बाँकेका ५७ वडामा अधिवेशन, क्षेत्र न. ३ मा अनिश्चित
नेपाली कांग्रेसको पालिकादेखि केन्द्रीय कमिटीसम्मको नेतृत्वमा पुग्न क्षेत्रीय प्रतिनिधि बन्नुपर्ने व्यवस्था भएपछि बाँकेमा वडा अधिवेशनमा प्रतिनिधि चयनलाई लिएर नेता तथा कार्यकर्ताबीच प्रतिस्पर्धा बढेको छ ।
शनिवार देखि बाँके जिल्लाका ८१ वडामध्ये ५७ वडामा अधिवेशन सम्पन्न भइसकेको कांग्रेस बाँकेका उपसभापति गोपाल प्रसाद अधिकारीले बताए ।
अधिकारीका अनुसार, तीमध्ये नेपालगन्ज उपमहानगरपालिका–६ मा मात्रै मतदान भएको छ। बाँकी सबै वडामा सर्वसम्मत रूपमा वडा नेतृत्व र क्षेत्रीय प्रतिनिधि चयन गरिएको उनले बताए । कांग्रेसको १५ औं महाधिवेशनअन्तर्गत शनिबारदेखि देशैभरि वडा अधिवेशन सुरु भएको हो ।
वडा अधिवेशनबाटै क्षेत्रीय प्रतिनिधि चयन हुने भएकाले पार्टीको माथिल्लो तहको नेतृत्वमा पुग्न चाहने नेता तथा कार्यकर्ताहरू वडा अधिवेशनमा केन्द्रित भएका छन् । क्षेत्रीय प्रतिनिधि बन्न इच्छुक क्रियाशील सदस्यको संख्या धेरै भएपछि कतिपय वडामा सहमति जुटाउन सकस देखिएको छ ।
बाँके क्षेत्र नम्बर १ का ३० र क्षेत्र नम्बर २ का २७ वडामा अधिवेशन सम्पन्न भएको अधिकारीले जानकारी दिए । शनिबार नै ती वडाको अधिवेशन सकिएको र पदाधिकारी तथा क्षेत्रीय प्रतिनिधि चयन भइसकेको उनले बताए ।
क्षेत्रीय प्रतिनिधि चयनको विषयमा कतिपय वडामा विवाद देखिए पनि जिल्लासम्म औपचारिक गुनासो नआएको अधिकारीको भनाइ छ । उनले सर्वसम्मत रूपमा वडा नेतृत्व र क्षेत्रीय प्रतिनिधि चयन गर्ने प्रयास भइरहेको बताए ।
‘क्षेत्रीय प्रतिनिधि बन्न चाहने क्रियाशील सदस्यहरूको संख्या अधिक भएकाले कतिपय वडामा विवाद भए पनि जिल्लासम्म त्यस्तो कुनै गुनासो आएको छैन,’ अधिकारीले भने ।
तर नेपालगन्ज उपमहानगरपालिका–१ मा भने क्षेत्रीय प्रतिनिधिका आकांक्षीले उम्मेदवारी दर्ताकै क्रममा हस्तक्षेप भएको गुनासो गरेका छन् । सर्वसम्मत गर्ने नाममा निर्वाचन समितिलाई मनोनयन पत्र नदिन उर्दी गरिएको आरोप एक क्षेत्रीय प्रतिनिधिका आकांक्षीले लगाएका छन् । ‘निर्लज्ज हस्तक्षेप गरिएको छ,’ ती आकांक्षीले दैनिक नेपालगन्जसँग भने ।
कांग्रेसको विधानले पालिकादेखि केन्द्रीय कमिटीसम्मका विभिन्न तहमा नेतृत्व चयनका लागि क्षेत्रीय प्रतिनिधिको भूमिका महत्वपूर्ण हुने व्यवस्था गरेको छ । यही कारण वडा अधिवेशनमै क्षेत्रीय प्रतिनिधि बन्न नेता तथा कार्यकर्ताबीच प्रतिस्पर्धा बढेको हो ।
बाँके निर्वाचन क्षेत्र नम्बर ३ मा भने क्रियाशील सदस्यता अद्यावधिकको समस्या देखिएपछि वडा अधिवेशन हुन सकेको छैन । आवश्यक तयारी पूरा गरेर पूर्वसहमतिका आधारमा साथीहरू बसेको र सदस्यता अद्यावधिकको समस्या समाधान भएलगत्तै अधिवेशन हुने अधिकारीले बताए ।
‘त्यो पनि सोमवारसम्म भइसक्ला भन्ने विश्वासका साथ सबै तयारी पूरा गरेर साथीहरू पूर्वसहमतिका साथ बसेका छन्,’ उनले भने, ‘अद्यावधिकको समस्या समाधान भएको केहीबेरमै वडाको पदाधिकारी र क्षेत्रीय प्रतिनिधि छनौट भइसक्छ।’
बाँकेमा कांग्रेसका देउवा र शेखर पक्षका केही नेता तथा कार्यकर्ता ‘कुलिङ पिरियड’ भन्दै वडा अधिवेशनमा सहभागी नभएको चर्चा पनि छ । औपचारिक रूपमा भने बाँकेका उपसभापति कुष्णबहादुर कार्कीले त्यसको नेतृत्व गरिरहेको देखिएको छ । यद्यपि, वडा तहका कार्यकर्ताले शतप्रतिशत सहभागिता जनाएको अधिकारीको दाबी छ ।
अधिकांश नेता तथा कार्यकर्ता भने अधिवेशनमा सक्रिय रूपमा सहभागी भइरहेका छन्। विधानअनुसार वडा अधिवेशनबाट क्षेत्रीय प्रतिनिधि छनोट हुने भएकाले कांग्रेसको माथिल्लो तहको नेतृत्वमा पुग्न चाहनेहरूका लागि वडा अधिवेशन महत्वपूर्ण बनेको छ ।
विधानले १५० जनासम्म क्रियाशील सदस्य रहेको वडाबाट २३ जना क्षेत्रीय प्रतिनिधि चयन हुने व्यवस्था गरेको छ । त्यसमा ३ जना महिला, ५ जना खुला, १ जना पेसागत तथा विषयगत क्षेत्रबाट, १ जना महिला युवा, २ जना खुला युवा, ६ जना समानुपातिक, १ जना अपाङ्गता भएका व्यक्ति र १ जना दलित क्षेत्रीय प्रतिनिधि रहने व्यवस्था छ ।
त्यस्तै २ जना जनजाति, आदिवासी, पिछडिएको क्षेत्र तथा अन्य समूहबाट र १ जना श्रमिक प्रतिनिधि चयन हुने विधानमा उल्लेख छ ।
१५० भन्दा बढी क्रियाशील सदस्य रहेको वडामा भने प्रत्येक १०० क्रियाशील सदस्य थपिँदा क्षेत्रीय प्रतिनिधिको संख्या बढ्दै जाने व्यवस्था छ । २५० क्रियाशील सदस्य रहेका वडामा ३२ जना, ३५० सदस्य रहेको वडामा ४१ जना, ४५० सदस्यसम्म रहेको वडामा ५० जना, ५५० सदस्यसम्म रहेको वडामा ५९ जना, ६५० सदस्यसम्म रहेको वडामा ६८ जना र ७५० सदस्यसम्म रहेको वडामा ७५ जना क्षेत्रीय प्रतिनिधि चयन हुनेछन् ।
यसरी वडा अधिवेशनबाट चयन भएका क्षेत्रीय प्रतिनिधिले पालिका र जिल्ला कार्यसमिति चयन गर्नेछन् । क्षेत्रीय प्रतिनिधिबाटै प्रदेश क्षेत्रीय समिति, प्रतिनिधिसभा क्षेत्रीय समिति, प्रदेश अधिवेशन प्रतिनिधि र महाधिवेशन प्रतिनिधिसमेत छनोट हुने कांग्रेसको विधानमा व्यवस्था छ ।