जन्मदिनलाई उत्सव बनाउने अनेक शैली छन् । तर, आफ्नो खुसी असहाय ज्येष्ठ नागरिक र बालबालिकासँग बाँडेर मनाइने जन्मोत्सवले उत्सवलाई मानवीय संवेदनासँग जोड्छ । नेपालगन्ज उपमहानगरपालिका–१८ का वडाध्यक्ष दीपककुमार बर्माले आइतवार आफ्नो जन्मोत्सव नीलसागर सेवाश्रममा आश्रित असहाय ज्येष्ठ नागरिक तथा बालबालिकासँग मनाएर यस्तै मानवीय सन्देश दिएका छन् ।
नेपालगन्ज उपमहानगरपालिकामा विकास निर्माणका दृष्टिले चर्चामा रहेका वडाध्यक्ष बर्माले जन्मोत्सवका अवसरमा सेवाश्रममा आश्रितहरूलाई मिष्ठान्न तथा रात्रीकालीन भोजन गराउनुका साथै निर्माणाधीन भवनका लागि आर्थिक सहयोगसमेत हस्तान्तरण गरे । व्यक्तिगत खुसीलाई सामाजिक सेवासँग जोड्ने उनको यो प्रयासले जन्मोत्सव मनाउने परम्परालाई परोपकारसँग जोडेको छ ।
‘वास्तवमा राज्य नै उहाँहरूको अभिभावकत्व लिइदिनुपर्ने हो,’ दुई कार्यकालदेखि नेपालगन्ज–१८ को नेतृत्व सम्हालिरहेका वडाध्यक्ष बर्माले भावुक हुँदै भने, ‘जन्म दिनेले बेवारिसे छाड्ने र जन्म दिनेलाई सडकमा पु¥याउने संस्कारले यसखालको अमानवीय परिस्थितिको सिर्जना गरिरहेको हो ।’
जन्मोत्सवका अवसरमा सेवाश्रममा रहेका ज्येष्ठ नागरिक र बालबालिकासँग समय बिताउँदै उनीहरूलाई भोजन गराएका बर्माले असहायहरूको जीवनमा थोरै भए पनि खुसी थप्ने प्रयास गरेका हुन् । उनको जन्मोत्सवले परिवार र समाजबाट टाढिन पुगेका व्यक्तिहरूको संरक्षण तथा अभिभावकत्वको प्रश्नलाई समेत स्मरण गराएको छ ।
नीलसागर सेवाश्रमका अभिभावक तथा समाजसेवी विजयकुमार गुप्ताले बर्माको जन्मोत्सवको प्रशंसा गर्दै यसलाई पुण्य र परोपकारी कार्यका रूपमा व्याख्या गरे । ‘यसरी नै मनकारीहरूको सहयोगले यो सेवाश्रम चलिरहेको छ,’ उनले भने ।
सेवाश्रममा आश्रितहरूको हेरचाहसँगै भवन निर्माणलाई पूर्णता दिन आर्थिक स्रोत जुटाउनु पनि उत्तिकै चुनौतीपूर्ण छ । स्रोत अभावका कारण अलपत्र परेको निर्माणाधीन भवनलाई पूर्णता दिन सहयोग जुटाउने अभियानले गति लिएपछि एक करोड रुपैयाँभन्दा बढी रकम संकलन भएको समाजसेवी शेमराज शाक्यले बताए । उनका अनुसार, भवन निर्माणलाई अन्तिम रूप दिने काम अघि बढिरहेको छ ।
वडाध्यक्ष बर्माको जन्मोत्सवकै अवसरमा शाक्यले निर्माणाधीन भवनका लागि ३१ हजार रुपैयाँ सहयोग ग्रहण गरे । शाक्यका अनुसार आइतवार मात्रै मल्हमपट्टी मर्निङवाक ग्रुपले ५१ हजार रुपैयाँ र गृहणी पूजा थापाले ३० हजार रुपैयाँ नगद सहयोग गरेका छन् । त्यस अवसरमा बर्मालाई आश्रममा सम्मानपनि गरिएको थियो ।
नीलसागर सेवाश्रममा आश्रित असहाय ज्येष्ठ नागरिक तथा बालबालिकाको संरक्षण र सेवाका लागि समुदायबाट प्राप्त यस्ता सहयोगले आशा जगाएको छ । ‘जन्मदिनमा गरिने खर्चलाई मानवीय सेवामा लगाउने बर्माको प्रयास र भवन निर्माणका लागि जुटिरहेको सहयोगले सामाजिक उत्तरदायित्व निर्वाह गर्ने बाटो पनि देखाएको छ,’ समाजसेवी गुप्ताले दैनिक नेपालगन्जसँग भने, ‘आफ्नो खुसी अरूसँग बाँड्न सक्नु नै जन्मोत्सवको सुन्दरता हो भन्ने सन्देश उनको यसपटकको उत्सवले दिएको छ ।’
त्यसअवसरमा वडाध्यक्षहरु गोविन्द रेग्मी, समीर प्रताप सिंह, मोहन मिश्र एमाले डुडुवाका अध्यक्ष महेशकुमार चौधरी लगायतका नेताहरुको पनि सहभागिता रहेको थियो ।
