हुलाकी राजमार्ग अतिक्रमण गरि घर टहरा निर्माण गरेका स्थानीय विरुद्ध नरैनापुर गाउँपालिकाले विहिवार देखि डोजर एक्शन सुरु गरेको छ ।
नरैनापुर गाउँपालिका कार्यालयले एक साता अघि माइकिंग र सूचना प्रशारण मार्फत स्थानीयहरूलाई सडकको मादण्ड ३० मिटर भित्र पर्ने संरचना हटाउन आग्रह गरेपनि अटेरी गरि संरचना नहटाउने विरुद्ध डोजर एक्सन थालिएको हो ।
नरैनापुर गाउँपालिका वडा नं.१ सुईया देखि सुरु भएको अभियान एक साता भित्रै ६ वटै वडामा संचालन हुने अतिक्रमण विरुद्ध अभियानका नेतृत्वकर्ता गाउँपालिकाका कम्प्युटर शाखा प्रमुख मुकद्दर अली मुकेरीले बताए ।
अहिले हामी १६ मीटर भित्र पर्ने संरचना आफै हटाइरहेका छौं, दैनिक नेपालगन्ज संग कुरा गर्दै मुकेरीले भने, पछि ३० मीटर भित्रको संचरना हटाउने समेत तयारी रहेको छ । नरैनापुरमा हुलाकी राजमार्गको मापदण्ड ३० मीटर चौडा भएपनि कतिपय स्थानमा १० मीटर समेत बाँकी नरहेको देखिएकोले अभियान थालिएको उनले बताए ।
सूचना जारी भएपनि आफ्नो संरचना आफै हटाउन आग्रह गरेपनि नहटाउने ब्यक्तिहरूको संरचना उपर डोजर चलाउनु परेको मुकेरीले जानकारी दिए । अभियानमा गाउँपालिकाको प्राविधिक शाखा, अनुगमन शाखा समेत सहभागी रहेको छ ।
विहिवार नरैनापुर १ सुईयामा दर्जन बढि घर टहरा संडक क्षेत्रबाट हटाइएको नरैनापुर गाउँपालिका अध्यक्ष ईस्तियाक अहमद शाहले बताए । सडकको विषयमा हामी निर्मम तरीकाले अघि बढेका छौं, दैनिक नेपालगन्ज संग कुरा गर्दै अध्यक्ष शाहले भने, अझैपनि संरचना नहटाउने विरुद्ध जरिवानाको कारवाही अघि बढाउने तयारी छ ।
सडक सबैको साझा सम्पत्ती हो यसको अतिक्रमण हुनु दुखद हो, अध्यक्ष शाहले भने, एक साता भित्र नरैनापुरको हुलाकी सडक र सो पछि गाउँका भित्री सडक समेत अतिक्रमण मुक्त बनाउने तयारी छ ।