नेपालगन्जस्थित प्रसिद्ध शक्तिपीठ बागेश्वरी मन्दिरमा भक्तजनको घुइँचो लागेको छ। बडादशैंको टीकाको दिन मन्दिरमा दर्शन तथा पूजाआराधनाका लागि बिहानैदेखि भक्तजनको चहलपहल बढेको हो।
मन्दिरमा भक्तजनको आवागमन बढेसँगै आसपासका सडकमा सवारीसाधनको चापसमेत बढेको छ। तर, भक्तजन तथा सवारीसाधनको चापअनुसार ट्राफिक व्यवस्थापन प्रभावकारी हुन नसक्दा मन्दिर पुग्ने तथा फर्किने क्रममा दर्शनार्थी र स्थानीयले सास्ती खेप्नुपरेको गुनासो गरेका छन्।
बागेश्वरी मन्दिरमा दशैंका अवसरमा नेपालगन्जसहित आसपासका क्षेत्रबाट समेत ठूलो संख्यामा भक्तजन दर्शनका लागि आउने गरेका छन्। भक्तजनको चाप बढ्ने समयमा मन्दिर आसपासको सडकमा सवारी व्यवस्थापन, पार्किङ तथा पैदल यात्रुको सहज आवागमनका लागि पर्याप्त व्यवस्था हुन नसकेको देखिन्छ।
दर्शनार्थीले मन्दिर क्षेत्रमा सवारीसाधनको व्यवस्थापन, पार्किङको उचित प्रबन्ध तथा पैदल यात्रुका लागि सहज वातावरण बनाउन सम्बन्धित निकायसँग माग गरेका छन्।
बागेश्वरी मन्दिर नेपालगन्जको प्रमुख धार्मिक तथा सांस्कृतिक आस्थाको केन्द्र भएकाले चाडपर्वका समयमा यहाँ भक्तजनको चाप बढ्ने गरेको छ। यस्तो समयमा ट्राफिक व्यवस्थापनलाई प्रभावकारी बनाउँदै दर्शनार्थीको आवागमन सहज बनाउनुपर्ने देखिएको छ।