चालु आर्थिक वर्ष २०८३/८४ को पहिलो चार महिनामा वैदेशिक रोजगारीमा जान श्रम स्वीकृति लिनेको संख्या सामान्य घटेको छ । गत आर्थिक वर्षको सोही अवधिको तुलनामा चालु वर्षको साउनदेखि कात्तिकसम्म श्रम स्वीकृति लिनेको संख्या १.३७ प्रतिशतले घटेको हो ।
वैदेशिक रोजगार विभागका अनुसार २०८३ साउन १ देखि कात्तिक मसान्तसम्म दुई लाख ७० हजार ५६ जनाले वैदेशिक रोजगारीमा जान श्रम स्वीकृति लिएका छन् । जबकि गत आर्थिक वर्ष २०८२÷८३ को पहिलो चार महिनामा दुई लाख ७३ हजार ८ सय १० जनाले श्रम स्वीकृति लिएका थिए ।
दुई आर्थिक वर्षको पहिलो चार महिनाको तथ्यांक तुलना गर्दा चालु वर्षमा तीन हजार ७ सय ५४ जना कमले श्रम स्वीकृति लिएको देखिन्छ । यसले वैदेशिक रोजगारीमा जाने नेपालीको समग्र प्रवाहमा सामान्य संकुचन आएको संकेत गर्छ । यद्यपि, चार महिनाको तथ्यांकका आधारमा मात्रै वैदेशिक रोजगारीप्रतिको आकर्षण घटेको निष्कर्ष निकाल्न भने सकिँदैन ।
मासिक तथ्यांकले भने वैदेशिक रोजगारीमा जानेको संख्यामा निरन्तर एकरूपता नरहेको देखाउँछ । चालु आर्थिक वर्षको साउनमा ७० हजार ४ सय ४१ जनाले श्रम स्वीकृति लिएकामा भदौमा घटेर ६० हजार ४२ मा झरेको थियो । असोजमा पुनः बढेर ७३ हजार ७ सय ६५ पुगेको श्रम स्वीकृति लिनेको संख्या कात्तिकमा घटेर ६५ हजार ८०८ कायम भएको छ ।
असोजको तुलनामा कात्तिकमा श्रम स्वीकृति लिनेको संख्या सात हजार ९ सय ५७ ले घटेको छ । प्रतिशतका आधारमा हेर्दा एक महिनामै करिब १०.८ प्रतिशतको गिरावट देखिन्छ । यसले वैदेशिक रोजगारीमा जानेको संख्या महिनैपिच्छे उतारचढावपूर्ण रहेको देखाउँछ ।
गत आर्थिक वर्षको मासिक तथ्यांकसँग तुलना गर्दा पनि यस्तो प्रवृत्ति स्पष्ट हुन्छ । आर्थिक वर्ष २०८२÷८३ को साउनमा ६८ हजार १ सय १०, भदौमा ६७ हजार ९ सय ७२, असोजमा ६४ हजार ६ सय ३४ र कात्तिकमा ७३ हजार ९४ जनाले श्रम स्वीकृति लिएका थिए ।
गत वर्षको तुलनामा चालु वर्षको साउनमा श्रम स्वीकृति लिनेको संख्या बढेको छ । तर भदौ र कात्तिकमा भने उल्लेख्य कमी आएको छ । असोजमा भने गत वर्षको तुलनामा चालु वर्षमा श्रम स्वीकृति लिनेको संख्या बढेको छ । यसले पहिलो चार महिनाको समग्र संख्या घट्नुमा सबै महिनाको समान योगदान नरहेको देखाउँछ ।
विभागले सार्वजनिक गरेको विवरणअनुसार कात्तिक महिनामा मात्रै ६५ हजार ८ सय ८ जनाले श्रम स्वीकृति लिएका छन् । तीमध्ये ५६ हजार २ सय ९५ जना पुरुष र नौ हजार ५ सय १३ जना महिला छन् । यसअनुसार कात्तिकमा श्रम स्वीकृति लिने कुल संख्यामा पुरुषको हिस्सा करिब ८५.५ प्रतिशत र महिलाको हिस्सा १४.५ प्रतिशत रहेको छ ।
समग्रमा चार महिनाको अवधिमा वैदेशिक रोजगारीमा जानेको संख्या गत वर्षको तुलनामा सामान्य घटे पनि मासिक रूपमा देखिएको उतारचढावले वैदेशिक रोजगारको प्रवाह स्थिर नरहेको देखाउँछ ।
