नेपालगन्जमा मंगलबार नेपालगन्ज उपमहानगरपालिका, जिल्ला प्रशासन कार्यालय र जिल्ला प्रहरी कार्यालय बाँकेको संयुक्त सार्वजनिक सुनुवाई आयोजना गरियो । स्थानीय तह तथा प्रशासनिक निकाय एकै ठाउँमा भेटिएपछि सार्वजनिक सुनुवाईमा सहभागीहरूले विकास निर्माणदेखि सरकारी सेवासम्मका विषयमा जिज्ञासा राखे ।
कार्यक्रममा सहभागीहरूले उपमहानगरपालिकासँग विगतका जस्तै प्रश्न दोहोर्याएका थिए । फुटपाथ निर्माण, अतिक्रमण, बाटोघाटो निर्माण, अटो व्यवस्थापन, डुबानका समस्या लगायतका विषयमा उपमहानगरपालिकासँग प्रश्न राखे भने प्रशासन र प्रहरीले गरेका राम्रा कामको प्रशंसासँगै सुधारका सुझाव र सरकारी सेवाबारे जिज्ञासा जिज्ञासा कार्यक्रमका सहभागीले राखेका थिए । कार्यक्रमका सहभागीहरूले अपांगता, महिला तथा ज्येष्ठ नागरिक मैत्री कार्यालय नहुँदा सेवा लिन समस्या भएको बताएका थिए ।
कार्यक्रममा बोल्दै नागरिक समाजका कृष्ण प्रसाद श्रेष्ठले डुबानको समस्या रहेको, फोहोर व्यवस्थापन हुन नसकेको, सडकमा नालीमा ढक्कन नहुँदा जोखिम रहेको लगायतका सवाल उठाए भने मीन बहादुर मल्लले स्थानीय तहको बजेट बनाउँदा पूरा गर्नुपर्ने सात चरणको बेवास्ता भएको बारे नगर प्रमुख प्रशान्त विष्टलाई प्रश्न गरेका थिए । उनले लागुऔषध पक्राउको संख्या बढिरहेक ाले वास्तविक अवस्था केहो भन्ने जिज्ञासा प्रशासन, प्रहरीसँग राखेका थिए । मोहनलाल सोनकरले रासायनिक मलका लागि किसानले दुःख पाइरहेको, उपमहागनरपालिकमा जोडिएका तत्कालीन गाविसहरूले अहिले पनि उपमहानगरपालिका भएको अनुभूति गर्न नपाएको गुनासो गरेका थिए । सलमान वागवानले वडा नं. १७ मा एउटा बाटोका लागि पटकपटक प्रयास गर्न पनि बन्न नसकेको, वडा कार्यालय र विद्यालय एउटै भवनमा रहेको र त्यसलाई अलग्याउन माग गरेका थिए ।
बास नेपालको सहजिकरणमा भएको कार्यक्रममा स्थानीयको प्रश्नको जवाफ सरोकारवालाले दिएपछि १० बुंदे प्रतिबद्धता जारी गरिएको थियो । ‘दुई महिना भित्र नेपालगन्ज उपमहानगरपालिकाको प्रशासकिय भवनको पुर्ननिर्माण गर्ने, सेवा प्रबाह र भौतिक संरचनालाई अपांगता मैत्री बनाउने, छाडा पशु चौपाय व्यवस्थापनमा नियमित उपमहानगर सक्रिय रहेकोमा यस कार्यलाई निरन्तरता दिने प्रतिबद्धता आएको छ,’ बासका सूचना अधिकारी हेमराज भट्टले भने, ‘नेपालगन्जलाई डुवान हुन नदिन पूर्णरूपमा सचेत रहने, नेपालगञ्जलाई सफा, सहर बनाउनका लागि आ–आफ्नो तर्फबाट पहल गर्ने, सार्वजनिक स्थलमा फोहर गर्ने निकाय, व्यक्तिलाई नियम बमोजिम कार्वाही गर्ने, मनोरञ्जनका नाममा खुलेका मसाज, स्पा, दोहोरी साँझ लगायतलाई नियमन गर्ने, बिकृति, बिसंगति बिरुद्ध शुन्यसहनशिलता कायम गर्ने प्रतिबद्धता सरोकारवालाले जनाएका छन् ।’
यसैगरी जारी गरिएका अन्य प्रतिबद्धताहरूमा बाँके जिल्लालाई सुरक्षित, सभ्य जिल्ला बनाउन आम नागरिकका साथै सम्पूर्ण निकाय जिम्मेवार रहने, सार्वजनिक स्थानमा सुर्तीजन्य पदार्थको प्रयोग, बेचबिखन रोकथामका लागि आवश्यक कदम चाल्ने, नेपालगञ्ज सहरलाई सुरक्षित सहर बनाउनका लागि आगामी आवमा सहरका बिभिन्न स्थानमा सिसि क्यामेरा जडान गर्ने, लागु औषध नियन्त्रणका लागि सञ्चालन भईरहेका बिभिन्न अभियान, कार्यक्रमलाई निरन्तरता दिने, पछिल्लो समय लागु औषध दुव्र्यसनमा महिलाहरू संलग्न भई बिभिन्न समस्याहरूमा परिरहेकाले जनचेतना, पुनस्र्थापनाका कार्यक्रम सञ्चालन गर्ने रहेका छन् ।
यसैगरी नगर क्षेत्र भित्रको सडक अतिक्रमण हटाउनुका साथै पैदल यात्रुहरू हिंड्ने बाटोको प्रयाप्त व्यवस्था गर्ने, आत्महत्या, लागु औषध लगायतका समस्याहरूको समाधानका लागि मनोसामाजिक मनोबिमर्श सेवाका कार्यक्रमहरू सञ्चालन गर्ने र आगामी आबमा कार्यबिधि बनाई उपमहानगर स्तरिय पुरुष सञ्जाल गठन गर्ने रहेका छन् ।
प्रतिबद्धतामा उपमहानगर प्रमुख प्रशान्त बिष्ट, बाँकेका प्रमुख जिल्ला अधिकारी दिल बहादुर तामांग, बाँकेका प्रहरी प्रमुख अंगुर जिसि, नेपालगन्ज उपमहानगरका प्रमुख प्रशासकिय अधिकृत मान बहादुर बम, प्रवक्ता तथा वडा नम्वर १ काख वडाध्यक्ष प्रमोद रिजाल, वडा नम्वर ९ का वडाध्ययक्ष गोविन्द रेग्मी लगायतले हस्ताक्षर गरेका छन् ।
बास नेपालका कार्यक्रम अधिकृत रबिन्द्र बोहराले सहजीकरण गरेको कार्यक्रममा कार्यकारी निर्देशक नमस्कार शाहले स्वागत तथा उद्देश्य माथि प्रकाश पारेका थिए । कार्यक्रममा बर्हिगमन अभिमत संकलन र नागरिक प्रतिबेदन पत्रको नतिजा प्रस्तुत गरिएको थियो । कार्यक्रममा उपस्थित स्थानीयहरूले सरोकारवालाहरूलाई दर्जनौं प्रश्न गरेका थिए ।