‘हनी ट्रयाप’मा लाखौं असुलेको आरोप लागेकी महिला पक्राउ
एउटा महिला कतिसम्म खतरनाक हुन सक्छन् ? आफ्नो रुप र यौवनको आवरणलाई प्रेम जालका रुपमा फ्याँकेर पर्ने युवाहरुबाट कतिसम्म आर्थिक अपराध गर्न सक्छन् होला ? यसैमा कतिको जीवन र यौवनको बरबादी भएको होला ? यी सबै प्रश्नको उत्तर एउटै महिलाबाट खोज्ने बाँके प्रहरीको एक महिनादेखिको प्रयास सफल भएको छ ।
घटना १
कानुनी अविवाहित ती महिलाको रुप र यौवनको आवरणलाई आकर्षण मानेर नजिकिएका युुवा प्रेम जालमा पर्छन् । केही महिना रमाइलो चल्छ, दुबै अविवाहित भएकाले विवाहका योजना बन्छन्, विवाह पूर्व सम्बन्ध स्थापना हुन्छ । शुरु हुन्छ, महिलाको कारोबार !
‘पुरै फिल्मी छ, कथा !’ अनुसन्धानमा खटिएका एक अधिकारी दैनिक नेपालगन्जसँग भन्छन्, ‘डेन्जर रैछन यी महिला त !’ प्रेमिकाको माग धान्नै नसक्ने भएपछि भएको जग्गा पास गरेर युवा विदेशिए, यहाँ परिवार पुरै तनावमा पर्यो । केही बोले फोटो, भिडियो सार्वजनिक गरिदिने, खुलेर बोलेका कल रेकर्ड त प्रमाण हुनेनै भए, बलात्कार गरेको अभियोगमा जेल पुर्याइदिने धम्की ।
जग्गा पास गरेका युवा विदेश गएपछि महिला अर्काे ‘मुर्गा’को खोजीमा…
घटना नम्बर २
विवाहितसँगको अर्काे संगत शुरु हुन्छ । सम्बन्ध व्यवसायिक साझेदारका रुपमा । विस्तारै महिलाको व्यवसाय त ‘प्रेम जालको आकर्षण, यौनपछिको असुली । ‘यो घटना अझै डरलाग्दो पो छ,’ ती प्रहरी अधिकारी भन्छन्, ‘मेरो लागेको ऋण तिरिदे भनेर मासिक ४० हजार रुपिया ति व्यक्तिले तिर्दै आएको बैंक स्टेटमेन्टबाटै देखिन्छ ।’ अनुसन्धान भइरहेकाले धेरै कुरा खुल्दै जाने संकेत गर्दै उनले भने, ‘कम्तिमा दुई वर्षदेखि यो दोस्रो व्यक्तिलाई हनी ट्रयापमा पारिरहेको देखिन्छ ।’
घटना नम्बर ३
‘हमेसाजस्तै विजनेश पार्टनरकोखोजिमा रहेकी यी महिलाले बैजनाथ –२ का सामान्य व्यक्तिलाई निशाना लगाउँछिन्, ठ्याक्कै मुर्गा पनि भनेजस्तै भेटिन्छन्,’ प्रहरी स्रोत भन्छ, ‘विजनेश पार्टनरसीपका लागि १८ लाख बुझ्दासम्म दुवैबीच अनैतिक सम्बन्धको स्थापना हुन्छ ।’ प्रेमजालमा परिसकेका ती युवासँग महिलाले २८ लाखको एउटा चेक बुझेपछि ‘कम तौलको मुर्गा’ बाट महिला टाढिन्छिन् । ‘२८ लाख भुक्तानी नगरे चेक बाउन्समा मुद्दा हाल्छु भनेपछि युवा बाँके प्रहरी पुग्छन्, एउटा उजुरी दर्ता गराउँछन्, प्रहरी मिहिन अध्ययन शुरु गर्छ ।
त्यसको पत्तो नपाएकी महिलाले चेक बाउन्समा हालेपछि प्रहरी परिसर काठमाडौले युवालाई पक्राउका लागि खोजी गर्छ, पक्राउ गरेरै हिरासतमा पुर्याउँछ । अनुसन्धानमा खटिएका प्रहरीका अनुसार, यसको जानकारी पाउँछन्, बाँके प्रहरी प्रमुख, प्रहरी उपरीक्षक अंगुर जीसीले, जसलाई ती युवाले एक महिनाअघिनै पीडादायी हनीट्रयापका व्यथा बिसाएका थिए ।
ंंंं८८८
प्रेम सम्बन्ध र शारीरिक सम्बन्धको जालमा पारेर एक पुरुषलाई विभिन्न मुद्दामा फसाइदिने भन्दै डर, त्रास र धाकधम्की दिई लाखौ रुपैयाँ असुलेको आरोपमा बाँके प्रहरीले एक महिलालाई पक्राउ गरेको सोमवार सार्वजनिक गरेको छ ।
पक्राउ पर्नेमा रामेछापको गोकुलगंगा गाउँपालिका–२ घर भई हाल काठमाडौं महानगरपालिका–१०, सुकेधारामा कोठा भाडामा लिएर बस्दै आएकी ३० वर्षीया सविता श्रेष्ठ रहेकी छन् । उनलाई जिल्ला प्रहरी कार्यालय बाँकेले २०८३ असोज ५ गते पक्राउ गरेको हो । ‘यी महिलासँग अरुपनि पीडित भएका हुनसक्ने भएकाले यसलाई ढिलैभएपनि सार्वजनिक गरिएको हो,’ एकसातापछि किन त यो घटना सार्वजनिक गरिएको ? दैनिक नेपालगन्जको जिज्ञासामा बाँके प्रहरी प्रमुख, प्रहरी उपरीक्षक अंगुर जीसीले भने, ‘सिरियल इन्सिडेन्टहरु होलान् जस्तो देखिन्छ ।’ उनले यसखालका घटनाबाट सचेत बनाउन पनि आवश्यक रहेको बताए ।
बाँके प्रहरीका अनुसार, श्रेष्ठले बैजनाथ गाउँपालिका–२ बस्ने ३२ वर्षीय एक पुरुषलाई पूर्वयोजना बनाएर माया–प्रेम तथा शारीरिक सम्बन्धको जालमा पारेकी थिइन् । त्यसपछि ती पुरुषलाई विभिन्न मुद्दामा फसाइदिने भन्दै डर, त्रास र धाकधम्की देखाएर पटक–पटक नगद तथा जिन्सी सामान लिएको प्रारम्भिक अनुसन्धानबाट खुलेको छ ।
पीडित पुरुषले दिएको उजुरीका आधारमा प्रहरीले अनुसन्धान अघि बढाएको हो । स्रोतका अनुसार प्रारम्भिक अनुसन्धानमा महिलाले ती पुरुषबाट हालसम्म १८ लाख नगद रुपैयाँ असुलेको देखिएको छ । २८ लाखको चेक लिएकी महिलाले रकम माग्ने र असुल्ने क्रम नरोकिएपछि पीडित पुरुष प्रहरीको सम्पर्कमा पुगेका थिए ।
प्रहरीले घटनालाई ‘हनी ट्रयाप’मार्फत आपराधिक लाभ लिएको घटनाका रूपमा अनुसन्धान गरिरहेको जनाएको छ । केही समयदेखि फरार रहेकी श्रेष्ठलाई पक्राउ गरेपछि घटनासँग जोडिएका अन्य पक्षबारे पनि अनुसन्धान भइरहेको प्रहरीको भनाइ छ ।
जिल्ला प्रहरी कार्यालय बाँकेका सूचना अधिकारी, प्रहरी नायव उपरीक्षक प्रतित सिंह राठौरले श्रेष्ठमाथि थप अनुसन्धान भइरहेको बताए । ‘घटनाबारे अनुसन्धानमा छौं,’ उनले दैनिक नेपालगन्जसँग भने ।
प्रहरीले घटनामा अन्य पुरुष पनि पीडित भएको हुनसक्ने आशंका गरेको छ । श्रेष्ठविरुद्ध थप उजुरी आए त्यस विषयमा समेत अनुसन्धान गरिने बाँके प्रहरीले जनाएको छ । अहिलेसम्म प्राप्त उजुरी र प्रारम्भिक अनुसन्धानका आधारमा घटनाको थप विवरण संकलन गर्ने काम भइरहेको प्रहरीले जनाएको छ ।
रोचक कुरा त के भने, यीनै महिलाको चेक बाउन्सको उजुरीमा युवा प्रहरी परिसरमा अनुसन्धानका लागि थुनिएका छन् । बाँके प्रहरीले यो कुराको जानकारी पाएपछि विशेष टोली बनाएर महिलाको खोजीका लागि राजधानी पठाएको थियो । पक्राउ गरेर अनुसन्धान गर्दै जाँदा घटनाका श्रृंखलाबद्ध खुलासा भएको प्रहरीले जनाएको छ ।