मुस्लिम धर्मावलम्बीहरुले आफ्ना धार्मिक पर्वहरुमा अनावश्यक हो–हल्ला सिर्जना हुने डिजे, लाउडस्पीकर प्रयोगमा रोक लगाएका छन् । आगामी भाद्र ८ गते इस्लाम धर्मका प्रवर्तक तथा अन्तिम पैगम्बर हजरत मोहम्मद सल्लल्लाहु अलैहि वसल्लमको जन्मोत्सवका सन्दर्भमा बसेको बैठकले त्यसखालको विकृति रोक लगाउने निर्णय गरेको हो ।
‘मोहम्मद डे’ मा निकालिने र्यालीमा कहिंकतैपनि डिजेको प्रयोग नगर्ने निर्णय गरिएको छ,’ उलेमा फाउण्डेशन, विभिन्न मस्जिद, मदरसाका सञ्चालक, धर्म गुरु, जनप्रतिनिधि, नेता, सामाजिक अगुवाहरुको संयुक्त बैठकको निर्णय सार्वजनिक गर्दै मो. अतहर हुसैन फारुकीले भने, ‘यस निर्णयको बर्खिलाप कसैले कुनै अराजक काम गरेमा, डिजेको प्रयोग गरेमा त्यसको जिम्मेवार सोही व्यक्ति वा टोल समूह हुनेछ ।’ उक्त निर्णय सबैमाझ पुर्याउने गरि आवश्यक व्यवस्था पनि मिलाइएको बताइएको छ ।
‘यो निकै महत्वपूर्ण निर्णय हो,’ वरिष्ठ पत्रकार सिराजुद्धिन खानले दैनिक नेपालगन्जसँग भने, ‘यस्ता खालका निर्णय समझदारीको कार्यान्वयनले समाजलाई सकारात्मक सन्देश प्रवाह गर्नुका साथै सामाजिक सद्भावलाई पनि बल पुर्याएको हुन्छ ।’
दुईसाता अघि सर्वदलीय, सर्वपक्षीय बैठकबाट धार्मिक तथा सामाजिक कुनैपनि गतिविधिमा डिजे, लाउडस्पीकर, हतियारहरुको प्रयोग तथा प्रदर्शनमा पूर्णतः रोक लगाउने समझदारीसँगै निर्णय गरिएको थियो । तर, फेरि त्यो निर्णयको विपरीत क्रियाकलाप भएपछि समाजमा आलोचना भइरहेको बेला मुस्लिम समुदायबाट यो निर्णय आएको हो ।
‘निर्णय कार्यान्वयनमा आवश्यक समन्वयका लागि हामीले काम गरिनैरहेका छौं,’ बाँकेका निमित्त प्रमुख जिल्ला अधिकारी महेश कुमार गुरुङले दैनिक नेपालगन्जसँग भने ।
उलेमा फाउण्डेशन सहित मुस्लिम समुदायको निर्णयलाई लिएर उक्त समाजका अगुवा मेराज अहमद हिमालयले ‘जुलुसे मिलादमा नयाँ र जिम्मेवार पहल’ भएको टिप्पणी गरेका छन् । नेपालगन्ज जामा मस्जिद–ईदगाह सञ्चालक समिति, उलेमा फाउण्डेशन नेपाल तथा समाजका अगुवाहरूको आइतवार बसेको बैठकले मोहम्मद डे को जुलुससम्बन्धी गरेको निर्णय स्वागतयोग्य रहेको उनको भनाइ छ ।
‘सामाजिक सञ्जालमा एक व्यक्तिको गल्तीलाई पूरै समुदायसँग जोडेर बदनाम गर्ने प्रयास हुन सक्छ,’ उनले निर्णय कार्यान्वयनमा जिम्मेवार बन्न सुझाव दिंदै भनेका छन्, ‘यस्तो अवस्थामा हाम्रो सानो गैरजिम्मेवारीले पनि सम्पूर्ण समाजलाई नोक्सान पु¥याउन सक्छ ।’
‘नेपालगज र आसपासका सम्पूर्ण मस्जिद, मदरसा तथा धार्मिक इदाराहरूबाट उलेमाको निगरानी र जिम्मेवारीमा व्यवस्थित, अनुशासित र मर्यादित जुलुसे मिलाद निकालिनेछ,’ बैठकमा सहभागी उनले भनेका छन्, ‘हरेक वर्ष डिजेमा खर्च हुँदै आएको रकम यसपटक मानव सेवामा लगाऔँ ।’
बाँके प्रशासनले दुई साता अघि विभिन्न पर्व–उत्सवको संवेदनशीलता र विगतको परम्परालाई समेत ख्यालमा राखेर सार्वजनिक स्थल, सडकमा ठूलो ध्वनिका लाउडस्पीकर बजाउने, र्यालीमा डीजे लगायतका कुराहरू निषेध गर्ने निर्णय गरेको हो ।