ग्रासरुट तहबाट सुरु गरिएको यस्तो अभियान नेपाली फुटबलका लागि दीर्घकालीन रूपमा निकै उपयोगी हुने बताए । उनले बालबालिकालाई खेलप्रति आकर्षित गर्न सके मात्र फुटबलको भविष्य बलियो बन्ने उल्लेख गरे ।
उनले भने, ‘फुटबलमा बालबालिको रुची जगाउनु पर्छ । उहाँहरुले फुटबल खेल्न आनन्द मान्नु भयो भने यस प्रति आर्कषण बढदै जान्छ । यसले नेपाली फुटबललाई विकासको जग बसाल्न सहयोग गर्छ ।’
नेपाली फुटबलको वर्तमान अवस्थाबारे धारणा राख्दै गौतमले संस्थाभन्दा खेल ठूलो भएको बताए । उनले भने, ‘एन्फा अहिले प्रतिबन्धमा छ । तर नेपाली फुटबल एन्फा भन्दा धेरै माथी छ । नेपाली फुटबलको नेतृत्वमा बसेका व्यक्तिहरु भन्दा हजारौ जनाले यसरी गाउँघरमा, जिल्ला जिल्लामा फुटबलको विकासको लागि काम गरिरहनु भएको छ । उहाँहरुको समर्पण महत्वपुर्ण छ नेपाली फुटबलका लागि ।’
बिरबल फुटबल एकेडेमीकी अध्यक्ष आशादेवी शाहीले खेलकुदमार्फत बालबालिकामा अनुशासन, आत्मविश्वास र फुटबलप्रतिको रुचि विकास गर्ने उद्देश्यले कार्यक्रम सञ्चालन गरिएको बताइन् । उनले उद्घाटन समारोहमा सहभागी सबैप्रति धन्यवाद व्यक्त गर्दै समुदायको साथ र सहयोगले कार्यक्रमलाई अझ प्रभावकारी बनाइने विश्वास व्यक्त गरिन् ।
बाँके जिल्ला फुटबल संघका अध्यक्ष शाहीले विप्लव गौतमले बाँकेको फुटबल विकासमा निरन्तर सहयोग गर्दै आएको बताए । उनले भने, ‘गौतम जी हामी हृदयदेखि नै धन्यवाद दिन चाहन्छौं । यहाँको साथ र सहयोगले हामीलाई सधै फुटबलमा सक्रिय रहन उर्जा मिल्ने गरेको छ । उहाँले कोहलपुर आएर ग्रासरुट फुटबल प्रशिक्षणको उद्घाटन गर्नु हाम्रो लागि खुसी कुरा हो ।’
उद्घाटन कार्यक्रममा बाँके जिल्ला फुटबल संघका महासचिव कमल खत्री, कोषाध्यक्ष सानु तामाङ, राष्ट्रिय खेलकुद परिषदका फुटबल प्रशिक्षक रविन्द्र श्रेष्ठ, एन्फा फुटबल प्रशिक्षक भोजबहादुर शाही, गुरुकुल सकर स्कुलकी प्रिन्सिपल सन्ध्या चौधरीलगायतको उपस्थिति रहेको थियो ।