बालबालिकालाई सिर्जनशीलतासँगै खेलकुद
आदर्श माध्यमिक विद्यालयले आफ्ना विद्यार्थी बालबालिकाका लागि सिर्जनशीलताको उजागरदेखि खेलकुदमा प्रतिष्पर्धात्मक विकासका लागि ‘आदर्श प्लस २ स्पोर्ट्स मेनिया २०८०’ सञ्चालन गरेको छ ।
आइतवार ‘आदर्श प्लस २ स्पोर्ट्स मेनिया २०८०’ को दोस्रो दिन, फुटबल, क्रिकेट, भलिबल, म्यूजिकल चियर, घैटौ फुटाई लगायतका इभेन्टहरुको आयोजना गरिएको इभेन्ट डाइरेक्टर महेश्वर जोशीले जानकारी दिए । ‘तेस्रो दिन प्रतिभा सम्मानदेखि ह्याण्डराइटिङ कम्पिटीसन लगायतका इभेन्ट गरिनेछ,’ सोमवार आदर्श प्लस २ स्पोर्ट्स मेनियाको अन्तिम दिनका कार्यक्रमबारे जानकारी दिंदै जोशीले दैनिक नेपालगन्जसँग भने ।
ओलम्पियन सुरेन्द्र हमालले शनिवार शुभारम्भ गरेको ‘आदर्श प्लस २ स्पोर्ट्स मेनिया’ नेपालगन्ज वडा नम्बर १ एन्फा एकेडेमी मैदानमा आयोजना गरिएको हो । जहाँ विभिन्न १३ वटा खेलका प्रतिष्पर्धा गरिएका छन् । शनिवार दौड प्रतियोगिताको उद्घाटन गर्दै भारोत्तलन अन्तर्राष्ट्रिय खेलाडी हमालले यस्ता खेलहरुले खेलाडीको पहिचानसँगै विभिन्न अवसर सिर्जना गर्ने बातावरण बनाउने विश्वास व्यक्त गरे । उनले आफूभित्रको क्षमता अनुसार खेल छनौट गरेर अनुशासित ढंगले निरन्तर लागेमा सफल भइने समेत सुझाए ।
विद्यालयका प्राचार्य विरभान केसीको अध्यक्षतामा भएको उद्घाटन कार्यक्रममा विद्यालयका प्रमुख निर्देशक इश्वर पोखरेल, एकेडेमिक सल्लाहकार प्रकाश लामिछाने लगायतले शुभकामना दिए । उद्घाटनपछिका दुई दिनसम्म दौड, फुटबल, ब्याडमिन्टन,भलिबल, घैंटो फुटाई, चेस, म्यूजिकल चेयर लगायतका खेल आयोजना गरिएका छन् ।