बजारमा खाना पकाउने एलपी ग्याँसको आपूर्ति प्रभावित भएपछि उपभोक्ताले सहज रूपमा र समयमै ग्याँस पाउन सकेका छैनन् । ग्याँस उद्योग मार्फत डिलरहरूले आधा सिलिण्डर त्यो पनि अनियमित मात्रै ग्याँस प्राप्त गरेपछि उपभोक्तालाई पूरा सिलिण्डरको सट्टा आधा–आधा सिलिण्डर मात्र वितरण गरिरहेका छन् ।
‘आधा सिलिण्डर ग्याँस आएपछि उपभोक्ताको माग दोब्बर हुन्छ, तर समयमा ग्याँस नपाउँदा उपभोक्ताको माग अनुसार तत्कालै ग्याँस उपलब्ध गराउन सकिएको छैन’, एक ग्याँस बिक्रेताले भने, ‘यो ग्याँसको अभाव भन्दा पनि आधा सिलिण्डर ग्याँसका कारण निम्तिएको समस्या हो जस्तो लाग्छ ।’
ग्याँस व्यवसायीका अनुसार अन्तर्राष्ट्रिय परिस्थितिका कारण पनि आपूर्तिमा असहजता आएको हो । विशेषगरी इरानमाथिको आक्रमणपछिको मध्यपूर्वी क्षेत्रको अस्थिरताले पेट्रोलियम पदार्थको ढुवानी र आपूर्ति प्रणालीमा असर परेको बताइएको छ । त्यसको प्रभाव नेपालमा एलपी ग्यासको आयात र वितरणमा समेत देखिएको छ ।
सरकारले इरान–अमेरिका–इजरायल युद्ध पछि आधा सिलिण्डर ग्याँस बिक्री गर्ने निर्णय गरेको थियो । युद्धको सुरुमा केही दिन असहज भएपनि आधा सिलिण्डर ग्याँस वितरण केही समय पछि सहज भएको थियो । ‘युद्ध बिरामको केही दिनपछि नै पुनः इरान–अमेरिका युद्ध भएको कारणले पनि आधा सिलिण्डर ग्याँसले निम्ताएको असहजतालाई झन् बढाएको छ’, ग्याँस बिक्रेता भन्छन् ।
ग्याँस अभावको सम्भावनाले धेरै उपभोक्ताको घर तथा व्यवसायमा ग्याँस सकिन लागेको अवस्थामा कम्तीमा केही दिनका लागि भए पनि खाना पकाउन सहज होस् भन्ने उद्देश्यले स्टक राख्न खोज्छन् ।
उपभोक्ताहरू भने ग्याँस अभावका कारण दैनिक जीवन प्रभावित भएको गुनासो गर्छन् । आधा सिलिण्डरले धेरै दिन नटिक्ने भएकाले फेरि छिट्टै ग्यास खोज्नुपर्ने बाध्यता सिर्जना भएको उनीहरूको भनाइ छ ।
सरकारले पुनः पूरा सिलिण्डर ग्याँस बिक्री गर्ने निर्णय गरे ढुवानी प्रक्रिया सहज भई नियमित आपूर्ति सुरु भएपछि ग्याँस वितरण पनि सामान्य अवस्थामा व्यवसायी फर्किने बताउँछन् । ‘अहिले लागत बढेको छ, ढुवानीको क्षमता पहिलेकै हो, दोब्बर ढुवानी गर्नुपर्ने अवस्था छ, जसले लागत पनि बढाउँ,’ व्यवसायी भन्छन् ।
ग्याँस व्यवसायी संघ बाँकेका अध्यक्ष प्रेम थापा ढुवानीको रोटेसन प्रभावित हुँदा उपभोक्ताको माग अनुसार आपूर्ति गर्न बिक्रेता व्यवसायीले नसकेको बताउँछन् । ‘ग्याँस बिक्रेताले मागे जति ग्याँस समयमा पाउनु भएको छैन, त्यसको प्रभाव आपूर्तिमा परेको छ’, उनले भने, ‘दोब्बर माग र आपूर्ति भनेजति र समयमा नहुुँदा समस्या भएको हो ।’ बाँकेमै ग्याँस उद्योग रहेकाले अन्य जिल्लामा आपूर्तिको थप समस्या हुनसक्ने अध्यक्ष थापा औैंल्याउँछन् । ‘ग्याँसका सम्बन्धमा सरकारी निकायबाट अनुगमन पनि भएको छ, तर आपूर्ति सहज हुनका लागि समयमा माग अनुसार हुनु पर्छ,’ उनी भन्छन् । होटल व्यवसायी संघ बाँकेका अध्यक्ष भीमलाल कंडेलले होटल व्यवसाय क्षेत्रलाई नियमित पुरा
सिलिण्डर ग्याँस आपूर्तिको आवश्यकता रहेको बताए । ‘आधा सिलिण्डरमा भाडा खर्च बढी र प्रेसर कम हुने हुँदा समस्या हुन्छ’, उनले भने ।