खजुराको अरुणोदय बोर्डिङ हाइस्कुलले सामाजिक उत्तरदायित्वलाई विद्यालयका नियमित शैक्षिक गतिविधिसँग जोड्दै आइतवार रक्तदान तथा निःशुल्क स्वास्थ्य शिविर आयोजना गरेको छ । विद्यालयले पहिलो त्रैमासिक परीक्षाको नतिजा प्रकाशनसँगै रक्तदान र स्वास्थ्य परीक्षण कार्यक्रम सञ्चालन गरेको हो ।
खजुरा गाउँपालिका–४ मा रहेको विद्यालयमा आयोजित शिविरमा १३० जना स्थानीयको स्वास्थ्य परीक्षण गरिएको छ । त्यस्तै, २६ पिन्ट रगत संकलन भएको विद्यालयका अध्यक्ष सतिश निरौलाले जानकारी दिए । उनका अनुसार, विद्यालयमा आयोजित सामाजिक गतिविधिमा स्थानीय क्षेत्रका सामाजिक अगुवाको समेत उल्लेख्य सहभागिता रहेको थियो ।
स्वास्थ्य शिविरमा फिजिसियन तथा मुटुरोग विशेषज्ञ डा. बिपिन आचार्यले स्वास्थ्य परीक्षण गरेका थिए । शिविरमा स्वास्थ्यसम्बन्धी समस्या लिएर आएका स्थानीयको स्वास्थ्य जाँच गरिएको थियो। विद्यालयका अनुसार निःशुल्क स्वास्थ्य सेवा उपलब्ध गराउने उद्देश्यले कार्यक्रम आयोजना गरिएको हो ।
कार्यक्रममा लुम्बिनी प्रदेशका भौतिक पूर्वाधार मन्त्री रत्न खत्रीले रक्तदान गर्दै शिविरको शुभारम्भ गरेका थिए । विद्यालयका प्रिन्सिपल ऋषिकेश जिसीका अनुसार, मन्त्री खत्रीले रक्तदान गरेर कार्यक्रमको सुरुवात गरेका हुन् ।
विद्यालयका अध्यक्ष निरौलाका अनुसार, कार्यक्रममा लुम्बिनी प्रदेश सरकारका मन्त्री खत्रीसहित खजुरा क्षेत्रका दर्जनौं सामाजिक अगुवाले सहभागिता जनाएका थिए। रक्तदानमा सहभागी भएर उनीहरूले सामाजिक सेवाको अभियानमा ऐक्यबद्धता जनाएका थिए ।
निरौलाले विद्यालयले शिक्षालाई कक्षाकोठाभित्र मात्र सीमित नराखी सामाजिक उत्तरदायित्वका गतिविधिलाई पनि निरन्तरता दिँदै आएको बताए । ’विद्यालयको सामाजिक उत्तरदायित्वअन्तर्गत रक्तदान र स्वास्थ्य शिविर आयोजना गरिएको हो’, उनले भने ।
अरुणोदय बोर्डिङ हाइस्कुलले २०५३ सालदेखि खजुरा क्षेत्रमा निजी तवरबाट शिक्षा क्षेत्रमा क्रियाशील रहेको जनाएको छ । विद्यालयले लामो समयदेखि शिक्षा क्षेत्रमा काम गर्दै आएको बताउँदै सामाजिक सेवाका गतिविधिलाई समेत आफ्नो जिम्मेवारीका रूपमा अघि बढाएको जनाएको छ ।
पहिलो त्रैमासिक परीक्षाको नतिजा प्रकाशनको अवसरलाई विद्यालयले सामाजिक सेवासँग जोडेको हो । विद्यार्थी, अभिभावक र स्थानीय समुदायबीच विद्यालयको सम्बन्धलाई थप मजबुत बनाउने उद्देश्यले पनि यस्ता कार्यक्रमलाई निरन्तरता दिइने विद्यालयले जनाएको छ ।
कार्यक्रममा रक्तदानका साथै स्वास्थ्यसम्बन्धी परामर्श र परीक्षणको व्यवस्था गरिएको थियो। स्थानीयलाई आफ्नै क्षेत्रमा निःशुल्क स्वास्थ्य परीक्षणको अवसर उपलब्ध गराउने उद्देश्यले शिविर सञ्चालन गरिएको विद्यालयले जनाएको छ ।
विद्यालयका सञ्चालक तथा अध्यक्ष निरौलाले विद्यालयले आगामी दिनमा पनि सामाजिक उत्तरदायित्वसँग जोडिएका कार्यक्रमलाई प्राथमिकतामा राख्ने बताए । शिक्षा, स्वास्थ्य र सामाजिक सेवाका क्षेत्रमा समुदायसँग सहकार्य गर्दै अघि बढ्ने विद्यालयको योजना रहेको उनले जानकारी दिए ।