उच्च अदालत तुलसीपुर नेपालगन्ज इजलासले नेपालगन्ज उद्योग वाणिज्य संघको ३४ औं तथा ३५ औं वार्षिक साधारण सभा स्थगनका लागि परेको रिटमा दुवै पक्षलाई छलफलका लागि बोलाउने अल्पकालीन अन्तरिम आदेश दिएको छ ।
संघको साधारणसभा आगामी साउन ३० गते शनिबार हुँदैछ । अदालतले शुक्रबार साउन २९ गते विहान १० बजे दुवै पक्षलाई छलफलका लागि अदालतमा बोलाउने अल्पकालीन अन्तरिम आदेश दिंदै त्यसअघि साधारणसभा सम्बन्धी कार्य स्थगत गर्न भनेको छ ।
संघका पूर्व कोषाध्यक्ष तनबीर जमाल हलवाईले जिल्ला प्रशासन कार्यालय बाँकेमा दिएको उजुरीमाथि सुनुवाइ नभएको भन्दै मंगलबार उच्च अदालत पुगेका थिए ।
निवेदक तनवीर जमाल हलवाईका अनुसार निवेदकका तर्फबाट वरिष्ठ अधिवक्ता सुनिल श्रेष्ठ, भोला सिंह हमाल र अधिवक्ताहरु सर्वदेव ओझा, प्रहलाद बहादुर कार्की, पवन कुमार गुप्ता, कपिलदेव शर्माले बहस गरेका छन् ।