महेन्द्र राजमार्गको यात्रा सहज हुने
बाँके राष्ट्रिय निकुञ्ज क्षेत्रमा पर्ने पूर्व–पश्चिम महेन्द्र राजमार्गमा सवारी साधनको यात्रा समय घटाइने भएको छ । निकुञ्जको ओभरी चेकपोस्टदेखि खैरी चेकपोस्टसम्म लागू हुँदै आएको टाइम कार्डको समय घटाएर अब न्यूनतम २१ देखि अधिकतम २४ मिनेट कायम गरिने भएको हो ।
हाल उक्त दूरी पार गर्न न्यूनतम २४ देखि अधिकतम २८ मिनेटको समय निर्धारण गरिएको छ । नयाँ व्यवस्थापछि सवारी साधनले यसअघि भन्दा कम समयमा निकुञ्ज क्षेत्र पार गर्न पाउनेछन् ।
कोहलपुर नगरपालिकाका नगर प्रमुख पूर्णप्रसाद आचार्यको प्रमुख आतिथ्यतामा बुधवार भएको समन्वयात्मक बैठकले यस्तो निर्णय गरेको हो । निकुञ्ज क्षेत्रभित्र सवारी आवागमनलाई सहज बनाउने र अनावश्यक रुपमा यात्रा समय नलम्बिने अवस्था सिर्जना गर्ने उद्देश्यले टाइम कार्डको समय घटाउने निर्णय गरिएको हो ।
बाँके राष्ट्रिय निकुञ्ज नियमावली, २०७१ ले प्रतिघण्टा ४० किलोमिटरका दरले १४ दशमलव २ किलोमिटर दूरी पार गर्नुपर्ने समय निर्धारण गरेको छ । सोही आधारमा गरिएको वैज्ञानिक विश्लेषणबाट उक्त दूरी २१ देखि २४ मिनेटभित्र पार गर्न सकिने देखिएपछि नयाँ समय लागू गर्ने निर्णय गरिएको कोहलपुर नगरपालिका वडा नम्बर १२ का वडाध्यक्ष वीरेन्द्र शाहले बताए ।
‘वैज्ञानिक तवरले विश्लेषण गर्दा उक्त दूरी न्यूनतम २१ मिनेटदेखि अधिकतम २४ मिनेटमा पार गर्न सकिने देखिएको छ । त्यसैले सोहीअनुसार नयाँ समय लागू गर्ने निर्णय भएको हो,’ शाहले भने ।
राजमार्गमा सवारी आवागमन सहज बनाउने निर्णयसँगै निकुञ्ज क्षेत्रमा सडक सुरक्षा र पर्यटन प्रवद्र्धनलाई जोड दिने विषयमा पनि बैठकले निर्णय गरेको छ । राजमार्गका विभिन्न स्थानमा सूचना बोर्ड, होर्डिङ बोर्ड र साइनपोस्ट राखिने भएका छन् ।
मानव–वन्यजन्तु सहअस्तित्वबारे यात्रुलाई जानकारी गराउने, सडक दुर्घटना न्यूनीकरण गर्ने र निकुञ्जको पर्यटन प्रवद्र्धन गर्ने उद्देश्यले त्यस्ता सामग्री राखिने भएको हो । यसका लागि कोहलपुर नगरपालिका र बाँके राष्ट्रिय निकुञ्जबीच आवश्यक समन्वय तथा सहकार्य गरिने निर्णय भएको छ ।
बैठकले बाँके राष्ट्रिय निकुञ्जलाई जिल्लाको पर्यटनसँग जोडेर ‘ब्रान्डिङ’ गर्ने योजना पनि अघि सारेको छ । निकुञ्जको प्रचार–प्रसारलाई व्यापक बनाउन नेपालगन्ज उपमहानगरपालिकासहित अन्य सरोकारवाला निकायसँग समन्वय गरिने भएको छ ।
जुडुवा नाका, राँझा चोक, नेपालगन्ज विमानस्थल र कोहलपुर चौराह चोकमा ठूला होर्डिङ बोर्ड तथा सूचना बोर्ड राख्ने तयारी गरिएको छ । ती स्थानबाट निकुञ्जको पर्यटन सम्भावना र संरक्षणसम्बन्धी जानकारी प्रवाह गर्ने व्यवस्था मिलाइने भएको हो ।
बैठकमा निकुञ्ज संरक्षणलाई मात्र केन्द्रमा नराखी पर्यटन प्रवद्र्धन र स्थानीय विकाससँग जोडेर अघि बढ्ने विषयमा समेत छलफल भएको थियो । निकुञ्ज क्षेत्रको संरक्षण, सडक यात्रा सहजता र पर्यटन विकासलाई एकसाथ अघि बढाउन सरोकारवाला निकायबीचको समन्वय अझ प्रभावकारी बनाउने निर्णय गरिएको छ ।
कोहलपुर नगरपालिका, बाँके राष्ट्रिय निकुञ्ज, नेपाली सेना तथा अन्य सरोकारवाला निकायबीच नियमित समन्वय र सहकार्य बढाउने विषयमा पनि बैठकमा सहमति भएको थियो । निकुञ्ज क्षेत्रमा पर्ने राजमार्गको व्यवस्थापनसँगै यात्रु तथा वन्यजन्तुको सुरक्षालाई ध्यानमा राखेर आवश्यक काम अघि बढाउने निर्णय भएको हो ।
समन्वयात्मक बैठकमा बाँके राष्ट्रिय निकुञ्जका वरिष्ठ संरक्षण अधिकृत वीरेन्द्रप्रसाद कँडेल, रणध्वज गणका गणपति खिमबहादुर डाँगी, कोहलपुर नगरपालिका वडा नम्बर ९ का वडाध्यक्ष ओपेन्द्रनाथ योगी, वडा नम्बर १२ का वडाध्यक्ष वीरेन्द्र शाहलगायतको सहभागिता थियो ।
यस्तै रणध्वज गणका सहायक अपरेसन अधिकृत निशान श्रेष्ठ, सुपुष्प रेग्मी, प्रेम कार्की, पुर्मला गिरीलगायत रणध्वज गण तथा बाँके राष्ट्रिय निकुञ्जका अधिकारी पनि बैठकमा सहभागी थिए ।