कैलालीको चिसापानीदेखि राजकाँडासम्म निर्माण भइरहेको जालपादेवी केबलकार तिहारअघि सर्वसाधारणका लागि खुला गर्ने तयारी गरिएको छ। दसैँअघि नै सञ्चालनमा ल्याउने योजना रहे पनि निर्माण कार्यमा केही ढिलाइ भएपछि नयाँ समयसीमा तय गरिएको हो। आइएमई ग्रुपका अध्यक्ष तथा नेपाल उद्योग वाणिज्य महासंघका पूर्वअध्यक्ष चन्द्रप्रसाद ढकालका अनुसार आयोजनाको भौतिक निर्माण सम्पन्न भइसकेको छ भने अहिले प्राविधिक परीक्षण भइरहेको छ।
ढकालले दसैँ र तिहारबीचमै केबलकार सञ्चालनमा ल्याउने लक्ष्यसहित काम अघि बढाइएको जानकारी दिएका छन्। आवश्यक प्राविधिक जाँच पूरा भएपछि यात्रुहरूका लागि सेवा सुरु गरिने कम्पनीको तयारी छ।
करिब पाँच अर्ब रुपैयाँ लागतमा निर्माण भइरहेको यस आयोजनाको कुल लम्बाइ ३.१ किलोमिटर रहेको छ। केबलकार मार्गमा १५ वटा टावर र ३४ वटा गोन्डोला रहनेछन्। चिसापानीबाट राजकाँडा पुग्न यात्रुहरूलाई करिब १० मिनेट लाग्ने अनुमान गरिएको छ। कम्पनीका अनुसार यस केबलकारले दैनिक झन्डै ६ हजार यात्रुलाई सेवा प्रदान गर्न सक्नेछ।
सुदूरपश्चिम प्रदेशमा रहेको पर्यटकीय सम्भावनालाई उजागर गर्दै आन्तरिक तथा बाह्य पर्यटकको आगमन बढाउने उद्देश्यले आयोजना अघि बढाइएको अध्यक्ष ढकालले बताएका छन्। केबलकार सञ्चालनमा आएपछि भारतबाट आउने पर्यटकको संख्या बढ्नुका साथै यस क्षेत्रको पर्यटन व्यवसायले पनि गति लिने अपेक्षा गरिएको छ।
कर्णाली नदीमाथिको चिसापानी पुलनजिकबाट सुरु हुने केबलकार यात्रामा यात्रुहरूले प्राकृतिक दृश्यसँगै विभिन्न धार्मिक तथा पर्यटकीय स्थल अवलोकन गर्न सक्नेछन्। यात्राका क्रममा जालपादेवी, कालभैरव, कालिकादेवी र कैलाशधामलगायतका स्थल देख्न सकिनेछ। यसका अतिरिक्त हात्तीढुंगाजस्ता पर्यटकीय गन्तव्यको दृश्यावलोकन पनि गर्न पाइने जनाइएको छ।
देशका प्रत्येक प्रदेशमा कम्तीमा एउटा पर्यटकीय पूर्वाधार विकास गर्ने आफ्नो योजनाअनुसार आइएमई ग्रुपले सुदूरपश्चिमको प्रवेशद्वार मानिने चिसापानीमा यो परियोजना सुरु गरेको जनाएको छ। केबलकार सञ्चालनबाट प्राप्त कुल आम्दानीको दुई प्रतिशत रकम स्थानीय सरकारलाई उपलब्ध गराउने व्यवस्था रहेको कम्पनीले जानकारी दिएको छ। यसबाट स्थानीय तहको आम्दानी बढ्नुका साथै रोजगारीका नयाँ अवसर सिर्जना हुने र स्थानीय बासिन्दाले आर्थिक लाभ लिन सक्ने अपेक्षा गरिएको छ।
केबलकारसँगै पर्यटकलाई लक्षित गरी थप पूर्वाधार निर्माण गर्ने योजना पनि कम्पनीले अघि सारेको छ। चिसापानीमा ५० शय्याको र राजकाँडामा १०० शय्याको होटल निर्माण गर्ने तथा सभाहलसमेत सञ्चालनमा ल्याउने योजना रहेको छ। पर्यटकको बसाइ लम्ब्याउने उद्देश्यले होमस्टे र रिसोर्ट सञ्चालनको तयारी पनि भइरहेको छ। आयोजनामा कैलालीका उद्यमी सूर्यबहादुर थापासहित स्थानीय व्यवसायीहरूको साझेदारी रहेको बताइएको छ।
समुद्री सतहबाट करिब १ हजार २०० मिटर उचाइमा अवस्थित राजकाँडाबाट चिसापानी क्षेत्र र तराईका विस्तृत फाँटहरूको मनमोहक दृश्य देख्न सकिन्छ। मौसम र दृश्यता अनुकूल हुँदा अपी, साइपाल, काञ्जीरोवा तथा ओमपर्वतलगायत हिमशृंखलाको अवलोकन गर्न सकिने कम्पनीको भनाइ छ।
लुम्बिनी, कर्णाली र सुदूरपश्चिम क्षेत्रको संगमस्थलका रूपमा परिचित चिसापानीमा निर्माण भइरहेको यस परियोजनालाई कम्पनीले नेपालकै सबैभन्दा लामो केबलकार आयोजना भएको दाबी गरेको छ। सञ्चालनमा आएपछि जालपादेवी केबलकारले सुदूरपश्चिमको पर्यटन प्रवर्द्धन, स्थानीय व्यवसायको विस्तार र क्षेत्रीय आर्थिक गतिविधिमा योगदान पुर्याउने अपेक्षा गरिएको छ।