सरकारले तीनवटा प्रज्ञा प्रतिष्ठानमा ८३ जना पदाधिकारी मनोनयन गरेको छ । प्रधानमन्त्रीबाट तीन सदस्यीय विज्ञ समूहको सिफारिसका आधारमा उनीहरूको नियुक्ति गरिएको हो । यसपटकको मनोनयनमा बाँकेबाट चार जना साहित्य तथा कला क्षेत्रका व्यक्तिले प्रज्ञा प्रतिष्ठानमा प्रतिनिधित्व पाएका छन् ।
नेपाल प्रज्ञा प्रतिष्ठानको प्रज्ञा परिषद सदस्यमा कोहलपुरका नवीन नेपाली ‘अभिलाषी’ मनोनित भएका छन् । सोही प्रतिष्ठानको प्राज्ञसभा सदस्यमा नेपालगन्जका किरण पौडेल ‘किरण आचार्य’ र खड्गकुमार गिरि ‘खगेन्द्र गिरि कोपिला’ मनोनित भएका छन् ।
त्यस्तै नेपाल संगीत तथा नाट्यकला प्रज्ञा प्रतिष्ठानको प्रज्ञा परिषद सदस्यमा नेपालगन्जका ध्रुवराज शर्मा ‘रसिकराज’ चयन भएका छन् । एउटै जिल्लाबाट तीनवटै प्रज्ञा प्रतिष्ठानमा चार जनाले स्थान पाउनु बाँकेको साहित्य, संगीत तथा कला क्षेत्रका लागि महत्वपूर्ण मानिएको छ ।
सरकारले नेपाल प्रज्ञा प्रतिष्ठानमा ३५ जना पदाधिकारी मनोनयन गरेको छ । नेपाल ललितकला प्रज्ञा प्रतिष्ठान र नेपाल संगीत तथा नाट्यकला प्रज्ञा प्रतिष्ठानमा भने २४–२४ जना पदाधिकारी चयन भएका छन्। तीनवटै प्रतिष्ठानमा गरी ८३ जना पदाधिकारीले जिम्मेवारी पाएका हुन् ।
तीनवटै प्रतिष्ठानको नेतृत्वसमेत सरकारले टुंगो लगाएको छ । नेपाल प्रज्ञा प्रतिष्ठानको कुलपतिमा कुमार नगरकोटी नियुक्त भएका छन् । नेपाल संगीत तथा नाट्यकला प्रज्ञा प्रतिष्ठानको कुलपतिमा ब्रजेश खनाल नियुक्त भएका छन् ।
नेपाल ललितकला प्रज्ञा प्रतिष्ठानको कुलपतिमा भने एरिना ताम्राकार नियुक्त भएकी छन् । तीन सदस्यीय विज्ञ समूहले गरेको सिफारिसका आधारमा प्रधानमन्त्रीले तीनवटै प्रतिष्ठानका कुलपतिसहित पदाधिकारी नियुक्त गरेका हुन् ।
नवनियुक्त पदाधिकारीमा बाँकेबाट प्रतिनिधित्व गर्ने चारै जना फरक–फरक जिम्मेवारीमा चयन भएका छन् । नवीन नेपालीले नेपाल प्रज्ञा प्रतिष्ठानको प्रज्ञा परिषदमा स्थान पाएका छन् भने किरण पौडेल र खड्गकुमार गिरिले प्राज्ञसभामा प्रतिनिधित्व गर्ने भएका छन् । ध्रुवराज शर्माले नेपाल संगीत तथा नाट्यकला प्रज्ञा प्रतिष्ठानको प्रज्ञा परिषद सदस्यको जिम्मेवारी पाएका छन् ।
यसअघि प्रतिष्ठानका विभिन्न तहमा हुने नियुक्तिमा बाँकेको साहित्य तथा कला क्षेत्रको प्रतिनिधित्व हुँदै आए पनि यसपटक तीनवटै प्रज्ञा प्रतिष्ठानमा एकैपटक चार जनाले स्थान पाएका हुन् । सरकारको पछिल्लो निर्णयसँगै उनीहरू प्रज्ञा प्रतिष्ठानका विभिन्न संरचनामा रहेर साहित्य, संगीत, नाट्य तथा कलासम्बन्धी क्षेत्रमा काम गर्ने भएका छन् ।