लोकनृत्यमा फेरि देखियो एञ्जल्सको अब्बलता
दैनिक नेपालगन्ज
नेपालगन्जमा शुक्रवार आयोजित प्रथम ‘मेयर सांस्कृतिक कप–२०८३’ अन्तर्गतको अन्तरमाध्यमिक विद्यालयस्तरीय लोकनृत्य प्रतियोगितामा एञ्जल्स मावि नेपालगन्जले उपाधि जितेको छ । विभिन्न सांस्कृतिक प्रतियोगितामा लगातार उत्कृष्ट प्रदर्शन गर्दै आएको एञ्जल्सले यसपटक पनि आफ्नो सांस्कृतिक क्षमता प्रमाणित गर्दै पहिलो स्थान हासिल गरेको हो ।
नेपालगन्ज उपमहानगरपालिकासँगको आर्थिक साझेदारीमा बाँके कला केन्द्र नेपालगन्जको आयोजनामा पहिलो पटक गरिएको साँस्कृतिक प्रतियोगितामा जिल्लाका १२ विद्यालय सहभागी भएका थिए । मौलिक कला, लोकसंस्कृति र परम्परागत नृत्यको संरक्षण तथा प्रवद्र्धन गर्ने उद्देश्यसहित आयोजित प्रतियोगितामा विद्यार्थीहरूले विविध सांस्कृतिक प्रस्तुति दिएका थिए ।
प्रतियोगितामा एञ्जल्स स्कूलका विद्यार्थीहरूले प्रस्तुत गरेको लोकनृत्यले दर्शक र निर्णायक दुवैको ध्यान आकर्षित गरेको थियो । विद्यालयले विगतदेखि नै सांस्कृतिक गतिविधिमा सक्रिय सहभागिता जनाउँदै आएको छ । सहभागी विद्यार्थीलाई हौसला दिन विद्यालय संस्थापक प्रिन्सीपल विना मल्ल स्वयं कार्यक्रम स्थलमा सक्रिय थिइन् ।
विभिन्न मञ्चमा उत्कृष्ट नतिजा निकाल्दै आएको एञ्जल्सले ‘मेयर सांस्कृतिक कप’को पहिलो संस्करणमै उपाधि जितेर आफ्नो सांस्कृतिक पहिचानलाई थप बलियो बनाएको सहभागीहरूले बताएका छन् ।
प्रतियोगितामा एञ्जल्स मावि पहिलो हुँदा पशुपति मावि राँझा दोस्रो स्थानमा रह्यो । त्यसैगरी मोडेल एकेडेमी नेपालगन्ज र न्यु ग्यालेक्सी स्कूलले संयुक्त रूपमा तेस्रो स्थान हासिल गरे । विजेता विद्यालयहरूले क्रमशः ५१ हजार रुपैयाँ, ३१ हजार रुपैयाँ तथा १० हजार ५ सय रुपैयाँका दरले नगद पुरस्कार, ट्रफी र प्रमाणपत्र प्राप्त गरेका छन् ।
कार्यक्रममा नेपाली लोकसंस्कृति जगेर्नाको आवश्यकता औंल्याउँदै कला र संस्कृतिसँग विद्यार्थी पुस्तालाई जोड्न यस्ता प्रतियोगिता प्रभावकारी हुने धारणा व्यक्त गरिएको थियो । सहभागीहरूले ‘विद्यालयस्तरमै यस्ता कार्यक्रमले प्रतिभा उजागर गर्ने अवसर दिन्छ’ भन्दै स्थानीय तहले यस्ता गतिविधिलाई निरन्तरता दिनुपर्ने बताएका थिए ।
कार्यक्रमका अवसरमा स्वर्गीय गीतकार तथा संगीतकार महेन्द्र हमालको योगदानको स्मरण गर्दै उनकी धर्मपत्नी शान्ति हमाललाई विशेष सम्मान गरिएको थियो । विभिन्न क्षेत्रबाट सहयोग गर्ने अतिथिहरूलाई मायाको चिनो प्रदान गरेर सम्मानसमेत गरिएको थियो ।
बाँके कला केन्द्रले कला, संस्कृति तथा लोकपरम्पराको संरक्षणका लागि आगामी दिनमा पनि यस्ता कार्यक्रमलाई निरन्तरता दिने जनाएको छ । कार्यक्रममा सामाजिक, शैक्षिक तथा सांस्कृतिक क्षेत्रबीच सहकार्य र सम्मानको वातावरण निर्माण गर्ने विश्वास व्यक्त गरिएको थियो ।
कार्यक्रम संयोजक वीरेन्द्र यादवका अनुसार, नेपाल प्रज्ञा प्रतिष्ठानका पूर्व सदस्य सचिव सनत रेग्मी, डा.हरिप्रसाद तिमिल्सिना, नेपालगन्ज उद्योग वाणिज्य संघ, घरेलु तथा साना उद्योग महासंघ, प्याब्सन बाँके, नाट्टा बाँके च्याप्टर, होटल व्यवसायी महासंघलगायत विभिन्न संस्थाका प्रतिनिधिको सहभागिताले कार्यक्रमलाई भव्यता प्रदान गरेको थियो ।
बाँके कला केन्द्रका अध्यक्ष सुन्दर गुरुङको अध्यक्षतामा भएको कार्यक्रममा नेपालगन्ज उपमहानगरपालिका शिक्षा, युवा तथा खेलकुद महाशाखा प्रमुख उपसचिव गोर्खबहादुर थापा प्रमुख अतिथि रहेका थिए । कार्यक्रममा केन्द्रका सल्लाहकार श्रीराम सिग्देललाई संस्था स्थापनामा दिएको योगदानका आधारमा मानार्थ सदस्यता प्रदान पनि गरिएको थियो ।
