स्वास्थ्य क्षेत्रका समस्या, सम्भावना र सुधारका सवाललाई पत्रकारितामार्फत उठाउँदै आएको स्वास्थ्यपेज सातौं वर्षमा प्रवेश गरेको छ । वार्षिकोत्सवका अवसरमा आइतवार साँझ विशेषांक विमोचन, अग्रज चिकित्सक सम्मान तथा वार्षिकोत्सव कार्यक्रम गरिएको छ ।
यस वर्षको अग्रज चिकित्सक सम्मानबाट नेपालगन्ज मेडिकल कलेजका संस्थापक तथा वरिष्ठ चिकित्सक डा. एम किदवाई सम्मानित भएका छन् । स्वास्थ्य क्षेत्रमा पु¥याएको योगदानको कदर गर्दै उनलाई सम्मान गरिएको हो । कार्यक्रममा अन्तर्राष्ट्रिय गुणस्तर प्रमाणीकरण आइएसओ ९००१ः२०१५ प्राप्त गर्न सफल भएकोमा एचसीआरसी अस्पताल नेपालगन्जलाई पनि सम्मान गरिएको थियो ।
कार्यक्रममा सहभागी स्वास्थ्य क्षेत्रका अगुवा, चिकित्सक र पत्रकारले गुणस्तरीय स्वास्थ्य सेवा र स्वस्थ समाज निर्माणका लागि जिम्मेवार स्वास्थ्य पत्रकारिता अपरिहार्य रहेकोमा जोड दिए ।
कार्यक्रममा स्वास्थ्य पत्रकारिताले नागरिकलाई स्वास्थ्यसम्बन्धी सही सूचना दिनुका साथै सेवा प्रवाहमा देखिएका कमजोरी उजागर गर्न र नीतिगत सुधारका लागि दबाब सिर्जना गर्नुपर्ने धारणा व्यक्त गरिएको थियो । स्वास्थ्य क्षेत्रको विकासका लागि पत्रकारिता र स्वास्थ्य संस्थाबीचको सहकार्य पनि उत्तिकै आवश्यक रहेको उनीहरूको भनाइ थियो ।
लुम्बिनी प्रदेश सरकारका स्वास्थ्य सचिव दुर्गा लक्ष्मी श्रेष्ठले स्वास्थ्य क्षेत्रको विकासका लागि जिम्मेवार र मर्यादित पत्रकारिता आवश्यक रहेको बताइन् । उनले स्वास्थ्यसम्बन्धी विषयमा विश्वसनीय सूचना प्रवाह हुँदा नागरिकले गुणस्तरीय सेवा प्राप्त गर्न सहयोग पुग्ने विश्वास व्यक्त गरिन् । ’स्वस्थ पत्रकारिता स्वास्थ्य क्षेत्रको विकासका लागि अपरिहार्य छ,’ प्रमुख अतिथि उनले भनिन् ।
लुम्बिनी प्रदेश सरकारले पनि आमनागरिकको गुणस्तरीय स्वास्थ्य सेवामा पहुँच सुनिश्चित गर्ने विषयलाई प्राथमिकतामा राखेर काम गर्दै आएको उनको भनाइ थियो ।
नेपाल पत्रकार महासंघ लुम्बिनी प्रदेशका अध्यक्ष शुक्रऋषि चौलागाईले व्यावसायिक पत्रकारिताले स्वास्थ्य क्षेत्रका वास्तविक समस्या पहिचान गरी समाधानका लागि सम्बन्धित निकायलाई जिम्मेवार बनाउनुपर्नेमा जोड दिए ।
स्वास्थ्य मन्त्रालयका अतिरिक्त पूर्वसचिव एवं अग्रज चिकित्सक डा. श्यामसुन्दर यादवले स्वास्थ्यजस्तो संवेदनशील क्षेत्रमा सही सूचना र तथ्यमा आधारित समाचारको महत्व बढी हुने उल्लेख गर्दै स्वास्थ्य पत्रकारिताले नागरिक र स्वास्थ्य संस्थाबीच विश्वासको वातावरण बनाउन सहयोग गर्ने धारणा राखे ।
भेरी अस्पताल नेपालगन्जका प्रमुख मेडिकल सुपरिन्टेन्डेन्ट डा. नवीन दर्नालले पनि स्वास्थ्य पत्रकारितालाई स्वास्थ्य क्षेत्रको अभिन्न पक्षका रूपमा व्याख्या गरे । स्वास्थ्य सेवा प्रवाहमा देखिएका समस्या सार्वजनिक गर्नु र सुधारका लागि सम्बन्धित पक्षको ध्यानाकर्षण गराउनु स्वास्थ्य पत्रकारिताको महत्वपूर्ण जिम्मेवारी भएको उनले बताए ।
नेपाल चिकित्सक संघ भेरीका निवर्तमान अध्यक्ष डा. विनोद थापाले स्वास्थ्य क्षेत्रको दिगो विकासका लागि प्रणालीमै सुधार गर्नुपर्ने आवश्यकता औंल्याए । उनले निजी अस्पताललाई हेर्ने राज्यको दृष्टिकोण सकारात्मक हुनुपर्नेमा जोड दिए । स्वास्थ्य सेवाको गुणस्तर सुधार गर्न सरकारी र निजी क्षेत्रका स्वास्थ्य संस्थालाई सहकार्यको वातावरण आवश्यक रहेको उनको धारणा थियो ।
दिर्घायु हाउस प्रालिद्वारा सञ्चालित स्वास्थ्यपेजका अध्यक्ष प्रियास्मृति ढकालले आफुहरु सकारात्मक र विश्वसनीय पत्रकारितालाई प्राथमिकता दिँदै आएको बताए । स्वास्थ्यकर्मी र नागरिकलाई जोड्ने पुलका रूपमा स्वास्थ्यपेजले काम गरिरहेको उनको भनाइ थियो ।
वार्षिकोत्सवकै अवसरमा स्वास्थ्यपेज विशेषांक विमोचन गरिएको थियो । कार्यक्रममा लुम्बिनी प्रदेशका स्वास्थ्य सचिव श्रेष्ठलगायतले विशेषांक सार्वजनिक गरेका थिए ।
कार्यक्रममा यस क्षेत्रका अग्रज चिकित्सक, स्वास्थ्यकर्मी, अस्पताल सञ्चालक तथा पत्रकारहरूको सहभागिता रहेको थियो । स्वास्थ्यपेज डटकमका प्रधान सम्पादक नवीन गिरीले स्वागत गरेको कार्यक्रमको सञ्चालन शोभा केसीले गरेकी थिइन् ।