चार वर्षीय नाबालक छोरा र उनकी आमालाई घुम्न तथा किनमेल गराउने बहानामा भारत लगेर ३५ हजार भारतीय रुपैयाँमा बिक्री गरेको अभियोगमा दाङ जिल्ला अदालतले एक दम्पतीलाई जनही ३० वर्ष कैदको फैसला सुनाएको छ । उनीहरूबाट आमा–छोरालाई खरिद गर्ने भारतीय नागरिकलाई पनि २७ वर्ष कैद, ३ लाख ५० हजार रुपैयाँ जरिवाना र १८ हजार रुपैयाँ क्षतिपूर्ति भराउने आदेश अदालतले दिएको छ ।
जिल्ला न्यायाधीश लालसिंह थापाको इजलासले तुलसीपुर उपमहानगरपालिका–१६ का ३० वर्षीय राजेश नेपाली र उनकी ३५ वर्षीया श्रीमती राधा पाण्डे नेपालीलाई मानव बेचबिखन तथा ओसारपसार (नियन्त्रण) ऐन, २०६४ अन्तर्गत दोषी ठहर गरेको हो । अदालतका सूचना अधिकारी गोकर्ण वलीका अनुसार, दम्पतीलाई ऐनको दफा १५ (१) (क) बमोजिम जनही २० वर्ष कैद र २ लाख रुपैयाँ जरिवाना तथा दफा १५ (१) (ङ) को १ बमोजिम थप जनही १० वर्ष कैद र ५० हजार रुपैयाँ जरिवाना हुने फैसला भएको छ ।
राजेश नेपाली यसअघि पनि कसुरदार रहेको पुष्टि भएकाले मुलुकी अपराध संहिता, २०७४ को दफा ४४ (२) अनुसार थप ६ महिना कैद र ५ हजार रुपैयाँ जरिवाना पनि हुने अदालतले ठहर गरेको वलीले बताए ।
यसै मुद्दामा भारत उत्तर प्रदेशको बलरामपुर जिल्ला इमिलियाका ४९ वर्षीय राम निवास मौर्यलाई पनि दोषी ठहर गरिएको छ । अदालतका अनुसार मौर्यले चार वर्षीय बालक ‘५६ गढवा २०८१÷०८२–४७ (च)’ र उनकी २३ वर्षीया आमा ‘५६ गढवा २०८१÷०८२–४७’ लाई ३५ हजार भारतीय रुपैयाँमा खरिद गरेका थिए ।
मौर्यलाई मानव बेचबिखन तथा ओसारपसार (नियन्त्रण) ऐन, २०६४ को दफा १५ (१) (क) बमोजिम २० वर्ष कैद र ५० हजार रुपैयाँ जरिवाना तोकिएको छ । त्यसबाहेक मुलुकी अपराध संहिता, २०७४ को दफा २१९ (३) (ङ) अनुसार ७ वर्ष कैद र दफा २१९ (३ क) को देहाय (ग) बमोजिम ३ लाख रुपैयाँ जरिवाना हुने फैसला सुनाइएको अदालतले जनाएको छ । अदालतले दफा २२ अनुसार उनको कसुर नैतिक पतन हुने अपराधसमेत कायम हुने ठहर गरेको छ ।
यो घटना दुई वर्षअघि भएको थियो । २०८१ साल माघ ४ गते चार वर्षीय बालक ‘५६ गढवा २०८१÷०८२–४७ (च)’ र उनकी २३ वर्षीया आमा ‘५६ गढवा २०८१÷०८२–४७’ लाई घुम्न जाने र सामान किनमेल गराउने प्रलोभन देखाएर भारत लगिएको थियो । त्यसपछि उनीहरूलाई भारतको कृष्णनगर पु¥याई ३५ हजार भारतीय रुपैयाँमा बिक्री गरिएको अभियोग पुष्टि भएको अदालतले जनाएको छ ।
भारत पुगेपछि पीडित महिलाले एक दिन लुकिछिपी माइतीघरमा फोन गरेर आफू र छोरालाई झुक्क्याएर भारतमा ल्याई बिक्री गरिएको जानकारी दिँदै उद्धारका लागि आग्रह गरेकी थिइन् । सोही एउटा फोन कललाई आधार बनाएर जिल्ला प्रहरी कार्यालय दाङबाट खटिएको प्रहरी टोलीले भारतीय प्रहरीसँग समन्वय गरेको थियो।
प्रहरीले भारतमै खोजी अभियान सञ्चालन गरी २०८१ साल माघ १७ गते आमा–छोराको उद्धार गरेर नेपाल फर्काएको थियो । त्यसको भोलिपल्ट अर्थात् २०८१ साल माघ १८ गते २३ वर्षीया पीडितले जिल्ला प्रहरी कार्यालय दाङमा राजेश नेपाली, राधा पाण्डे नेपाली र भारत उत्तर प्रदेशको बलरामपुर जिल्ला इमिलियाका राम निवास मौर्यविरुद्ध मानव बेचबिखनसम्बन्धी किटानी जाहेरी दर्ता गरेकी थिइन् ।
सोही जाहेरीका आधारमा दर्ता भएको मानव बेचबिखन मुद्दामा सुनुवाइ गर्दै दाङ जिल्ला अदालतले बिहीबार तीनै जनालाई दोषी ठहर गर्दै कानुनबमोजिम सजाय निर्धारण गरेको अदालतका सूचना अधिकारी गोकर्ण वलीले बताए । उनले भने, ‘अदालतले अभियोग पुष्टि हुने पर्याप्त तथ्य र प्रमाणका आधारमा प्रतिवादीहरूलाई दोषी ठहर गर्दै कानुनअनुसार सजाय निर्धारण गरेको हो ।’