बाँके प्रहरीले भन्सार छली तस्करी गरी ल्याइएको करिब ३ लाख ८० हजार ९ सय रुपैयाँ बराबरको विभिन्न सामान बरामद गरेको छ।
जिल्ला प्रहरी कार्यालय बाँकेका अनुसार असोज १३ र १४ गते नेपालगन्ज उपमहानगरपालिका–१४ र १६ का विभिन्न स्थानबाट भन्सार छली ल्याइएका सामान बरामद गरिएको हो।
प्रहरीले बरामद गरेका सामानमा लत्ताकपडा, एलईडी बल्ब, छाला तथा कपडाका जुत्ता, सुर्तीजन्य पदार्थ र ‘माउन्टेन ड्यू’ नामक पेय पदार्थलगायत रहेका छन्। बरामद सामानको अन्दाजी मूल्य ३ लाख ८० हजार ९ सय रुपैयाँ रहेको प्रहरीले जनाएको छ।
बरामद सामान आवश्यक कारबाहीका लागि भन्सार कार्यालय नेपालगन्ज, बाँकेमा पठाइएको जिल्ला प्रहरी कार्यालय बाँकेका सूचना अधिकारी प्रहरी नायव उपरीक्षक प्रतित सिंह राठौरले जानकारी दिएका छन्।