चालू आर्थिक वर्ष २०८०/८१ मा बाँकेका दुईवटा राष्ट्रिय गौरवका आयोजना सिक्टा सिँचाइ र हुलाकी राजमार्गको बजेट खर्च उत्साहजन देखिएको छैन । राष्ट्रिय आयोजना भए पनि सरकारबाट समयमै रकम निकासा नहुँदा ति गौरवको आयोजनाको बजेट खर्च निराशाजनक देखिएको हो ।
सिक्टा सिँचाइ आयोजनाको कूल बजेट ७९५६ (लाखमा) मध्ये २४.८९ प्रतिशत मात्र बजेट खर्च भएको छ । त्यस्तै ३४८९० (लाखमा) बजेटमध्ये ४४.३५ प्रतिशत बजेट खर्च भएको छ । तेस्रो मसान्तसम्म पनि आधा रकम खर्च नहुँदा सतप्रतिशत बजेट खर्च हुने सम्भावना भने यसले देखाएको छ । नीतिगत तथा कानुनी प्रबन्धको कमी, पूर्वतयारीको कमी, व्यवस्थापकीय दक्षताको कमी, वन तथा सडक क्षेत्रको व्यवस्थापनमा समस्या, स्रोत व्यवस्थापनमा समस्या र नियमन तथा समन्वयको कमीले यस्ता आयोजनाको निर्माणले गति लिन नसकेको अर्थ मन्त्रालयको प्रतिवेदनमा उल्लेख छ ।
आयोजनाको पहिचान, घोषणा र कार्यान्वयनसम्बन्धी छुट्टै र स्पष्ट नीतिगत तथा कानुनी व्यवस्था नहुँदा यस्तो समस्या आएको प्रतिवेदनमा उल्लेख छ । साथै, अन्य आयोजनाभन्दा प्राथमिकताका साथ निर्माण गर्ने भनेर स्पष्ट नीति नहुँदा पनि यस्तो समस्या आएको अर्थ मन्त्रालयको भनाइ छ । यसैगरी, आयोजना निर्माणस्थलमा स्वामित्व नभएर पनि जग्गा भोग गरिरहेका परिवारको घरजग्गालगायतका क्षतिपूर्ति निर्धारणमा समस्या, स्थानीयबाट उच्च मुआब्जा माग गरी अवरोधजस्ता कारणले पनि समस्या भएको बताइएको छ ।
यस्तै, आयोजना कार्यान्वयनको सुरुमै सम्बद्ध सरोकारवाला निकायसँग पर्याप्त समन्वय नहुने जस्ता समस्या देखिएको उक्त प्रतिवेदनमा उल्लेख छ ।