नेपाल पत्रकार महासंघ बाँकेको १४औं बार्षिक साधारणसभा तथा अधिवेशन शनिबार आयोजना भएको छ । केन्द्र, प्रदेश र जिल्लामा एकैसाथ शनिबार हुने पूर्वनिर्धारित निर्वाचन प्रक्रिया अगाडि नबढेपनि बाँकेको साधारणसभा सम्पन्न भएको हो । जेठ २६ गतेबाट सुरु हुने पूर्वनिर्धारित कार्यक्रम सदस्यता विवादका कारण स्थगित भएको जानकारी महासंघका केन्द्रीय अध्यक्ष विपुल पोखरेलले शुक्रबार साँझ सार्वजनिक गरेका थिए ।
निर्वाचन प्रक्रिया अगाडि नबढेपछि बाँके शाखाले सदस्यता अन्योलताकै बीच साधारणसभा आयोजना गरेको हो ।
महासंघ बाँके शाखा अध्यक्ष दामोदर भण्डारीको अध्यक्षतामा सम्पन्न उद्घाटन सत्रपछि वरिष्ठ पत्रकार निरज गौतमको अध्यक्षतामा भएको बन्दसत्रले १४ बुंदे घोषणा पत्र सार्वजनिक गरेको छ ।
‘प्रेस तथा अभिब्यक्ति स्वतन्त्रताको रक्षा र प्रर्बद्धनका लागि सम्पूर्ण आमसञ्चार माध्यम र पत्रकारहरूलाई अझ बढी जिम्मेवार, कर्तब्यनिष्ट, जवाफदेही र संयमतापूर्वक काम गर्न आग्रह गर्दछ’, घोषणापत्रमा उल्लेख छ, ‘पत्रकार आचार संहिता, पत्रकारिताका स्थापित मूल्य, मान्यता र सिद्धान्त अनुरूप सत्य, तथ्य, सन्तुलित र विश्वसनीय समाचार प्रकाशन प्रशारण गर्न आमसञ्चार माध्यम र पत्रकारहरूलाई आग्रह गर्ने जनाइएको छ ।’
साधारणसभामा जारी घोषणापत्रले साना लगानीमा सञ्चलन गरिएका महिला भाषाभाषीका मिडियाको संरक्षण सम्बद्र्धन गर्न स्थानीय, प्रदेश र संघीय सरकारलाई सहयोग तथा अनुदानका कार्यक्रम सञ्चालन गर्न जोडदार माग गरेको छ । मिडिया मैत्री नीति तथा कानून बनाउन माग गर्दै नेपाल पत्रकार महासंघसंग समन्वय गर्न माग गर्ने बताइएको छ ।
घोषणापत्रमा ‘स्थानीय, प्रदेश र संघीय सरकारलाई समानुपातिक रूपमा विज्ञापन वितरण गर्न जोडदार माग गर्दछ । स्थानीय विज्ञापन स्थानीय मिडियालाई प्राथमिकता साथ दिने व्यवस्था माग गर्ने’ उल्लेख छ भने ‘अनलाईन आमसञ्चार माध्यमको दर्ता र नविकरण, पत्रकार परिचयपत्रको वितरण र नविकरण जिल्ला तहबाटै उपलब्ध गराउन सरकारसँग माग गर्ने’ जनाइएको छ ।
समाचारमूलक आमसञ्चार माध्यम र सोसल मिडियाबारे सर्वसाधरणमा एकै बुझाई भएकाले फेसबुक, यूटुब लगायतका सामाजिक सञ्जाललाई व्यवस्थित गर्न नीति, विधि, कार्यविधि, निर्देशिका र ऐन, कानून निर्माण माग गर्ने’ तथा ‘श्रमजीवि पत्रकार ऐनको प्रभावकारी कार्यान्वयन गर्न माग गर्दछ’, घोषणा पत्रमा उल्लेख छ । ‘आर्थिक मन्दीका कारण जिल्लामा सञ्चालित आमसञ्चार माध्यमको दीगोपनाका लागि स्थानीय सरकारलाई जवाफदेही र जिम्मेवार बन्न ध्यानाकर्षण गराउने’ तथा ‘नेपाल पत्रकार महासंघको सदस्यता वितरण गर्दा मापदण्ड पुगेका क्रियाशिल पत्रकारलाई सरल र सहज विधिमा सदस्यता उपलब्ध गराउन र पत्रकारिता पेशामा क्रियाशिल नरहेका सदस्यहरूलाई स्वघोषणा वा स–सम्मान सदस्य नरहेको व्यवस्था मिलाउन सम्बद्ध सबैमा आग्रह गर्ने’ घोषणापत्रमा जनाइएको छ ।
‘पत्रकारिता पेशा वा व्यवसायिक क्षेत्रका साझा समस्या तथा सवालहरूमा सरोकारवालाबीच छलफल, अन्तरक्रिया, गोष्ठी, सम्मेलन गरी समाधानका उपाय खोज्नुपर्ने’ घोषणा पत्रमा बताइएको छ ।
‘पत्रकारलाई निर्बाध रूपमा समाचार तथा फोटो, भिडियो संकलन गर्ने व्यवस्था मिलाउन र पत्रकारका विरुद्ध हुने अवाञ्छित गतिविधि नियन्त्रण गर्न सम्बद्ध सबैमा जोडदार माग गर्ने,’ घोषणापत्रमा अगाडि भनिएको छ, ‘महिला, जनजाति, दलित, मधेशी, मुस्लिम, अल्पसंख्यक, अपाङ्गता भएका व्यक्तिलाई पत्रकारिता पेशामा आबद्ध गराउन र पत्रकारिता पेशामा टिकाउने खालका कार्यक्रम सञ्चालन गर्न सम्बद्ध सबैमा हार्दिक आग्रह गर्दछ ।’
घोषणापत्र मार्फत ‘बाँकेका पर्यटकीय गन्तब्यहरू बाँके राष्ट्रिय निकुञ्ज, बागेश्वरी मन्दिर, बर्फानी बाबा, सन्तानेश्वर मन्दिर, शैयद नुरखलिफा, गुरुद्वारा लगायतका क्षेत्रको विकास निर्माण र नयाँ पर्यटकीय गन्तब्यको पहिचान गर्न आग्रह समेत घोषणापत्रमा गरिएको छ ।
नेपालगन्ज उपमहानगर–पालिकाका नगरप्रमुख प्रशान्त बिष्टको प्रमुख आतिथ्यतामा भएको उद्घाटन सत्रमा बिशेष अतिथि नेपाल पत्रकार महासंघ लुम्बिनी प्रदेश उपाध्यक्ष शुक्रऋषी चौलागाई, बाँकेका प्रमुख जिल्ला अधिकारी खगेन्द्र प्रसाद रिजाल, बाँके प्रहरी प्रमुख प्रहरी उपरीक्षक तुल बहादुर कार्की, पूर्वअध्यक्ष, पूर्वपदाधिकारी, अग्रज पत्रकार, पत्रकार सम्बद्ध विभिन्न संघसंगठनका प्रमुख तथा प्रतिनिधिहरूले बोलेका थिए ।
उद्घाटन सत्रमा ल्याकत अलि पत्रकारिता पुरस्कारबाट निरज गौतम र शिव डोटेल, क्रियाशिल पत्रकारिता पुरस्कारबाट विजय मल्ल र बैकुण्ठ अधिकारी, सुर्यनाथ गौतम स्वास्थ्य (मुटु) पत्रकारिताबाट शंकर खनाल र शोभा केसी, चन्द्रकला कुर्मी शिक्षा पत्रकारिता पुरस्कारबाट विश्वराज पछलड्ङग्या, रबिन्द्र घिमिरे, माधवी स्वास्थ्य पत्रकारिता पुरस्कारबाट लक्ष्मण ढुङ्गाना (बर्दिया) र अनिता विश्वकर्मा (बाँके), रामकली, रामआधार पत्रकारिता पुरस्कारबाट बिक्रम बुढाक्षेत्री र अभिशेक गुप्ता, बेलमती स्वास्थ्य पत्रकारिता पुरस्कारबाट गजेन्द्र गुरुङ्ग, रूपनी जिएम, आँखा स्वास्थ्य पत्रकारिताबाट खम्बप्रसाद पुन, कृष्णराज अधिकारी र चन्द्र बोहरा तथा गुरु खत्री पत्रकारिता पुरस्कारबाट तिलक गाउँलेलाई नगदसहित पुरस्कृत गरिएको शाखा सचिव कमल डाँगीले जानकारी दिए ।
महासंघले पूर्व अध्यक्ष एवम सल्लाहकारलाई सम्मान गर्ने कार्यलाई समेत निरन्तरता दिएको छ । महासंघले कानूनी सल्लाहकार एवम बरिष्ठ अधिवक्ता सुनिल श्रेष्ठ, सल्लाहकार डक्ट धिताल, महासंघ बाँकेका संस्थापक अध्यक्ष लियाकत अली, हेमन्त कर्मचार्य, निरज गौतम, प्रेम केसी, झलक गैरे, शुक्रऋषी चौलागाई, रुद्र सुवेदी तथा ठाकुरसिंह थारुलाई सम्मान गरेको छ । लियाकत अलि पत्रकारिता पुरस्कार र क्रियाशिल पत्रकारिता पुरस्कार महासंघ बाँकेले स्थापना गरेको पुरस्कार हो भने अन्य दाताले स्थापना गरेको पुरस्कार हो ।
महासंघको बन्द सत्रमा सचिव कमल डाँगी र कोषाध्यक्ष विनोद पौडेलले प्रस्तुत गरिएको प्रतिवेदन पारित भएको थियो । यसैबीच, महासंघ केन्द्रिय समितिले सार्वजनिक गरेको मतदाता नामावलीमा देखिएको विवादका कारण महासंघको चुनावको मिति सारिएको छ । जेठ २६ गतेका लागि तय गरेको चुनाव आगामी असार दोस्रो साता भित्र गर्ने गरि तयारी थालिएको छ ।