युनिक नेपाल लघुवित्त वित्तीय संस्था लिमिटेडले बाढीपीडितको राहत, उद्धार तथा पुनःस्थापनाका लागि प्रधानमन्त्री दैवीप्रकोप उद्धार कोषमा पाँच लाख रुपैयाँ सहयोग गरेको छ।
संस्थाका अनुसार भोटेकोशी नदी हुँदै त्रिशूलीमा आएको विनाशकारी बाढीबाट ठूलो धनजनको क्षति भएपछि प्रभावित नागरिकलाई राहत तथा पुनःस्थापनामा सहयोग पुर्याउने उद्देश्यले उक्त रकम प्रदान गरिएको हो। संस्थाले मिति २०८३ भदौ २६ गते शुक्रबार कृषि विकास बैंकमा रहेको प्रधानमन्त्री दैवीप्रकोप उद्धार कोषको खातामा रु. ५ लाख जम्मा गरेको जनाएको छ।
कुल सहयोग रकममध्ये संस्थामा कार्यरत सम्पूर्ण कर्मचारीका तर्फबाट रु. ३ लाख ५ हजार ३७ रुपैयाँ र संस्थाको सामाजिक उत्तरदायित्व कोष तथा चन्दा शीर्षकबाट रु. १ लाख ९४ हजार ९६३ रुपैयाँ योगदान गरिएको छ।
संस्थाले विपद्मा परी ज्यान गुमाएका व्यक्तिप्रति श्रद्धाञ्जली व्यक्त गर्दै शोकसन्तप्त परिवारजनप्रति समवेदना तथा घाइतेहरूको शीघ्र स्वास्थ्यलाभको कामना गरेको छ। साथै, राहत, उद्धार तथा पुनःस्थापनामा खटिएका स्थानीय प्रशासन, सुरक्षा निकाय, सामाजिक संघसंस्था तथा स्वयंसेवकहरूप्रति आभार व्यक्त गरेको छ।
समुदायको सुख–दुःखमा साथ दिँदै आएको संस्थाले आगामी दिनमा पनि विपद् प्रभावित नागरिकको जीवन सामान्य बनाउन आवश्यक सहयोग तथा सहकार्यलाई निरन्तरता दिने प्रतिबद्धता जनाएको छ। प्रेस विज्ञप्तिमा संस्थाका कामु कार्यकारी प्रमुख हिरा बहादुर आलेले सहयोगलाई संस्थाको सामाजिक दायित्वका रूपमा लिइएको बताएका छन्।