बाँकेमा आर्थिक वर्ष २०८२/०८३ मा ७ सय ७७ वटा सवारी दुर्घटना हुँदा ६० जनाको मृत्यु भएको छ । मृत्यु हुनेमध्ये ४२ पुरुष, १२ महिला र ६ बालक रहेका छन् । जिल्ला ट्राफिक प्रहरी कार्यालय बाँकेका अनुसार दुर्घटनामा १ सय ७५ जना गम्भीर र १ हजार १ सय २१ जना सामान्य घाइते भएका छन् ।
जिल्ला ट्राफिक प्रहरी कार्यालय बाँकेका प्रमुख कनक बहादुर शाहीका अनुसार सोही अवधिमा ट्राफिक नियम उल्लंघन गर्ने २३ हजार ४ सय ५२ सवारीसाधनमाथि कारबाही गरिएको छ । कारबाहीबाट १ करोड ९५ लाख ७९ हजार ५ सय रूपैयाँ राजस्व संकलन भएको उनले बताए ।
मादक पदार्थ सेवन (मापसे) गरेर सवारी चलाउने ८ सय ६५ चालकलाई कारबाही गरी ४ लाख ६४ हजार ५ सय रूपैयाँ तथा तीव्र गतिमा सवारी चलाउने ५ सय ८० चालकलाई कारबाही गरी ३ लाख ३ हजार ५ सय रूपैयाँ राजस्व संकलन गरिएको कार्यालयले जनाएको छ ।
त्यसअघिको आ.व. २०८१/०८२ मा बाँकेमा ८ सय ५२ वटा सवारी दुर्घटनामा ७० जनाको मृत्यु भएको थियो । उक्त दुर्घटनामा परी ५५ जना पुरुष,१० महिला,४ बालक र एक बालिकाको मृत्यु भएको थियो ।
दुर्घटनामा आर्थिक बर्ष २०७८/०७९ मा ८२ जना, आर्थिक बर्ष २०७९÷०८० मा ६० र आर्थिक बर्ष २०८०/०८१ मा ६६ जनाको मृत्यु भएको थियो । जिल्ला ट्राफिक प्रहरी कार्यालय बाँकेको तथ्यांक अनुसार, आर्थिक बर्ष २०७८/०७९ मा १ सय ५४, आर्थिक बर्ष २०७९÷०८० मा १ सय २४, आर्थिक बर्ष २०८०/०८१ मा १ सय ५८ वटा दुर्घटना भएका थिए ।