नेपालगन्ज उद्योग वाणिज्य संघको आगामी कार्यकालका लागि कार्यसमिति निर्वाचित गर्न भाद्र ६ गते मतदान हुँदैछ । निर्वाचन तालिका अनुसार बुधबार मतदाता नामावली प्रकाशन भएको छ ।
संघका महासचिव भीम बहादुर रानाभाटले निर्वाचनका लागि ३ हजार ८ सय ६३ मतदाताको नामावली निर्वाचन समितिले सार्वजनिक गरेको जानकारी दिएका छन् । ‘त्यसमा बिहीबार अन्तिम नामावली निर्वाचन समितिले जारी गर्नेछ’, उनले भने ।
संघमा विगत जस्तै यसपटक पनि सदस्यतालाई लिएर विवाद तथा टिकाटिप्पणी भैरहेका छन् ।
संघमा ५ हजार ५ सय बढी नयाँ दर्ता र पुरानो नविकरण व्यवसायी सदस्य भएको संघका पदाधिकारीले बताउँदै आएपनि त्यो भन्दा निकै कम मतदाता सूचिमा रहेका हुन् । ‘नविकरण गर्दा दोहोरिएका र सदस्यता नम्बर बिग्रेको मिलाउँदा मतदाता संख्यामा कमी आएको हो’, संघका एक पदाधिकारीले दाबी गरे ।
औपचारिक सहमति, अनौपचारिक सार्वजनिक
नेपालगन्ज उद्योग वाणिज्य संघको आगामी निर्वाचनमा सर्वसम्मत कार्यसमिति निर्वाचित गर्नका लागि तीन वटा व्यवसायिक संगठनले औपचारिक सहमति गरेको पत्र बुधबार सामाजिक सञ्जाल मार्फत सार्वजनिक गरिएको छ । यद्यपि, सहमतिमा संगठन भन्दा व्यक्तिको नेतृत्वमा यति पद पाउने भन्ने उल्लेख गरिएको छ ।
सामाजिक सञ्जालमा सार्वजनिक सहमति औपचारिक भएको हस्ताक्षर कर्ता मध्येका एक व्यवसायीले बताए । ‘अहिलेको समयमा व्यवसायी बीच निर्वाचन भन्दा एकताको सन्देश दिने गरी सहमतिमै कार्यसमिति चयन गर्ने प्रयास गरेका हौं’, उनले भने ।
सामाजिक सञ्जालमा सार्वजनिक सहमति अनुसार, अध्यक्ष पदका उम्मेदवार चिरञ्जीवि ओली नेतृत्वको समूहले अध्यक्ष, कोषाध्यक्ष, वरिष्ठ सदस्य १, खुला सदस्य ४, एशोसिएट सदस्य २, वस्तुगत सदस्य १, मनोनित सदस्य २ गरी १२ जना पाउने छन् ।
त्यस्तै, अध्यक्ष पदका उम्मेदवार रहेका सञ्जय थापाको समूहले उपाध्यक्ष वाणिज्य, उपाध्यक्ष महिला, उपमहासचिव, खुला सदस्य ४, महिला सदस्य १ गरी ८ जना पाउने भएका छन् ।
त्यस्तै, कमल कार्कीको नेतृत्वको समूहले उपाध्यक्ष उद्योग, महासचिव, खुला सदस्य ३, वस्तुगत सदस्य १, महिला सदस्य १ गरी ६ जना पाउने सहमति भएको छ ।
उक्त सहमति पालना गर्ने सहमतिमा अध्यक्ष पदका उम्मेदवार चिरञ्जीवि ओली, संघका पूर्व अध्यक्ष कृष्ण प्रसाद श्रेष्ठ, अध्यक्ष पदका उम्मेदवार सञ्जय थापाले हस्ताक्षर गरेका छन् ।
सहमतिका लागि भएको बैठकमा संघका अध्यक्ष टंक धामी, संघका पूर्व अध्यक्ष अब्दुल वाहिद मन्सुरी, कृष्ण प्रसाद श्रेष्ठ, नन्दलाल वैश्य, वर्तमान वरिष्ठ उपाध्यक्ष चिरञ्जीवि ओली, संघका पूर्व प्रवक्ता संजय थापा, पूर्व महासचिव विष्णु लामिछाने, पूर्व वरिष्ठ कार्यसमिति सदस्य ललित रौनियार, एशोसिएसट सदस्य कमल कार्की, महासचिव भीम बहादुर रानाभाटको उपस्थिति लेखिएपनि हस्ताक्षर भने पाँच जनाको मात्रै रहेको छ ।
यसअघिको निर्वाचनमा ओली राष्ट्रिय उद्योगी, व्यवसायी संघबाट समावेशी प्यानल मार्फत प्रथम उपाध्यक्ष निर्वाचित भएका थिए । कार्की नेपाल उद्योग तथा वाणिज्य महासंघ सँग आबद्ध छन् भने थापा प्रजातान्त्रिक उद्योगी, व्यवसायी संघ बाँकेका अध्यक्ष हुन् ।
सहमति सार्वजनिक सँगै असन्तुष्टि
नेपालगन्ज उद्योग वाणिज्य संघको निर्वाचनमा प्रभाव राख्ने व्यक्ति तथा संगठन बीच भएको सहमति सार्वजनिक भएसँगै असन्तुष्टि पनि सार्वजनिक भएको छ ।
‘उम्मेदवारी दिएर निर्वाचन हुन पाउने अधिकार कुण्ठित गर्दै सिडिण्केट लाद्न खोजिएको’ असन्तुष्टहरुले प्रतिक्रिया दिन थालेका छन् ।
बुधबार सामाजिक सञ्जालमा ह्वाटशप स्क्रिन शेयर गर्दै अध्यक्ष, पदाधिकारी तथा सदस्य बन्नका लागि नविकरणका लागि लाखौं खर्च गरेको दाबी सहित सार्वजनिक गरिएको थियो । ‘नेपालगन्ज उद्योग वाणिज्य संघमा पदका लागि ८० लाखको विवरण’ लेखिएको स्क्रिन सर्टमा सदस्यले २ लाखदेखि अध्यक्ष पदका उम्मेदवारले १५ लाखसम्म खर्च गरेको विवरण सार्वजनिक गरिएको स्क्रिन सर्ट नेपालगन्जका विभिन्न व्यवसायीहरुले शेयर गर्दै आलोचना गरेका छन् । यद्यपि, उक्त स्क्रिन सर्ट कसले किन उपलब्ध गरायो भन्ने सार्वजनिक सामाजिक सञ्जालमा गरिएको छैन । उक्त रकम सदस्यता नविकरण खर्च भएको दावी संघका एक पदाधिकारीको छ ।
‘सहमति गरेर जाँदा संघ बलियो हुन्छ, सहमति भाँड्नका लागि विभिन्न प्रपञ्च रचिंदैछ’, संघका एक आकांक्षी उम्मेदवारले दैनिक नेपालगन्जसँग भने ।
नेपालगन्ज उद्योग वाणिज्य संघका सदस्यहरुको नविकरण यसअघि निर्वाचनमा पनि उम्मेदवारहरुले गर्दै आएको, निर्वाचन जित्नकै लागि फेक सदस्य बनाएको जस्ता आरोपहरु सार्वजनिक हुँदै आएको थियो ।