बर्दिया प्रदेशमै दोस्रो उत्कृष्ट
वैदेशिक रोजगारका नाममा हुने ठगीका विवाद अदालतसम्म पुग्न नदिई स्थानीय तहमै मेलमिलापबाट समाधान गर्दै आएको बर्दिया जिल्ला लुम्बिनी प्रदेशमा दोस्रो उत्कृष्ट जिल्लाका रूपमा सम्मानित भएको छ । पीडितलाई छिटो न्याय दिलाउने, कानुनी प्रक्रियाको झन्झट घटाउने र आर्थिक भार कम गर्ने गरी गरिएको कामको मूल्यांकन गर्दै बर्दियालाई प्रदेशस्तरमा सम्मान गरिएको हो ।
आप्रवासी श्रमिक सञ्जाल, लुम्बिनी प्रदेशले गरेको मूल्यांकनमा वैदेशिक रोजगारसम्बन्धी विवाद समाधानमा बर्दियाको भूमिका प्रभावकारी देखिएको हो । सेवाग्राहीलाई सहज रूपमा न्यायको पहुँचमा पु¥याउन स्थानीय स्तरमै मेलमिलापको अभ्यासलाई प्राथमिकता दिएको भन्दै बर्दियालाई लुम्बिनी प्रदेशको दोस्रो उत्कृष्ट जिल्ला घोषणा गरिएको हो ।
यसैको कदरस्वरूप मंगलबार जिल्ला प्रशासन कार्यालय बर्दियाको सभाहलमा मंगलवार आयोजित कार्यक्रममा प्रमुख जिल्ला अधिकारी गोगन बहादुर हमाल र जिल्ला प्रहरी प्रमुखलाई सम्मान गरिएको छ । वैदेशिक रोजगारसम्बन्धी ठगी नियन्त्रण र पीडितलाई न्याय दिलाउने प्रक्रियामा प्रशासन तथा प्रहरी कार्यालयको भूमिकालाई आधार बनाएर सम्मान गरिएको हो ।
प्रमुख जिल्ला अधिकारी हमालले वैदेशिक रोजगारीको नाममा ठगीमा पर्नेमा शिक्षित युवा पनि ठूलो संख्यामा रहेको बताए। उनले विदेश जाने तयारीमै रहेका नागरिकलाई ठगीबाट जोगाउन राहदानी वितरणको चरणदेखि नै सचेतना दिने गरिएको जानकारी दिए ।
‘शिक्षित यूवाहरु नै वैदेशिक रोजगारीको नाममा ठगीमा परेको’ प्रजिअ हमालले बताए । उनका अनुसार, जिल्ला प्रशासन कार्यालयले राहदानी वितरणकै क्रममा सचेतना शिक्षा दिने गरेको छ । जिल्ला प्रहरी कार्यालय र स्थानीय तहसँगको समन्वयमा ठगी नियन्त्रणका कामसमेत भइरहेको उनले बताए ।
आप्रवासी श्रमिक सञ्जाल लुम्बिनी प्रदेशका उपाध्यक्ष हिरा खरालले प्रदेशका ७ जिल्लाको भूमिका उत्कृष्ट देखिएपछि सम्मान गर्न थालिएको बताइन । उनका अनुसार, बर्दियासहित कपिलवस्तु, रुपन्देही, अर्घाखाँची, पाल्पा, नवलपरासी र दाङ जिल्लाका जिल्ला प्रशासन कार्यालय तथा प्रहरी कार्यालयलाई सम्मान गर्न थालिएको हो ।
उपाध्यक्ष खरालले वैदेशिक रोजगारसम्बन्धी ठगीका घटनालाई अदालतसम्म पुग्नुअघि नै मेलमिलापमार्फत टुंग्याउने अभ्यास प्रभावकारी देखिएको जानकारी दिइन् । यस्तो प्रक्रियाले पीडितलाई शीघ्र न्याय दिलाउन सहयोग पुग्नुका साथै अनावश्यक कानुनी झन्झट र आर्थिक भार घटाउन महत्वपूर्ण योगदान पु¥याएको उनको भनाइ छ ।
वैदेशिक रोजगारीका क्रममा ठगीमा परेका नागरिकले लामो कानुनी प्रक्रियामा जानुपर्ने अवस्थालाई कम गर्ने उद्देश्यले स्थानीय स्तरमै विवाद समाधानको अभ्यासलाई अघि बढाइएको हो । यसबाट पीडित र सम्बन्धित पक्षबीच सहमतिका आधारमा विवाद टुंग्याउने वातावरण बनेको छ । यही अभ्यासलाई आप्रवासी श्रमिक सञ्जालले बर्दियाको उल्लेखनीय कामका रूपमा मूल्यांकन गरेको हो ।
स्थानीय स्तरमै विवाद समाधानको यस्तो अभ्यासले न्यायमा नागरिकको पहुँच विस्तार गर्न सहयोग पु¥याउने अपेक्षा गरिएको छ । विशेषगरी वैदेशिक रोजगारीका क्रममा ठगीमा परेका नागरिकका लागि छिटो र सहज न्यायको वातावरण बनाउन प्रशासन, प्रहरी, स्थानीय तह तथा सम्बन्धित सरोकारवाला निकायबीचको समन्वयलाई महत्वपूर्ण मानिएको छ ।
जिल्ला प्रशासन कार्यालय बर्दियाले आगामी दिनमा पनि सरोकारवाला निकायसँगको समन्वय र सहकार्यलाई थप प्रभावकारी बनाउने प्रतिबद्धता जनाएको छ । वैदेशिक रोजगारसम्बन्धी ठगी नियन्त्रणसँगै पीडितको न्यायमा सहज पहुँच सुनिश्चित गर्ने र नागरिकमैत्री सेवा प्रवाहलाई अझ प्रभावकारी बनाउँदै लैजाने कार्यालयले जनाएको छ ।
स्थानीय तहमा विवाद समाधान गर्ने अभ्यासलाई संस्थागत गर्दै न्यायमा नागरिकको पहुँच विस्तार गर्ने बर्दियाको प्रयासलाई प्रदेशस्तरमै उत्कृष्ट अभ्यासका रूपमा हेरिएको छ । ‘वैदेशिक रोजगारका नाममा हुने ठगी नियन्त्रणमा प्रशासनिक संयन्त्र, प्रहरी र स्थानीय तहबीचको सहकार्यलाई अझ मजबुत बनाउँदै लैजाने आवश्यकता पनि यस सम्मानले देखाएको छ,’ उपाध्यक्ष खरालले दैनिक नेपालगन्जसँग भनिन् ।