रविन्द्र घिमिरे
नेपालगन्जका दुई व्यवसायीले बिक्रीका लागि राखेका ठूलो परिमाणका म्याद गुज्रेका खाद्य तथा उपभोग्य सामग्री फेला परेपछि बुधवार संयुक्त बजार अनुगमन टोलीले कारबाही गरेको छ । नेपालगन्ज–१२ स्थित वेष्टर्न मार्ट प्रालि र नेपालगन्ज–१ धम्बोझीस्थित बर्दिया सप्लायर्सलाई उपभोक्ता संरक्षण ऐनबमोजिम जनही ५० हजार रुपैयाँ जरिवाना गरिएको हो ।
जिल्ला प्रशासन कार्यालय बाँकेको नेतृत्वमा बुधवार गरिएको अनुगमनका क्रममा दुवै व्यवसायमा म्याद गुज्रेका सामग्री बिक्रीका लागि राखिएको भेटिएको थियो । अनुगमनपछि ती सामग्री नष्ट गरिएको छ । बर्दिया सप्लायर्समा सञ्चालकको रोहबरमा ३३ हजार २ सय ३७ रुपैयाँ बराबरका म्याद गुज्रेका खाद्य सामग्री नष्ट गरिएको हो ।
वेष्टर्न मार्टबाट पनि २३ हजार ३ सय १३ रुपैयाँ बराबरका म्याद गुज्रेका सामग्री नष्ट गरिएको संयुक्त बजार अनुगमन समिति संयोजक तथा सहायक प्रमुख जिल्ला अधिकारी महेश कुमार गुरुङले जानकारी दिए । उनका अनुसार, उपभोक्ताको स्वास्थ्यमा प्रत्यक्ष असर पार्न सक्ने सामग्री बिक्रीमा राखिएको पाइएपछि कानुनअनुसार कारबाही गरिएको हो ।
अनुगमन टोलीले दुवै व्यवसायमा म्याद गुज्रेका सामग्रीबाहेक अन्य कैफियतसमेत फेला पारेको छ । कतिपय व्यवसायमा मूल्यसूची नराखिएको भेटिएको थियो । केहीले राखेको मूल्यसूचीसमेत अद्यावधिक नगरेको पाइएको छ । सामग्री व्यवस्थापनमा पनि कमजोरी देखिएको गुरुङले बताए ।
उनका अनुसार भेटिएका कमजोरी सुधार्न सम्बन्धित व्यवसायीलाई निर्देशन दिइएको छ । आवश्यक सचेतसमेत गराइएको छ । ‘व्यवसायीले उपभोक्ताको हितलाई ध्यानमा राखेर म्याद, मूल्यसूची र सामग्री व्यवस्थापनमा विशेष ध्यान दिनुपर्छ,’ गुरुङले बताए ।
यसअघि मंगलबार गरिएको बजार अनुगमनमा पनि खाद्य सामग्रीसम्बन्धी कैफियत भेटिएको थियो । अनुगमनका क्रममा कृत्रिम रङ मिसाइएको मासको दाल फेला परेको थियो। उक्त दाल नष्ट गरिएको थियो ।
सोही अनुगमनमा कर बीजक नराखी कारोबार गर्ने एक डिस्ट्रिब्युटर्सलाई १० हजार रुपैयाँ जरिवाना गरिएको थियो । बजारमा उपभोक्ताको स्वास्थ्य तथा आर्थिक हितमा प्रतिकूल असर पार्ने गतिविधि रोक्न अनुगमनलाई निरन्तरता दिइएको हो ।
बजारमा वस्तुको गुणस्तर, मूल्य र बिक्रीका लागि राखिएका सामग्रीको म्यादलगायत विषयमा नियमित निगरानी गरिरहेको अनुगमन टोलीले जनाएको छ । व्यवसायीलाई प्रचलित कानुनअनुसार कारोबार गर्न र उपभोक्तालाई बिक्री गरिने सामग्रीको गुणस्तर तथा म्यादबारे सचेत रहन पनि निर्देशन दिइएको छ ।
संयुक्त बजार अनुगमनमा जिल्ला प्रशासन कार्यालय, आन्तरिक राजस्व कार्यालय, खाद्य प्रविधि तथा गुण नियन्त्रण कार्यालय, वाणिज्य, आपूर्ति तथा उपभोक्ता संरक्षण कार्यालय, घरेलु तथा साना उद्योग कार्यालय र नेपालगन्ज उपमहानगरपालिकाका प्रतिनिधि सहभागी थिए। उपभोक्ता हित संरक्षण मञ्च तथा नेपाल पत्रकार महासंघका प्रतिनिधिको पनि अनुगमनमा सहभागिता रहेको थियो ।
जिल्ला प्रशासन कार्यालय बाँकेको नेतृत्वमा भइरहेको संयुक्त अनुगमनलाई आगामी दिनमा पनि निरन्तरता दिने तयारी छ । बजारमा म्याद गुज्रेका सामग्री बिक्री हुने अवस्था रोक्न, व्यवसायीले अनिवार्य रूपमा मूल्यसूची राख्ने व्यवस्था कार्यान्वयन गराउन र उपभोक्ता अधिकार संरक्षणलाई प्रभावकारी बनाउन अनुगमनलाई सघन बनाइएको हो ।