महिलासहित दुई पक्राउ, रुपैडिहामै ३०४ ग्राम स्म्याक बरामद
नेपाल–भारत सीमावर्ती बजार रुपैडिहामा टायल्स पसलबाट ठूलो परिमाणमा स्म्याक बरामद भएको घटनाले सीमाक्षेत्रमा भइरहेको लागूऔषध कारोबार र सुरक्षा निगरानीमाथि प्रश्न उठाएको छ । बहराइच प्रहरीले चकिया रोडस्थित टायल्स पसलमा छापा मारेर ३०४ ग्राम अवैध स्म्याक बरामद गरेको हो ।
प्रहरीले घटनामा एक महिलासहित दुई जनालाई पक्राउ गरेको छ । पक्राउ पर्नेमा बाराबंकीको बदोसराय थाना क्षेत्रअन्तर्गत किशुनदासपुरकी ३३ वर्षीया पूनम वर्मा र रुपैडिहा नगर पंचायत–९, चकिया रोडका ३१ वर्षीय रियाज अली उर्फ रियाज बाबा रहेका छन् ।
प्रहरीका अनुसार, सोमवार रुपैडिहा थाना प्रहरी र स्वॉट तथा सर्विलांसको संयुक्त टोलीले चकिया रोडस्थित टायल्स पसलमा लागूऔषधको किनबेच भइरहेको सूचना पाएको थियो । सूचनाका आधारमा पसलमा पुगेको टोलीले दुई जनालाई नियन्त्रणमा लिएर खानतलासी गरेको थियो ।
खानतलासीका क्रममा पसलको काउन्टरबाट २९४ ग्राम र पूनम वर्माको साथबाट १० ग्राम स्म्याक बरामद भएको प्रहरीले जनाएको छ । प्रहरीले उनीहरूको साथबाट नेपाली मुद्रा, दुईवटा डेबिट कार्ड, आधार कार्ड, प्यान कार्ड र ड्राइभिङ लाइसेन्ससमेत बरामद गरेको छ ।
प्रहरीको दाबीअनुसार, पूनमले बाराबंकीबाट स्म्याक ल्याएर रियाजलाई बिक्री गर्दै आएकी थिइन् । बक्यौता रकम लिन र नयाँ मालको नमुना देखाउन उनी रुपैडिहा पुगेकी थिइन् ।
रियाजले भने आफ्नै टायल्स पसलबाट लुकिछिपी थोकमा स्म्याक बिक्री गर्दै आएको प्रहरीको दाबी छ । पसलमै ठूलो परिमाणमा लागूऔषध भेटिएपछि रुपैडिहामा लामो समयदेखि भइरहेको भनिएको कारोबारमाथि थप अनुसन्धानको आवश्यकता देखिएको छ । प्रहरीका अनुसार, त्यहाँबाटै नेपालगन्ज हुँदै नेपालका विभिन्न ठाउँ पठाइने गरेको खुलेको छ ।
पक्राउ परेका दुवै जनाविरुद्ध रुपैडिहा थानामा मु०अ०सं० २७२÷२०२६ अन्तर्गत धारा ८÷२१ एनडीपीएस ऐनबमोजिम मुद्दा दर्ता गरिएको छ । उनीहरूमाथि आवश्यक कानुनी कारबाही अघि बढाइएको प्रहरीले जनाएको छ ।
‘स्थानीयस्तरमा लागूऔषध कारोबारमा संलग्न केही व्यक्तिले संरक्षण पाउने गरेको आरोपसमेत लाग्दै आएको छ,’ रुपैडिहास्थित पत्रकार सुरेन्द्र मधेसियाले दैनिक नेपालगन्जसँग भने, ‘यद्यपि त्यस्ता आरोपमा प्रहरीको संलग्नता रहेको निष्कर्ष निकाल्न स्वतन्त्र अनुसन्धान र ठोस प्रमाण आवश्यक हुन्छ ।’ ‘त्यसैले पछिल्लो बरामदगीपछि प्रहरी अनुसन्धानले आरोपित दुई जनाभन्दा माथि पुगेर कारोबारको वास्तविक सञ्जाल पहिचान गर्नुपर्ने चुनौती थपिएको छ,’ पत्रकार मधेसियाले थपे ।
टायल्स पसलबाट थोकमै स्म्याक बिक्री भइरहेको थियो भने स्थानीय प्रहरी र अन्य निगरानी संयन्त्रले त्यसको जानकारी यसअघि किन पाएनन् भन्ने विषयले रुपैडिहामा चर्चा पाएको छ । ‘३०४ ग्राम स्म्याकसहित भएको पछिल्लो कारबाहीपछि अनुसन्धान पक्राउ र बरामदगीमै सीमित हुन्छ वा लागूऔषधको स्रोत, आपूर्तिकर्ता, खरिदकर्ता र सम्भावित संरक्षणदातासम्म पुग्छ भन्ने विषय अब महत्वपूर्ण बनेको छ,’ पत्रकार मधेसियाले स्थानीयबासीको चर्चा सुनाउँदै भने ।
बक्स
सुर्खेत पुग्यो ब्राउनसुगर
दैनिक नेपालगन्ज
नेपालगन्ज हुँदै सुर्खेततर्फ आउँदै गरेको ईभी गाडीबाट ब्राउनसुगर जस्तो देखिने पदार्थ बरामद भएपछि सीमादेखि गन्तव्यसम्मको सुरक्षा जाँच प्रणालीमाथि प्रश्न उठेको छ । प्रहरीले वीरेन्द्रनगरमा पुगेपछि मात्र लागूऔषध बरामद गरेको घटनाले अवैध लागूऔषध ओसारपसार नियन्त्रणमा बाटोमै हुने निगरानी कति प्रभावकारी छ भन्ने प्रश्न खडा गरेको हो ।
वीरेन्द्रनगर नगरपालिका–११ सुब्बाकुनामा मंगलबार प्रहरीले ७ ग्राम २ सय २० मिलिग्राम ब्राउनसुगर जस्तो देखिने पदार्थसहित चार जनालाई पक्राउ गरेको छ । प्रहरीका अनुसार, पक्राउ पर्नेमा वीरेन्द्रनगर नगरपालिका–४ का ३९ वर्षीय मिनराज गिरीसमेत छन् ।
लागूऔषध नियन्त्रण ब्यूरो शाखा कार्यालय सुर्खेतसमेतबाट खटिएको प्रहरी टोलीले नेपालगन्जदेखि सुर्खेततर्फ आउँदै गरेको भे.१ ज १३७० नम्बरको ईभी गाडी जाँच गरेको थियो । सोही क्रममा गाडीभित्र उक्त पदार्थ फेला परेको प्रहरीले जनाएको छ । पदार्थ भेटिएपछि गाडीमा सवार चारै जनालाई प्रहरीले नियन्त्रणमा लिएको हो ।
घटनाले नेपालगन्जबाट सुर्खेततर्फ जाने यात्रुवाहक तथा सार्वजनिक सवारीसाधनमा हुने सुरक्षा जाँचलाई पनि पुनः गम्भीरतापूर्वक हेर्नुपर्ने अवस्था देखाएको छ । ‘विशेषगरी नेपालगन्ज क्षेत्रबाट लागूऔषध अन्य जिल्लातर्फ लैजाने सम्भावनालाई ध्यानमा राखेर बाटोमा हुने निगरानी र जाँच प्रभावकारी बनाउनुपर्ने देखिन्छ,’ स्थानीय पत्रकारले दैनिक नेपालगन्जसँग भने ।
रुपैडिहा नाकाबाट नेपालगन्ज हुँदै सुर्खेतसम्म लागूऔषध पुग्ने सम्भावनालाई लिएर सुरक्षा निकायले सीमाक्षेत्रदेखि नै निगरानी कडा बनाउनुपर्ने आवश्यकता घटनाले देखाएको स्थानीय प्रहरीले पनि स्वीकार गरेको छ । ‘यद्यपि बरामद पदार्थ कहाँबाट ल्याइएको थियो र यसको वास्तविक स्रोत तथा गन्तव्य के थियो भन्ने कुरा भने प्रहरी अनुसन्धानबाट खुल्नेछ,’ स्थानीय प्रहरी अधिकारीले भने ।
सवारीसाधनभित्र लागूऔषध जस्तो देखिने पदार्थ भेटिनुले यात्राको क्रममा हुने नियमित सुरक्षा जाँचको प्रभावकारितामाथि समेत प्रश्न उठाएको छ । सीमा क्षेत्रमा हुने जाँचपछि नेपालगन्जबाट सुर्खेततर्फ जाने बाटोमा पनि जोखिमअनुसार निगरानी र आकस्मिक जाँच बढाउनुपर्ने देखिएको छ ।
प्रहरीले पक्राउ परेका चारै जनामाथि अनुसन्धान अघि बढाएको जनाएको छ । बरामद पदार्थको प्रकृति, त्यसको स्रोत, ओसारपसारमा संलग्न व्यक्तिहरू र सम्भावित गन्तव्यबारे अनुसन्धान भइरहेको प्रहरीले जनाएको छ ।
यस घटनाले लागूऔषध नियन्त्रण केवल सीमा क्षेत्रमा हुने जाँचमा सीमित नराखी त्यसपछि जोडिने प्रमुख सडक र सवारीसाधनमा समेत निगरानी आवश्यक रहेको संकेत गरेको छ । प्रहरीले भने घटनाका सम्बन्धमा आवश्यक अनुसन्धान गरिरहेको जनाएको छ ।