नेपालगन्ज रंगशालास्थित पौडी पोखरी सफाइमा मात्रै प्रतियोगिता आयोजकले दुईदेखि साढे दुई लाख रुपैयाँसम्म अतिरिक्त खर्च गर्नुपर्ने भएको छ। नियमित सरसफाइ र संरक्षणको अभावमा प्रतियोगिताको तयारीका क्रममा पोखरी सफा गर्न ठूलो रकम खर्च गर्नुपर्ने अवस्था दोहोरिएको नेपालगन्ज स्वीमिङ क्लबका अध्यक्ष केशव न्यौपानेले बताएका छन्।
नेपालगन्ज स्वीमिङ क्लबको आयोजनामा कात्तिक १४ र १५ गते नेपालगन्ज रंगशालामा हुने तेस्रो नेपालगन्ज अन्तर्राष्ट्रिय स्वीमिङ च्याम्पियनसिपका लागि पोखरी सफाइ तथा व्यवस्थापनको काम अघि बढाइएको छ। प्रतियोगिताको तयारीसँगै खेलाडीको सहभागिताका लागि आवेदन आउने क्रम पनि जारी छ।
प्रतियोगिताको प्रचारप्रसार तथा मार्केटिङलाई तीव्रता दिएसँगै पौडी खेलप्रति बालबालिका तथा अभिभावकको चासो बढेको आयोजकले जनाएको छ। प्रचारप्रसारपछि धेरै बालबालिकाले प्रतियोगितामा सहभागी हुन रुचि देखाउँदै आवेदन फाराम भरेका छन्। स्थानीय खेलाडीसँगै अन्तर्राष्ट्रिय क्षेत्रबाट समेत आवेदन आउने क्रम जारी रहेकाले प्रतियोगितामा खेलाडीको सहभागिता अझै बढ्ने अपेक्षा गरिएको छ।
प्रतियोगिता सुरु हुन तीन दिन मात्रै बाँकी रहँदा खेलाडीको आवेदन आउने क्रम जारी छ। आयोजकका अनुसार प्रचारप्रसारसँगै स्थानीय तथा अन्तर्राष्ट्रिय खेलाडीको आकर्षण बढेको छ। खेलाडी दर्तासँगै पोखरी सफाइ, व्यवस्थापन र अन्य प्राविधिक तयारीलाई तीव्रता दिइएको छ। प्रतियोगिता नजिकिँदै जाँदा अधिकांश तयारीका काम अघि बढिसकेको आयोजकले जनाएको छ।
प्रतियोगितामा यसपटक स्वदेशी खेलाडीसँगै भारतीय खेलाडीको सहभागिताले प्रतिस्पर्धालाई थप रोचक बनाउने अपेक्षा गरिएको छ। लखनउ, दिल्ली र पञ्जाबबाट खेलाडी आउने तयारी छ। आयोजकले नेपाल र भारतका गरी झन्डै २०० खेलाडीलाई प्रतिस्पर्धामा उतार्ने लक्ष्य राखेको छ। खेलाडी दर्ता जारी रहेकाले सहभागिता संख्या अझै बढ्न सक्ने क्लबको अपेक्षा छ।
प्रतियोगितामा विभिन्न उमेर समूहका खेलाडीबीच प्रतिस्पर्धा हुनेछ। पौडीका विभिन्न विधा समेटेर कुल ८० वटा इभेन्ट सञ्चालन गर्ने तयारी गरिएको आयोजकले जनाएको छ। यसले नयाँ प्रतिभादेखि अनुभवी खेलाडीसम्मलाई आफ्नो क्षमता प्रदर्शन गर्ने अवसर दिने आयोजकको विश्वास छ।
पोखरी सफाइमै थप खर्च
प्रतियोगिताको तयारीमा आयोजकले सामना गर्नुपरेको प्रमुख चुनौतीमध्ये रंगशालास्थित पौडी पोखरीको सरसफाइ पनि एक हो। नियमित सफाइ र संरक्षणको व्यवस्था प्रभावकारी नहुँदा प्रतियोगिताअघि पोखरीलाई प्रयोगयोग्य बनाउन अतिरिक्त खर्च गर्नुपर्ने अवस्था रहेको आयोजकको भनाइ छ।
आयोजकका अनुसार पोखरी सफाइमा यसपटक दुईदेखि साढे दुई लाख रुपैयाँसम्म अतिरिक्त खर्च लाग्ने अनुमान छ। अघिल्ला प्रतियोगितामा पनि सरसफाइमा लगभग यति नै रकम खर्च भएको थियो। हरेक प्रतियोगितामा दोहोरिने यस्तो खर्चले आयोजनाको आर्थिक भार बढाएको छ।
पौडी प्रतियोगिताका लागि पोखरी सफा हुनुका साथै पानीको गुणस्तर र आवश्यक प्राविधिक व्यवस्थापनमा ध्यान दिनुपर्ने हुन्छ। प्रतियोगिताका बेला मात्रै सफाइ गर्ने अवस्थाभन्दा नियमित सरसफाइ र संरक्षणको व्यवस्था गर्नुपर्ने आवश्यकता देखिएको छ।
प्रतियोगितालाई आर्थिक सहयोग पुर्याउन नविल बैंक टाइटल स्पोन्सरका रूपमा जोडिएको छ। प्रतियोगिता सञ्चालन गर्न करिब ३५ लाख रुपैयाँ खर्च लाग्ने अनुमान गरिएको छ। लुम्बिनी प्रदेश खेलकुद परिषद्, नेपालगन्ज उपमहानगरपालिका, कोहलपुर नगरपालिका तथा अन्य स्थानीय निकायबाट समेत सहयोगको प्रतिबद्धता आएको आयोजकले जनाएको छ।
प्रतियोगितामार्फत स्थानीय बालबालिका तथा युवालाई पौडी खेलमा आकर्षित गर्ने, प्रतिभावान् खेलाडी पहिचान गर्ने र उनीहरूलाई राष्ट्रिय तथा अन्तर्राष्ट्रियस्तरमा प्रतिस्पर्धा गर्ने अवसर प्रदान गर्ने लक्ष्य राखिएको छ।