नेपालगन्ज उद्योग वाणिज्य संघको नवनिर्वाचित कार्यसमितिले भोटेकोशी नदीको बाढीबाट प्रभावित परिवारका लागि ५ लाख ५१ हजार रुपैयाँ सहयोग गरेको छ । संघको निवर्तमान कार्यसमितिले संस्थागत रूपमा गरेको सहयोगमा नवनिर्वाचित अध्यक्ष, पदाधिकारी, सदस्य र कर्मचारीले व्यक्तिगत रूपमा थप रकम जुटाएका हुन् ।
संघका नवनिर्वाचित अध्यक्ष चिरञ्जीवी ओलीले आफ्नो नेतृत्वको पहिलो निर्णय नै बाढीपीडितलाई सहयोग गर्ने भएको आइतवार घोषणा गरे । उनले नेपाल उद्योग वाणिज्य संघमार्फत नेपाल सरकारको प्रधानमन्त्री राहत कोषमा रकम उपलब्ध गराउने प्रतिबद्धता जनाउँदै संघको तर्फबाट ५ लाख ५१ हजार रुपैयाँ सहयोग गरिने बताए ।
‘यस समयमा पीडित रहेका, हजारौँको संख्यामा घरबार गुमाएका व्यक्तिहरूलाई केही न केही आर्थिक रूपमा सहयोग गर्नका लागि पहिलो पटक नेपाल उद्योग वाणिज्य संघको तर्फबाट तथा मेरो व्यावसायिक कामको तर्फबाट, नेपाल उद्योग वाणिज्य संघ हुँदै नेपाल सरकारको प्रधानमन्त्री राहत कोषमा रकम प्रदान गर्ने प्रतिबद्धता आज यसै मञ्चबाट घोषणा गर्न चाहन्छु,’ ओलीले भने ।
उनका अनुसार, भर्खरै निर्वाचित कार्यसमितिका पदाधिकारी तथा सदस्य र नेपालगन्ज उद्योग वाणिज्य संघलाई संस्थागत रूपमा जोडेर प्रधानमन्त्री राहत कोषमा ५ लाख ५१ हजार रुपैयाँ प्रदान गरिनेछ । ‘यो नै हाम्रो पहिलो निर्णय भएको कुरा यहाँहरूलाई जानकारी गराउन चाहन्छु,’ उनले भने ।
बाढीपीडितका लागि संघको निवर्तमान कार्यसमितिले संस्थागत रूपमा १ लाख ५१ हजार रुपैयाँ उपलब्ध गराएको थियो । त्यसमा नवनिर्वाचित कार्यसमितिका अध्यक्ष, पदाधिकारी, सदस्य र कर्मचारीले व्यक्तिगत रूपमा थप ४ लाख रुपैयाँ जुटाएका हुन् । यसरी संघको तर्फबाट कुल ५ लाख ५१ हजार रुपैयाँ सहयोग भएको हो ।
व्यक्तिगत रूपमा सबैभन्दा धेरै रकम अध्यक्ष ओलीले सहयोग गरेका छन् । उनले आफ्नो फर्म ओली ट्रेड एण्ड सप्लायर्सबाट १ लाख ११ हजार रुपैयाँ प्रदान गरेका हुन् ।
बाढीपीडितका लागि सहयोग घोषणा गर्दै ओलीले देश कठिन परिस्थितिबाट गुज्रिरहेका बेला निजी क्षेत्र पनि सामाजिक दायित्वबाट अलग हुन नसक्ने सन्देश दिएका छन् । नयाँ कार्यसमितिको पहिलो निर्णयमै राहत सहयोगलाई प्राथमिकता दिइएको हो ।