त्रिभुवन विश्वविद्यालयका उपकुलपति डा. भोला थापाले आफ्नो कार्यकालमा केन्द्रिकृत रहेको त्रिभुवन विश्वविद्यालयलाई विकेन्द्रित गर्दै लैजाने बताएका छन् । महेन्द्र बहुमुखी क्याम्पस, नेपालगन्जको नवनिर्मित भवन उद्घाटनका क्रममा उपकुलपति डा. थापाले यस्तो बताएका हुन् ।
उपकुलपति डा. थापाले भने, ‘अहिलेको रणनीति भनेको विश्वविद्यालयलाई विकेन्द्रित गर्दै लैजाने हो । यहाँहरूले गरेका निर्णयलाई नियमन गराउन विगतमा जसरी केन्द्रको मुख ताक्नुपर्ने बाध्यता थियो, त्यसलाई हामीले कम गर्दै लैजानेछौँ ।’ उनले अगाडि भने, “यसको उदाहरणका रूपमा हामीले दीक्षान्त समारोहलाई लिन सक्छौँ । पहिले कीर्तिपुरमा मात्रै हुँदै आएको दीक्षान्त समारोह अब प्रदेश केन्द्रित गर्दै लैजानेछौँ ।”
त्रिभुवन विश्वविद्यालयका विद्यमान विभिन्न समस्यालाई सम्बोधन गर्ने क्रममा उपकुलपति डा. थापाले समस्याहरूको समाधान क्रमशः गर्दै गएको बताए । उनले आगामी दिनमा विश्वविद्यालयमा भइरहेका सुधारको अनुभूति सबैले गर्न पाउने विश्वास व्यक्त गरे ।
कार्यक्रमलाई सम्बोधन गर्दै त्रिभुवन विश्वविद्यालयका कुलसचिव डा. रवीन्द्र शिवाकोटीले आफूहरू विश्वविद्यालयमा आएपछि नीति तथा कार्यक्रम ल्याउनुका साथै विभिन्न सुधारका प्रयास गरिरहेको बताए ।
कुलसचिव डा. शिवाकोटीले भने, ‘हिजो विश्वविद्यालयको अवस्था कस्तो थियो भन्ने विषयमा अब हामी जान चाहँदैनौँ । तर, विश्वविद्यालयअन्तर्गतका क्याम्पसका समस्यालाई तत्काल सम्बोधन गर्दै आएका छौँ र आगामी दिनमा पनि गर्नेछौँ । हामी केही फरक गर्ने अभ्यासमा छौँ ।’
कार्यक्रममा त्रिभुवन विश्वविद्यालयका केन्द्रीय परीक्षा नियन्त्रक डा. लक्ष्मण पौडेलले महेन्द्र बहुमुखी क्याम्पस नेपालगन्ज परीक्षा नियन्त्रण कार्यालय, बल्खुको उच्च मूल्याङ्कनमा रहेको बताए । उनले भने, ‘हामी सबैले सकारात्मक सोचका साथ आ–आफ्नो जिम्मेवारी र भूमिका निष्ठापूर्वक निर्वाह ग¥यौँ भने सबै समस्या समाधान गर्न सकिन्छ ।’
नियन्त्रक डा. पौडेलले दरबन्दीअनुसार कर्मचारीको अभाव रहेको उल्लेख गर्दै धेरै काम गर्नुपर्ने अवस्था रहेको बताए ।
यसैगरी, महेन्द्र बहुमुखी क्याम्पस नेपालगन्जका प्रमुख डा. लालमणि आचार्यले क्याम्पसमा भौतिक संरचनासम्बन्धी करिब ९० प्रतिशत समस्या समाधान भइसकेको बताए ।
उनले भने, ‘क्याम्पसमा भौतिक संरचनासम्बन्धी समस्या करिब–करिब समाधान भइसकेको छ । यसमा सबैको सहयोग रहेको छ । तर, अझै पनि क्याम्पसमा कर्मचारीको अभाव छ । कर्मचारीको समस्या समाधान भएमा क्याम्पसका अन्य काम पनि अझ प्रभावकारी रूपमा अघि बढाउन सकिनेछ ।’
भवन उद्घाटन कार्यक्रममा धन्यवाद मन्तव्य राख्दै क्याम्पसका सहायक क्याम्पस प्रमुख सुवास गौतमले भौतिक संरचनाका अतिरिक्त अन्य विषयमा समेत त्रिभुवन विश्वविद्यालयले क्याम्पसलाई सहयोग गर्नुपर्ने बताए ।
क्याम्पसका प्राध्यापक डा. हरिप्रसाद तिमिल्सिनाले सहजीकरण गरेको कार्यक्रममा सहायक क्याम्पस प्रमुख डा. विष्णुबहादुर केसीले शुभकामना मन्तव्य दिएका थिए । कार्यक्रममा क्याम्पसका सहायक प्रमुखहरू, प्राध्यापक तथा कर्मचारीलगायतको उपस्थिति रहेको थियो ।